2 Timoti 2 - Dadiya NT

Sʊwajaam Nyan A Kiristii

¹ A mʊnɔ bʊla mɨ, bɛ ń tɨ nǝn kwaan a gola lǝma a mʊgɔ Kiristi Yesui.

² Kanjǝl nɨ mʊ nyʊwa a daa mǝ woi, a kǝga nǝb nǝtǝm nyiyo nɨ a lada nyɨɨ, bɛ ń nǝ nǝb nɨ a ta swatǝm yaaɨ, nǝb nɨ tʌji dwal lɛ a mɛla kaam nǝbɔ gǝmɨ.

³ Bɛ ń kʊ nǝl jǝbɔ nǝn a nɔɔtǝm gaalanɔ gǝm, na sʊwajaam nya a Kiristi Yesui.

⁴ Mɨ sʊwajaam nɨ wo a kǝga kun dǝg dul gǝnɔ lɛ a kaa maajɨɨ. Swɨ lɛ a fulo nǝl nǝ dʊʊ gǝnɨ.

⁵ Nǝ maatǝm gwanan mɨsɔ ku jelʌn nɛ, na ga bwangtǝn bɔ diil gwananɨ.

⁶ Nǝ jʊngtǝm twam nǝn kwaan bʊtɔ, nǝn gɔ tǝl yotǝm jǝjalǝn twamɔ lɛ nǝn tɨkǝgaɨ.

⁷ Bɛ ń maa bʊʊlalɨ a dul jʊ nɨ mǝ sʊwa ń nɛɨ. Tɛlalɔ nǝ ń nǝ ń nyǝmtǝm kanjǝlɔ pʌd.

⁸ Bɛ ń bʊʊla nǝn Yesu Kiristi, nʊ nɨ ja gung a bwaaɨ, a guu Daudaɨ, kanga fulon kɛl lǝmɨ nɨ mǝ sʊwa lɛɨ a mɛlaɨ,

⁹ wʊnɨ mǝ nɔɔ gaalan nɛ a kɛl dul gǝnɨ. N jʊ a bwɨ ja bwa ɨ nǝn golman na nʊ nɨ maa bwɨlang kanjǝl lɛɨ, kɛl Kwaamaɨ a bwa bɔ bwaɨ.

¹⁰ A dul kɛl nɨ mǝ kʊ nǝl lɛ a kanjǝlɔ gǝm gwam a kɛl dul nǝb nɨ ja jǝgamɨ sǝ ji tʌji ja nya bʊʊtǝm a mʊgɔ Kiristi Yesui, sǝ ja nya dɔtǝm dʊʊlǝn nɨ mɨ dɨtǝm woi.

¹¹ Kɛl nɨ n bɨlǝngǝn sʊwa lɛ gɔ, Na bǝ bʊla dakini jǝbɔ gɨɨ, bǝ yɨ yɨ bǝnɔ gɔ tag.

¹² Na bǝ kʊ nǝlɨ, bǝ maa maa fɔlɔn bǝnɔ gɔ tag. Na bǝ kana nyǝmtǝm gǝnɨ, gǝ tǝgǝn kana kana nyǝmtǝm bǝnɔ.

¹³ Na bǝ ta bɔ swatǝm yaa bǝnɨ, a gǝnɔ mɨsɔ bǝla tatǝm swatǝm yaa gǝnɔ lɛ, jʊ a bwɨɨ mɨsɔ kana dul gǝnɔ lɛ.

Nǝ Maajɨ Nɨ Kwaama A Jǝla Nǝnɨ

¹⁴ Bɛ ń tɨtǝn bʊʊla jim kɛltɨn nɨ lɛ. Bɛ ń mʊrka ji jǝbɔ Kwaama, ka ja maa lɛ gʊbkatǝm a dul kɛltɨn, jʊ a bwɨɨ mɨ nǝn kaa bʊmǝn, gǝ kal nǝb nɨ nyʊwa lɛɨ.

