2 Timoti 1 - Dadiya NT

Yaltǝm

¹ Nǝmǝ mǝ Bulus bwɛ twama Kiristi Yesui nǝn jǝlatǝm Kwaamaɨ, sǝ n sʊwa swatǝm yaa kʊlɨ nɨ a mʊgɔ Kiristi Yesui.

² A yɔ nǝn a daagɔ Timotii, bʊla mɨ nɨ mǝ swɨ lɛɨ. Bɛ lǝmagɔ jǝbɔ bʊnatǝmɔ jǝbɔ yɨm kwamɨgǝnɔ a daa Kwaama Tɛtɛ woi jǝbɔ a Kiristii Yesu Tɛlalɔ bǝn, a ta tʌgo gwanggwang a daa mʊ woi.

Ka Ń Nyʊwa Lɛ Gunidul

³ N buu Kwaama gǝm kang, nʊ nɨ mǝ maa gǝm maajɨ lɛ a mʊgɔ nǝl nɨ mɨ komtǝm woi, kanga tʊgam tʊgalam mǝndɨ a maaɨ. N buu Kwaama gǝm kang, kwama nɨ gwam mǝ bʊʊla lɛ nǝn mɔ a mʊgɔ kelii, kum jǝbɔ kɔkɔ.

⁴ Na nǝn kwama mǝ bʊʊla nǝn mwɛ num mʊnɨ, mǝ ya nǝl kuwotǝm mʊnɔ lɛ, sǝ n maa fulotǝm nǝl nyangǝn.

⁵ N bʊʊla nǝn nǝtǝm bɨlǝngkɛl nyan mʊnɔ, wʊnɨ nǝn tɨkǝga nʊga mɔ Loyis jǝbɔ nɛnɛ mɔ Afiniki jǝ nǝnɨ. Mɨ nyǝmatǝm wo, nǝtǝm bɨlǝngkɛl gɔ, gǝ na jǝbɔ mɔ.

⁶ N jʊ a bwɨ mǝ swɨ lɛ n bʊʊla mʊnɨ, bɛ ń fɛ ń maa maajɨ nǝn lǝma nɨ mʊ nǝnɨ, wʊnɨ Kwaama a nǝ ńɨ, nǝn kwama mǝ ya mʊn kang bwilii.

⁷ Kwaama a nǝ bǝn bɔ nǝl taal. A nǝ bǝn nǝl kwaan, jǝbɔ nǝl swɨkan jǝbɔ nǝl tatǝm dul.

⁸ A dul kɛl nɨɨ, ka ń nyʊwa lɛ gunidul nǝtǝm nyiyo a dul Tɛlalɔ bǝnɨ. Ka ń nyʊwa lɛ gunidul mǝndɨ, mǝ nɨ ja bwa ɨ bwa ɨɨ a lɔsomi a kɛl dul gǝnɨ. Bɛ ń mʊrka dul jǝbɔ mǝ a nɔɔtǝm gaalan a dul fulon kɛl lǝmɨ nɨ, a gola kwaan Kwaamaɨ.

⁹ Nʊ nɨ a bʊʊ nǝn bǝn, a jo bǝn sǝ bǝ yǝlam nǝb sagsagɨ, ke bɔ a dul maajɨ nya nɨ bǝ maaɨ, n fɛkalɨ gǝn jǝbɔ lǝma gǝnɔ a maa bǝmɨ, lǝma nɨ a nǝ bǝn a mʊgɔ Kiristi Yesui na lǝga bɔ ja fwal yooligɔ.

¹⁰ Lǝma nɨ, Kwaama a nʊng bǝn kǝngkɔ a gola bɛtǝm Nǝbʊʊlɨ bǝnɔ Kiristi Yesui, a kalǝm bwaagɨɨ, a nʊng kʊlɨ nɨ mɨ dɨtǝm woi a gola kiyotǝm fulon kɛl lǝmɨ nɨɨ.

¹¹ N kɛl dul fulon kɛl lǝmɨ nɨ Kwaama a dǝg ɨ mǝ yǝlam nǝ kiyotǝm kɛl Kwaamaɨ, jǝbɔ bwɛ twama, jǝbɔ nǝ mɛlalɨɨ.

¹² N dul kɛl nɨ mǝ nɔɔm gaalan kanga mǝ nɔɔm lɛ kǝngkɨɨ. Jʊ nɨ mǝ nyʊwa bɔ gunidul, jʊ a bwɨɨ, n nyǝm nʊ nɨ mǝ nǝ bɨlǝngkɛl a daa gǝ woi. Mɨ nyǝmatǝm wo dwal dwal a tɔɔ jʊ nɨ a nɨ ɨɨ, a yɔ nǝn a kɔkɔ bɛtǝm gǝn.

¹³ Bɛ ń maa mɛlalɨ nǝn kɛl nyan nɨ mʊ nyʊwa a daa mǝ woi. Bɛ ń yɨ a mʊgɔ nǝtǝm bɨlǝngkɛl, jǝbɔ swɨkan a mʊgɔ Kiristi Yesui.

¹⁴ Jǝ bʊmɨ nɨ Kwaama a nǝ ńɨ, bɛ ń tɔɔ gǝn a gola tɨkalɨ Yʊwa Kwaamaɨ, a wʊnɨ yǝm a mʊgɔ nǝl bǝnɨ.

¹⁵ Ń nyǝm nyɔ, pʌd nǝbɔ a tǝm Asiyaɨ ja yǝla mɨ gul, Fijalas jǝbɔ Harmajanas wo a kʊm jin.

¹⁶ Bɛ Tɛlalɔ a ji bʊnǝn nǝbɔ lɔ Onisifarasɨ, jʊ a bwɨɨ, naagɔ a gǝlala kʊʊ mɨ nǝl lɛ dangǝn, a nyʊwa bɔ gunidul bwatǝmɔ ja maa mɨ a lɔsomii.

¹⁷ Nǝn kwama a bɛ a tuulɔ Romaɨ, a saa ɨ nǝn bɨlǝngǝn a nya ɨ.

¹⁸ Bɛ Tɛlalɔ a ji bʊnǝn gǝnɔ nǝn kɔkɔ bɛtǝm gǝnɔ! Ń kwɛl ń nyǝm nyǝmɨ bwɨ tɨkalɨ nɨ a maa a Afisaɨ.