2 Korinti 7 - Dadiya NT

¹ Jǝ́ nǝbɔ mǝ swɨ lɛɨ, Kwaama a kwɛl a maa bǝm swatǝm yaatɨn. Na gǝ na nyɨɨ, bɛ bǝ saalǝm dul bǝnɔ a kanjǝl nɨ dǝg bʊtɔ bǝnɔ lɛ jǝbɔ nǝl bǝnɔ a dutoi. Bɛ bǝ yɨ yɨm sagsag dangǝn a gola nǝtǝm Kwaamaɨ dʊʊn.

Fulotǝm Nǝl Bulusi

² Jǝ́ wum nǝm nǝl jenɔ. Nǝn maa bɔ kaa nǝl gǝm jʊ nɨ a bʊm bɨɨ. Nǝ kal bɔ kaa nǝl. Nǝ ja bɔ kaa nǝl gǝm jǝl.

³ Mǝ sʊwa bɔ jʊ nɨ sǝ n kal jen. N kwɛl n sʊwa jen sʊwaɨ mǝʊ, nǝn ya jen a nǝl nǝn, na n bwaaɨ, na n yɨm nǝn kʊlɨɨ mɨsɔ wʊlaka bǝn nɛ.

⁴ N jǝla nǝn jen dangǝn. Mǝ maa lɨyal lɛ nǝn jen dangǝn. Jǝ́ kʊʊ mɨ nǝl lɛ dangǝn. A mʊgɔ gaalan nǝnɔ gǝm gwam, mǝ maa fulotǝm nǝl lɛ dangǝn.

⁵ Nǝn kwama nɨ nǝn bɛm a tǝm Makidoniyaɨ, bʊtɔ nǝnɔ a nya bɔ fǝbtǝm. Jǝ nǝ nǝn gaalan nɛ a golantɨnɔ gǝm gwam. A yooli, kutʌmɔ wo, a mʊgɔ nǝl nǝn, taalɔ wo.

⁶ Kwaama nɨ kʊʊ nǝl nǝb nɨ lɛ mɨ nǝn kʊʊtǝm nǝlɨ, a kʊʊ nǝm nǝl nǝn bɛtǝm Titusi.

⁷ Ke bɔ bɛtǝm Titusi kwaagɔ. Nǝ nya kʊʊtǝm nǝl a kʊʊtǝm nǝl nɨ a nya a daa jen woi. Kanga a sʊwa nǝn gɔ jǝ́ swɨ kuwotǝm mǝndɨ lɛɨ, kanga jǝ́ maa fitǝm nǝl nǝn jʊ nɨ a bwɨɨ, jǝ́ maa jǝlatǝm lɛ jǝbɔ bwatǝm guu nɨ jǝ́ maa mɨ lɛɨ, n sʊtǝn fulotǝm nǝl dangǝn.

⁸ Na n kal jem nǝl nǝn langǝn bwangǝn nɨ mǝ mʊla jem nǝn tɨkǝgaɨ, mǝ maa bɔ fitǝm nǝl kǝngkɔ. N maa fitǝm nǝl nǝn tɨkǝga dangǝn. Jʊ a bwɨɨ n kuwo langǝn bwangǝn nɨ a kal jem nǝl, a kǝlɨ kwama nǝn dǝm nyɔ.

⁹ A kǝngkɔ mǝ maa fulotǝm nǝl lɛ. Ke bɔ kaltǝm nǝlɔ jǝ́ maa kwaagɨɨ, kaltǝm nǝl jenɔ a dǝg jen jǝ́ yǝla jǝ́ bǝla bwɨlangkɛl jenɔ. Jǝ́ maa kaltǝm nǝl nɨ Kwaama swɨ lɛɨ. Jǝ́ lɛ bɔ kaa jǝl a kɛl dul nǝn.

¹⁰ Nǝn gɔ kaltǝm nǝlɔ Kwaama swɨ lɛɨ. Gǝ dǝg nǝl a yǝla a bǝla bwɨlangkɛlɨ gǝnɔ. Gǝ bɛ nǝn nyatǝm bʊʊtǝm, mɨsɔ bɛ lɛ nǝn, “Na n nyǝmɨ.” Kaltǝm nǝl yooli nɨ, gǝ bɛ nǝn bwaa.

¹¹ Bɛ jǝ́ dʌng kaltǝm nǝl nɨ Kwaama a dǝg a mʊgɔ nǝl jeni, a maa jemi. Jǝ́ swɨ lɛ jǝ́ maa jʊ nɨ dǝngdǝngɨ. Jǝ́ swɨ lɛ jǝ́ nʊng jǝ́ maa bɔ bwɨlangkɛl. Jǝ́ nyʊwa nabwɨl a bwɨlangkɛlɔ ga maaɨ. Jǝ́ ta kang a nyiyo a jʊ ga maaɨ. Jǝ́ swɨ lɛ jǝ́ kuwo nǝn. Jǝ́ swɨ lɛ jǝ́ maa jʊ mǝ sʊwa jeni. Jǝ́ mwɛ nǝb bwɨlangkɛlɔ dangǝn. A golantɨn nɨ, jǝ́ nʊng mɨ jen nǝn bwɨlangkɛl.

¹² Mʊlatǝm langǝn bwangǝn nɨ mǝ maa jemi, mɨ a dul nʊ nɨ a maa bwɨlangkɛlɨ, mɨ a dul nʊ nɨ jǝ́ maa gǝmɨ. Mǝ mʊla jem sǝ ja nʊng jen a kǝga Kwaamaɨ jǝ́ dʌng nǝn dangǝn.

¹³ Nǝn nya kʊʊtǝm nǝl a dul jʊ nɨ. A sʊtǝn a kʊʊtǝm nǝl nǝnɔ gǝmɨ, nǝ nyʊwa lǝma dangǝn kanga nǝ kuwo Titus a mʊgɔ fulotǝm nǝl a yotǝm nɨ jǝ́ maa gǝmɨ, jǝ́ dǝg nǝl gǝnɔ a daaɨ.

¹⁴ N sʊwa gǝn mǝʊ mǝ maa lɨyal lɛ nǝn jen. Mǝ nyʊwa bɔ gunidul. Kanga kanjǝl nɨ nǝ sʊwa jen gwamɨ n bɨlǝngkɛlɨ, maatǝm lɨyal nǝnɔ nǝn jen a nu Titusi a nʊng n bɨlǝngkɛl tǝgǝn.

¹⁵ Swɨtǝm gǝnɔ a daa jen woi a laa a galɨgɔ, nǝn kwama nɨ a dɔ bʊʊlatǝm nǝn bwangtǝmɔ jǝ́ maa gǝm gwamɨ, jǝ́ yo gǝn nǝn nǝtǝm dʊʊnɨ.

¹⁶ Mǝ maa fulotǝm nǝl lɛ, jʊ a bwɨɨ n jǝla nǝn jen dangǝn.