2 Yohana 1 - Dadiya NT

Yaltǝm

¹ Nǝmǝ mǝ Yohana, mǝ nǝ dʊʊ mʊrkalɨ nǝb bwangtǝm Kwaamaɨ, mǝ mʊla nɔɔlɨ nɨ gǝm lɛ Kwaama a jǝgǝmɨ, jǝbɔ bɛtɔ lɔ gɨɨ wʊnɨ mǝ swɨ lɛ nǝn bɨlǝngǝnɨ. N ke bɔ mǝ kwaamɨ mǝ swɨ jen nɛɨ, jǝbɔ nǝbɔ gwam ja nyǝm bɨlǝngkɛlɨ.

² Nǝn swɨ jen nɛ a dul bɨlǝngkɛl nɨ yǝm a mʊgɔ nǝl bǝnɨ, bɨlǝngkɛl nɨ yɨ yɨ dakini jǝbɔ bǝn mɨ dɨtǝm wo.

³ Bɛ lǝma, jǝbɔ bʊnatǝm, jǝbɔ yɨm kwamɨgǝn a daagɔ Kwaama Tɛtɛɨ jǝbɔ a Yesu Kiristii, Bʊla Tɛ bwɛɨ a yɨ nyɔ a daa bǝn woi nǝn bɨlǝngǝn jǝbɔ swɨkatǝm.

Jǝ́ Yɨ A Mʊgɔ Mɛlalɨ Kiristii

⁴ N maa fulotǝm nǝl dangǝn jǝbɔ kaam bɛtɔ lɔ mʊɨ, jǝ bwangtǝn bɨlǝngkɛlɔ lɛ kanga Tɛtɛ a nǝ bǝn diili.

⁵ Kǝngkɔ, mǝ kela ń nɛ nɔɔlɨ dʊʊ, bɛ bǝ nʊng swɨkatǝm. N ke bɔ diil fɨ mǝ mʊla mʊn nɛɨ, n nʊ gɔ bǝ nǝngǝn nǝn tɨkǝgaɨ.

⁶ Swɨtǝmɔ nǝn gɔ bɛ bǝ bwangtǝn diil gǝnɔ. Diilɔ n nʊ jǝ́ nyʊwa nǝn tɨkǝga gɔ, bɛ jǝ́ yɨ yɨm swɨkanɨ.

⁷ Mǝ sʊwa nyɔ jʊ a bwɨɨ, nǝb swagtǝmɔ a jel a yooli nɨ a lada, wʊnɨ ja jǝla bɔ gɔ Yesu Kiristi a jel a bʊtɔɨ. Nǝb gɔ n nǝb swagtǝm jǝbɔ nǝb kiim Kiristii.

⁸ Bɛ jǝ́ kɨla dul jenɔ. Ka jǝ́ mǝla lɛ maajɨgɔ jǝ́ maaɨ. Bɛ jǝ́ nya ywatǝm nyan.

⁹ Nʊ nɨ a tɨ bɔ a mɛlalɨ Kiristii, a sʊtǝn kaa jǝl woi, Kwaama mɨ dakini jǝbɔ gɔ. Nʊ nɨ a tɨ a mɛlalɨ nɨɨ, nǝngǝn nǝn Tɛ bwɛɨ jǝbɔ Bwɛ.

¹⁰ Nʊ nɨ a bɛ a daa jen woi, a bɛ bɔ nǝn mɛlalɨ nɨɨ, ka jǝ́ yo gǝn nɛ a lɔ jen, ka jǝ́ yal gǝn nɛ nǝn bɛtǝmɔ.

¹¹ Gwam nʊ nɨ a maa gǝm yaltǝm nǝn bɛtǝmɨ, mʊrka mʊrka dul jǝbɔ gɔ a bwɨlang maajɨ gǝnɔ gǝm.

Dɨltǝm Kɛlɔ

¹² Mǝ nǝn jʊ nɨ mǝ sʊwa jen nɛ a ladaɨ, n kuwo a daa bɔ tʌgo n mʊla jem a langǝn bwangǝn. N ya nǝl n yɔ jem fɔla sǝ n sʊwa jen kǝga jǝbɔ kǝga, sǝ fulotǝm nǝl bǝnɔ a yii dǝngdǝng.

¹³ Bɛtɔ lɔ kɨla mɔ a nɔɔlɨgɨɨ wʊnɨ Kwaama a jǝgǝmɨ, twam jem yaltǝm jinɔ lɛ.