3 Yohana 1 - Dadiya NT

Yaltǝm

¹ Nǝmǝ mǝ Yohana, mǝ nǝ dʊʊ mʊrkalɨ nǝb bwangtǝm Kwaamaɨ, mǝ mʊla Gayus gǝm lɛɨ, nʊ nɨ mǝ swɨ lɛ nǝn bɨlǝngǝnɨ.

² Fwalɨ nyan mǝndɨ, mǝ maa keli lɛ ń nya yɨm kwamɨgǝn a golantɨnɔ gǝm gwam, jǝbɔ yɨm kwamɨgǝn a bʊtɔ, kanga kʊlɨ mʊnɔ yǝm kwamɨgǝnɨ.

³ N maa fulotǝm nǝl nǝn bɨlǝngǝn kaam kɛtǝlamɔ ja bɛ ba ja sʊwa ɨ maajɨ bɨlǝngkɛl mʊnɨ, kanga mʊ bwangtǝn bɨlǝngkɛlɔ lɛɨ.

⁴ Mɨ jʊ nɨ wo a laa mɨ fulotǝm nǝl n nyʊwa gɔ, bɛtɔ lɔ mɨɨ bwangtǝn bɨlǝngkɛlɔ lɛ.

Wanatǝm Nyan Gayusi

⁵ Fwalɨ nyan mǝndɨ, mʊ nǝ tatǝm swatǝm yaa a tɨkalɨ nɨ mʊ maa kambɔ gǝm lɛɨ, a ga keli a faabǝmɔ gǝm.

⁶ Nǝji ja nǝ nyiyo a dul swɨtǝm mʊnɔ a kǝga mʊrkalɨ nǝb bwangtǝm Kwaamaɨ. A bʊm nyɔ ń ywa ji nǝn kaa jǝl kanga fulo Kwaama gǝm nǝl lɛɨ.

⁷ N kɛl dun nɨ ja jeli, mɨ jǝ yo tɨkalɨ lɛ a daagɔ Bʌtʌbɔ woi.

⁸ A yǝlam nyɔ bǝ tɨka nǝb nɨ, bǝ do tuutǝm jinɔ, sǝ bǝ yǝlam fatǝm maajɨ jǝbɔ ji a gola bɨlǝngkɛl.

Diyotarifis Nǝ Kɔtǝm Bɨlǝngkɛl

⁹ N mʊla mʊrkalɨ nǝb bwangtǝm Kwaamaɨ gǝm kǝlɨ bɛ langǝn bwangǝn, a Diyotarifisi wʊnɨ swɨ lɛ a laa tangǝnɔ gwam a kʊm jini, a kɔ bwangtǝm kɛl bǝnɔ.

¹⁰ Na n bɛɨ, mǝ sʊwa sʊwa nǝbɔ jʊ nɨ gǝ maa lɛɨ mɨ nyǝmatǝm wo, n kɛlɨkɛlɨ nǝn kwan a dul bǝn. Kal bǝn nɛ, wʊnɨ a la gǝm bɔ, a kɔ yotǝm kambɨɨ, kaa nǝb nɨ lɛ swɨ lɛ a yo jii, jǝg ji lɛ a mʊgɔ mʊrkalɨ nǝb bwangtǝm Kwaamaɨ.

Nǝtǝm Nyiyo Nyan A Dul Dimitiriyasɨ

¹¹ Fwalɨ nyan mǝndɨ, ka ń banga lɛ bwɨlang maajɨ. Bɛ ń mɛla maajɨ nyan. Nʊ nɨ maa maajɨ nyan nɛɨ, na a Kwaamaɨ. Nʊ nɨ maa maajɨ bwɨla lɛɨ, a nyǝm bɔ Kwaama.

¹² Nǝbɔ a nǝ nyiyo nyan a dul Dimitiriyasɨ, bɨlǝngkɛlɔ dul gǝn a nǝ nyiyo nyɔ. Bǝn tǝbǝn bǝ nǝ nyiyo. Ń nyǝm nǝtǝm nyiyo bǝnɔ n bɨlǝngkɛl.

Dɨltǝm kɛlɔ

¹³ Mǝ nǝn jʊtǝb nɨ mǝ mʊla mʊn nɛ a ladaɨ, a bʊm nyɔ kǝngkɔ mɨsɔ mǝ mʊla mʊn nɛ a langǝn bwangǝn.

¹⁴ Mǝ ya nǝl lɛ bǝ tǝgaka tǝgaka mɨsɔ kʊta lɛ, sǝ bǝ sʊwa kɛl kǝga jǝbɔ kǝga.

¹⁵ Bɛ yɨm kwamɨgǝnɔ a ta tʌgo gwanggwang a daa jen woi. Fatǝlam mʊnɔ yal ń nɛ. Bɛ yal fatǝlam bǝnɔ win win.