¹⁵ Bɛ ń sʊtǝn kwaan maajɨ, sǝ ń yǝlam nǝ jǝlatǝm a daagɔ Kwaama woi, nǝ maajɨ nɨ mɨ gola nɨ wo nyʊwa gunidul lɛɨ, wʊnɨ mɛla bɨlǝngkɛlɔ lɛ dǝngdǝngɨ.

¹⁶ Bɛ ń tɨ a kʊta kʊtaɨ a sʊwalatǝm kɛl nɨ bɛ lɛ nǝn kaltǝm kɛl Kwaamaɨ. Gǝ dǝg dǝg nǝbɔ a sʊtǝn maatǝm kanjǝl nɨ mɨ dʊʊl Kwaama lɛɨ.

¹⁷ Kɛl jinɔ gǝ kwɨya kwɨya na jʌntʌlo. A kʊm jinɔ gǝm, nǝn Himinayas jǝbɔ Filitas,

¹⁸ nǝbɔ a tangǝm a gul bɨlǝngkɛlɨ. Jǝ sʊwa lɛ gɔ guntǝmɔ a bwaaɨ a kwɛl a shu shui. Jǝ kal nǝtǝm bɨlǝngkɛl kaamɨ lɛ.

¹⁹ Fʌlʌm kan nyan mɔtǝm a Kwaamaɨ a ta tʌgo gwanggwang. Mɛl nɨ a bʊtɔ gǝnɨ sʊwa lɛ gɔ, “Tɛlalɔ a nyǝm nǝbam gǝnɔ,” jǝbɔ, “Pʌd nʊ nɨ a nʊng jǝlatǝm nǝn dun Tɛlalɔɨ, bɛ a bǝla maatǝm shilɔ wo.”

²⁰ A mʊgɔ lɔng dʊʊn, kanjǝl maatǝm maajɨgɔ ke bɔ a mʊn jǝbɔ a maalʊ kwaaji woi, a tɨyagɔ jǝbɔ a boligɔ wo. Kaamɨ na maatǝm maajɨ nyan. Kaamɨ ke bɔ na maatǝm maajɨ nyan.

²¹ Nʊ nɨ a saalǝm dul gǝnɔ a kanjǝl nɨ kal gǝn nɛɨ, yǝlam yǝlam nǝ maajɨ nyan, nǝ sagsag, nʊ nɨ Tɛlalɔ maa maajɨ lɛ nǝn gɨɨ, a fɛka sǝ a maa maajɨ nyan gwamɨ.

²² Bɛ ń mwal swɨtǝm kanjǝl dǝlatǝm nu a lɔ bwayǝlɨ. Saa maajɨ nɨ dǝngdǝngɨ, jǝbɔ nǝtǝm bɨlǝngkɛlɔ, jǝbɔ swɨkanɔ, jǝbɔ yɨm kwamɨgǝn. Bɛ ń maa nyɔ mɔ jǝbɔ nǝb nɨ jo Tɛlalɔ lɛ nǝn nǝl sagsagɨɨ.

²³ Bɛ ń kɔ gʊbkatǝm kɛlɔ nǝn kwanɨ. Gǝ bɛ bɛ nǝn bwaalɨ.

²⁴ Bwɛ jwaalɛ Tɛlalɔɨ mɨsɔ yǝlam nǝ saatǝm kɨlan nɛ. Bɛ a yǝlam nǝ maatǝm jǝ nya a daagɔ nǝbɔ woi, jǝbɔ nʊ nɨ a nyǝm mɛlalɨɨ, jǝbɔ nǝ kʊtǝm nǝl,

²⁵ jǝbɔ nʊ nɨ dǝg nǝb kɔtǝm mɛlalɨ gǝnɔ lɛ a golaɨ. Kɛna Kwaama nǝ ji gola lɛ ja yǝla ja bǝla bwɨlangkɛl jinɔ, ja nyǝm bɨlǝngkɛlɨ.

²⁶ Na a bwɨ nyɨɨ, jǝ yǝla jǝ bɛ bɛ a bʊʊlalɨ jinɔ gǝm. Jǝ jel jel a lan Mammɨ nɨ a ta jii, wʊnɨ a dǝg ji ja bwangtǝn jʊ gǝ swɨ lɛɨ.