2 Timoti 4 - Dadiya NT1 N mʊrka ń jǝbɔ Kwaama, jǝbɔ Kiristi Yesu nʊ nɨ maa borang lɛ a dul nǝb nɨ nǝn kʊlɨɨ jǝbɔ nǝbɔ a bʊla bʊlaɨ. N mʊrka ń jǝbɔ yǝlatǝm gǝnɔ jǝbɔ fɔlɔn gǝnɔ. 2 Bɛ ń kiyo kɛl Kwaamaɨ. Bɛ ń fɛka kwangkwang kum jǝbɔ kɔkɔ. Fɛka nǝbɔ lɛ. Mʊ gʊ jim lɔl lɛ. Mʊ kʊʊ jim nǝl lɛ nǝn bwatǝm nǝl jǝbɔ mɛlalɨ. 3 Kwamagɔ bɛ bɛ, wʊnɨ nǝbɔ mɨsɔ kʊ nǝl lɛ a mɛlalɨ nyanɨ. Jǝ mʊr nǝb mɛlalɨ nɨ mɛla jim jʊ lɔl jinɔ swɨ lɛ a nyʊwaɨ, jʊ a bwɨɨ lɔl jinɔ ga lɛ gaɨ. 4 Jǝ mǝlalam mǝlalam lɔl jinɔ a nyʊwatǝm bɨlǝngkɛl sǝ ja yǝla a nyʊwalatǝm shinitɨn. 5 Mɔ, bɛ ń ta dul mʊnɔ a golantɨnɔ gǝm gwam. Kʊ nǝl a nɔɔtǝm gaalan. Maa maajɨ maltǝm nyiyo fulon kɛl lǝmɨgɔ lɛ. Yii maajɨ mʊnɔ. 6 A mǝndɨ ja kwɛl jǝ tǝla ɨ lɛ na jǝ tǝlatǝm twama. Kwama kʌbotǝm mɨ a dwama. 7 N nɔɔ gaalan, gaalan nyangǝn. N dɨ sʊgɔlɔ. N ta nǝtǝm bɨlǝngkɛlɔ. 8 Tangǝnɔ a bǝlaɨ n nyatǝm dwang dul maajɨ dǝngdǝng, wʊnɨ ja fɛka mɨɨ, wʊnɨ Tɛlalɔ, nǝ maatǝm borang dǝngdǝngɔ nɨ ɨ lɛ nǝn kɔkɔ dɨltǝmɨ. Ke bɔ mǝ kwaamɨ, pʌd jǝbɔ nǝb nɨ ya nǝl lɛ a bɛtǝm gǝnɔ gǝmɨ. Kaam Diiltɨnɔ 9 Bɛ ń ka bʊtɔ ń bɛ a daa mɨ woi yagɨ yagɨ, 10 jʊ a bwɨ mǝ sʊwa nyɨɨ, Dimas nǝ swɨtǝm yooli nɨ a bǝla ɨ, a shu a Tasalonika. Karaska a shu a tǝm Galatiya. Titus tǝgǝn a shu a tǝm Dalmatiya. 11 Nǝn Luka kwaagɔ win jǝbɔ mǝɨ. Bɛ ń do Markus jǝ́ bɛ dakini, jʊ a bwɨɨ tɨka ɨ tɨka ɨ a mʊgɔ maajɨ mǝndɨ gǝm. 12 N twam twamɨ Tikikus a Afisa. 13 Na mʊ bɛ lɛɨ, bɛ ń bɛ mɨ nǝn bɛllɛ nɨ mǝ bǝla a daagɔ Karbus woi a Taruwasaɨ. Bɛ ń bɛ mɨ nǝn langǝn bwangǝnɔ, wʊnɨ ja kʊlʊm kʊlʊmɨ, a ga keli a tɛtɨn nɨ nǝn mʊlalɨɨ. 14 Iskandari nǝ tuutǝm kʊbǝlɔ a maa mɨ jʊ nɨ a bʊm bɨɨ. Tɛlalɔ yǝla ywa gǝn ywa a dul maajɨ nɨ ga maaɨ. 15 Mɔ tǝmʊn bɛ ń kɨla gǝn. A kɔ kɛl nɨ bǝ kiyo lɛɨ. 16 Nǝn kwama mǝ tɨm a kǝga borang nǝn tɨkǝga a kɛl jǝgtǝm dul mǝndɨɨ, mɨ nʊ nɨ wo a bwa mɨ guui, pʌd jinɔ ja mwal ja bǝla ɨ. N ya nǝl mɨsɔ Kwaama kiyo lɛ na bwɨlangkɛl a dul jin. 17 Tɛlalɔ a tɨ a gul mɨ. A nɨ ɨ kwaan sǝ n kiyo fulon kɛl lǝmɨgɔ dangǝn, sǝ Bʌtʌbɔ gwam a nyʊwa. A jǝg ɨ a nyiyo tulʌm. 18 Tɛlalɔ bʊʊ bʊʊ nǝn mǝ a bwɨlang kanjǝlɔ gǝm gwam, sǝ a kɨla ɨ, a yɔ nǝn mǝ a fɔlɔn gǝnɔ gǝm a dʌbʌli. Bɛ dʊʊlǝnɔ a ta tʌgo gwanggwang a daa gǝ woi mɨ dɨtǝm wo. A daa nyɔ! Dɨltǝm Yalǝnɔ 19 Bɛ ń yal mɨ Bilkisu jǝbɔ Akila, jǝbɔ nǝbɔ lɔ Onisifarasɨ. 20 Arastas gǝ na a Korinti. Tarofimas mǝ bǝla gǝn a Militus mɨ kwamɨgǝn. 21 Bɛ ń sʊtǝn kwaan dangǝn, bɛ, sǝla shenagɔ a la. Aubulus yal ń nɛ jǝbɔ Budis, jǝbɔ Linas, jǝbɔ Kalaudiya, jǝbɔ kambɔ pʌd. 22 Bɛ Tɛlalɔ a yɨ a nǝl mʊn. Bɛ lǝmagɔ a yɨ jǝbɔ jen. |
©️2024 Luke Initiative for Scripture Translation
The Seed Company