2 Korinti 3 - Dadiya NT

Nǝb Maajɨ Swatǝm Yaa Fɨgɔ

¹ Nǝn tǝl wanatǝm dul nǝn tag ka? Nǝn nǝ jen langǝn bwangǝn wanatǝm ka? Nǝn saa langǝn bwangǝn wanatǝm a daa jen woi kanga kaamɨ maam lɛɨ ka?

² Jen nǝn dul jen nǝjen jǝ́ langǝn bwangǝn wanatǝm nǝnɨ, wʊnɨ ja mʊla a nǝl nǝnɨ, sǝ nǝbɔ gwam a nyǝm, ja kiyo.

³ Jen, jǝ́ nʊng jǝ́ langǝn bwangǝnɔ a jel a daa Kiristi woi a gola maajɨ nǝn. Langǝn bwangǝn nɨ ke bɔ mʊlatǝm mwɛ. Ja mʊla nǝn Yʊwa Kwaama kʊlɨɨ. Ja mʊla bɔ a jǝ mʊlalɨ tɛl. Ja mʊla a mʊgɔ nǝl nǝbɨɨ.

⁴ Mɨ nyǝmatǝm wo a kanjǝl nɨ gǝm nǝn sʊwaɨ a gola Kiristii a kǝga Kwaamaɨ.

⁵ Ke bɔ nǝn nǝn dul nǝn, nǝn sʊwa lɛ gɔ nǝn maa kaa jǝlɨ. Kwaan nǝnɔ a bɛ daagɔ Kwaama woi.

⁶ Nǝn gɔ a nǝ nǝn kwaan nǝn yǝlam nǝb maajɨ swatǝm yaa fɨgɨɨ, wʊnɨ a bɛ a daagɔ Yʊwa Kwaamaɨ woi, ke bɔ a mʊlalɨ diil. Jʊ a bwɨɨ mʊlalɨ diilɔ gǝ bɛ nǝn jʌtǝm. Yʊwagɔ gǝ bɛ nǝn kʊlɨ.

⁷ Ja mʊla diil Musaɨ a tɛl, wʊnɨ dɨltǝm gǝnɔ n bwaaɨ. Dʊʊlǝn Kwaamaɨ a nʊng kwama jǝ nǝm gǝn nɛɨ, nǝbɔ Israilaɨ a mwɨ bɔ a dʌng kǝga Musaɨ a betatǝm gǝnɔ gǝm, n wɔ n nʊ nɨ dumo lɛɨ.

⁸ Mɨsɔ maajɨ nǝtǝm lǝma Yʊwagɔ laa dʊʊlǝn nɛ ka?

⁹ Na maajɨ swatǝm yaa galɨ nɨ a bɛ nǝn mwɛlɨ n jǝ dʊʊlǝnɨ, maajɨ swatǝm yaa fɨ nɨ bɛ lɛ nǝn dǝngdǝng Kwaamaɨ a laa dʊʊlǝn dangǝn!

¹⁰ Bɨlǝngǝn, dʊʊlǝn swatǝm yaa galɨgɔ mɨ a nyiyo jǝl kǝngkɔ, na ja mʊrka gǝn jǝbɔ bʊmǝn dʊʊlǝn swatǝm yaa fɨgɨɨ.

¹¹ Na swatǝm yaa galɨ nɨ n jǝ dumotǝmɨ ja do gǝn n jǝ dʊʊlǝnɨ, dʊʊlǝn swatǝm yaa fɨ nɨ mɨsɔ dɨ lɛ woi, a laa dʊʊlǝn!

¹² Yatǝm nǝl nǝnɔ a jʊ nɨ gǝmɨ, n jʊ kʊʊ nǝm nǝl lɛ dangǝnɨ.

¹³ Nǝn na bɔ na Musa, wʊnɨ a sɔm kǝga gǝnɔ nǝn dwang kwabtǝmɨ, kage nǝbɔ Israilaɨ a kuwo dʊʊlǝn nɨ dumo lɛɨ.

¹⁴ Bʊʊlalɨ jinɔ a nʊng ji bɔ. A bɛ nǝn a kǝngkɨɨ, na jǝ kiyo kɛl swatǝm yaa galɨgɔ lɛɨ mɨ jǝ wumʌm dwang kwabtǝm nɨ lɛ, jʊ a bwɨɨ mɨsɔ jǝ wumʌm dwang kwabtǝm nɨ lɛ, na ke bɔ a gola Kiristii.

¹⁵ N bɨlǝngkɛl, jʊ ba la nǝn kwama dwiyeni, na nǝn kwama jǝ kiyom langǝn bwangǝntɨn Musaɨ lɛɨ, dwang kwabtǝm nɨ sumʌm nǝl jinɔ lɛ.

¹⁶ Na nǝl a yǝla a daagɔ Tɛlalɔ woi, jǝ wumʌm gǝm wumʌm dwang kwabtǝm nɨ.

¹⁷ Tɛlalɔ nǝn gɔ n Yʊwaɨ. A daa nɨ Yʊwa Tɛlalɔɨ woi, n daa nyatǝm yɨm dul woi.

¹⁸ Gwam bǝnɔ kǝga bǝnɔ mɨ dwang kwabtǝm wo, bǝ nʊng dʊʊlǝn Tɛlalɔɨ maa na bwaalaɨ, ja fʌto bǝn bǝ do jelkalǝng gǝnɔ lɛ a dʊʊlǝn nɨ a sʊ sʊɨ. Tɛlalɔ nɨ n Yʊwaɨ, nǝn gɔ a maa maajɨ nɨɨ.