2 Korinti 13 - Dadiya NT

Gʊtǝm Lɔl Jǝbɔ Yaltǝm

¹ Wʊnɨ nǝn gɔ yǝlam yɔtǝm mǝndɨ na taalɔ lɛ a daa jen woi. “Nǝtǝm nyiyo nyanɔ bɛ ja nyʊwa a nyiyo nǝb nǝtǝm nyiyo yo, na mɨ nyɨɨ taal.”

² Kwama mǝ dakini nǝbɔ jeni, n gʊ lɔl nǝb nɨ a maa bwɨlangkɛl galɨgǝnɨ jǝbɔ tangǝnɔ gwam. A kǝngkɔ mɨ mǝ woi, mǝ gʊ jim lɔl lɛ, kanga mǝ maa a yɔm mǝndɨ gǝm na yogɨɨ, mǝʊ na n yǝla n yɔɨ, mɨsɔ mǝ maa jim gaan nɛ.

³ Na jǝ́ swɨ lɛ jǝ́ nyǝm jengɔ n kwaan Kiristii mǝ sʊwa kɛl nɨ lɛ nǝnɨ, bɨlǝngkɛlɔ n wɔ. Kiristi a gɨya bɔ gɨyaɨ a daagɔ jen woi, a nʊng kwaan gǝnɔ a mʊgɔ jen.

⁴ Ja kʊʊ Kiristi sul na nʊ nɨ a gɨya gɨyaɨ, kǝngkɔ nǝngǝn nǝn kʊlɨ nǝn kwaan Kwaamaɨ. Nǝn tǝnǝn nǝn gɨya na gɔ sul, nǝn nǝn kʊlɨ jǝbɔ gɔ a kwaan Kwaamaɨ, dɨsɔ nǝn maa jem maajɨ.

⁵ Jǝ́ tɛl dul jenɔ jǝ́ kuwo, kɛna jǝ́ nǝngǝn nǝn nǝtǝm bɨlǝngkɛlɨ. Ya jǝ́ tɛl dul jenɔ lɛ. Jǝ́ nyǝm bɔ Yesu Kiristi gǝ na a mʊgɔ jeni ka? Na Yesu Kiristi mɨ a mʊgɔ jeni, jǝ́ yal tɛltǝmɔ.

⁶ Mǝ ya nǝl lɛ jǝ́ nyǝm, nǝ yal bɔ tɛltǝmɔ.

⁷ Nǝn kel Kwaama lɛ, ka jǝ́ maa lɛ kaa bwɨlang jǝl. Nǝn maa bɔ keli a dul nǝn, kage a yǝlam maamɔ nǝn ja tɛltǝm nɨ nǝn kwan, nǝn maa keligɔ nyɔ sǝ jǝ́ maa jʊ nɨ dǝngdǝngɨ. A kal bɔ jǝl na nǝbɔ a sʊwa gɔ nǝn yal tɛltǝmɨ.

⁸ Jʊ a bwɨɨ, mɨ gola wo nǝ maa jʊ nɨ a daa bɔ tʌgo a bɨlǝngkɛlɨ, nǝ bwangtǝn gola bɨlǝngkɛl.

⁹ N fulotǝm nǝl nǝ maa lɛɨ na nǝ gɨyaɨ, jen jǝ́ kwam. Keli nǝnɔ bɛ jǝ́ yii dangǝn.

¹⁰ N jʊ a bwɨ mǝ mʊla jem jʊ nɨ nǝn kwama mɨ mǝ dakini nǝbɔ jeni, dɨsɔ na n yǝla n bɛɨ, kage a yǝlam nyɔ n nǝ jen gaalan a dul nʊngtǝm fɔlɔn nɨ Tɛlalɔ a nɨ ɨɨ. Tɛlalɔ a nɨ ɨ fɔlɔn nɨ sǝ n mɔ jen, ke bɔ kʌbtǝm jen.

Dɨltǝm Kɛlɔ

¹¹ A dɨltǝmɔ gǝmɨ, kambɔ, bǝ kuwoka kaa di. Jǝ́ yii nǝl jenɔ dangǝn. Jǝ́ nyʊwa keli mǝndɨ. Jǝ́ yɨ yɨm kwamɨgǝn a bʊtɔ jen. Jǝ́ yɨ nǝn yʌbtǝm nǝl. Kwaama n nǝ nǝtǝm yɨm swɨkan jǝbɔ yʌbtǝm nǝl, yɨ yɨ dakini jǝbɔ jen.

¹² Jǝ́ yalka nǝn kwalkatǝm sagsag.

¹³ Nǝb bwangtǝm Kwaamaɨ gwam tʊng jem yaltǝm lɛ.

¹⁴ Bɛ lǝma Tɛlalɔ Yesu Kiristii, jǝbɔ swɨtǝm Kwaamaɨ, jǝbɔ mʊrkalɨ Yʊwa Kwaamaɨ, a yɨ jǝbɔ jen gwam.