2 Korinti 12 - Dadiya NT

Dʊgam Nyangnyang Bulusi Jǝbɔ Kanjǝl Nʊngtǝm Gǝnɔ

¹ Jǝ́ sɨna mɨ gɔ n maa lɨyal. Lɨyal nɨ a sʊ mɨ bɔ kaa jǝl. Mǝ ja ja kǝga nǝn dʊgam nyangnyang jǝbɔ kanjǝlɔ Tɛlalɔ a nʊng ɨɨ.

² N nyǝm kaa nǝl wo n nǝ bwangtǝm Kiristii. Jolɔ kʊb jeli naal a shui, ja do gǝn ja shu nǝn a dʌbʌl kwama na taal, n daagɔ Kwaama woi. Na gǝ na a mʊgɔ bʊtɔɨ, na mɨ a mʊgɔ bʊtɔɨ, mǝ nyǝm bɔ. Nǝn Kwaama n nǝ nyǝmtǝmɨ.

³ N nyǝm nʊ gɔ ja do gǝn ja shu nǝn a lɔ Kwaamaɨ. Na gǝ na a mʊgɔ bʊtɔɨ, na mɨ a mʊgɔ bʊtɔɨ, mǝ nyǝm bɔ. Nǝn Kwaama n nǝ nyǝmtǝmɨ.

⁴ A nyʊwa kaam kɛltɨn a lɔ Kwaamaɨ, wʊnɨ nǝfitʌmɔ mɨ ji nǝn kwaan sʊwatǝmɨ, wʊnɨ mɨ gola sʊwatǝm woi.

⁵ Mǝ maa maa lɨyal nǝn nʊ nɨ. Mɨ mǝ maa lɨyal lɛ nǝn dul mɨ, na ke bɔ gɨyatǝm mǝndɨ.

⁶ Na mǝ swɨ swɨ maatǝm lɨyalɨ, mɨsɔ mǝ yǝlam lɛ na nǝ fʌmʌn, jʊ a bwɨɨ mǝ sʊwa sʊwa bɨlǝngkɛl. Mɨsɔ mǝ maa lɨyal lɛ, kage kaa nǝl a do i, a laa kanga ga kuwo jʊ mǝ maa lɛɨ, kanga gǝ nyʊwam kɛl mǝndɨ lɛɨ.

⁷ Ja dǝg mɨ kaa bɔɔla kage ya n gung dul lɛ a daltɔ kanjǝl nʊngtǝm nɨ ja maa mɨɨ. Bɔɔla nɨ a yǝlam mɨ na shola a bʊtɔ, wʊnɨ Mammɔ a twam, dɨsɔ ya nɨ ɨ gaalan nɛɨ, kage ya n gung dul lɛ.

⁸ Naa taal mǝ kela Tɛlalɔ lɛ a dul kɛl nɨɨ, sǝ a bǝla ɨɨ.

⁹ Nǝngɔ a sʊwa ɨ gɔ, “Lǝma mǝndɨ a wʊlam mʊn, jʊ a bwɨɨ daa gɨyatǝm mʊnɔ, n daa yiitǝm kwaan mǝndɨ.” Gǝ na nyɔ mǝ maa maa fulotǝm nǝl dangǝn nǝn lɨyal mǝndɨ a gɨyatǝm mǝndɨ gǝm, dɨsɔ kwaan Kiristi a yɨ dakini jǝbɔ mǝ.

¹⁰ N jʊ a bwɨ mǝ maa bǝlátǝm lɛ nǝn gɨyatǝmɔ mǝ nǝngǝnɨ, jǝbɔ tuwolɔ jǝ maa mɨ lɛɨ, jǝbɔ nɔɔtǝm gaalan sɨnatǝmɔ, jǝbɔ gaalantɨnɔ a kɛl dul Kiristii, jʊ a bwɨɨ, a kwama nɨ mǝ gɨya gɨyaɨ, n kwama mǝ nǝn kwaanɨ.

Komtǝm Bulusi A Dul Mʊrkalɨ Nǝb Bwangtǝm Kwaamaɨ A Korintii

¹¹ N maa jǝ fʌmʌn. Nǝjen jǝ́ sɨna mɨɨ. A yǝlam nyɔ nǝjen na jǝ́ buu mɨ kang lɛɨ, jʊ a bwɨɨ mɨ daa nɨ wo mǝ dwal a kʊm daltɔ bɛtɔ twamagɨɨ, mǝ ke bɔ kaa jǝl sul.

¹² Kwaama a maa daltɔ jǝ tatǝm kang a nyiyo jǝbɔ jǝ nʊngtǝm a mʊgɔ jen a gola mɨ. Mǝ maa kanjǝl nɨ nǝn bɨtǝm nǝl. Kanjǝl laatǝm kang nɨ a nʊng mǝ bwɛ twama nǝn bɨlǝngǝn.

¹³ N gola won jǝ́ gɨya a kaam mʊrkalɨ nǝb bwangtǝm Kwaamaɨ? N kɛlɔ mǝ ya jem bɔ jǝ tuuloi ka? Jǝ́ kǝlǝm mɨ bwɨlangkɛl nɨ!

¹⁴ Kǝngkɔ n maa fɛkalɨ yɔtǝm a daa jen woi, yɔtǝm na taal. Mɨsɔ mǝ ya jem tuulo lɛ, jʊ a bwɨɨ n ke bɔ jǝ jen mǝ saa lɛɨ, nǝjen mǝ saa lɛɨ, jʊ a bwɨɨ ke bɔ bɛtɨ gǝ do tuulo tɛtǝlam jinɔ lɛɨ, n tɛb gǝ do tuulo bɛtɨ lɛɨ.

¹⁵ Mǝ jʌ jʌ jǝ kang mǝndɨ gwam, jǝbɔ kumtɨn mǝndɨ gwam, nǝn fulotǝm nǝl a kɛl dul jen. Na n sʊtǝn swɨtǝm jeni, jǝ́ shig shig swɨtǝm mǝndɨ ka?

¹⁶ Tangǝn jenɔ a jǝla gɔ mǝ ya jem bɔ tuulo. Kaam jenɔ bʊʊla lɛ gɔ mǝ maa jem yʊlan, mǝ nɔɔ dul jen a gola swagtǝm!

¹⁷ N bǝm jen a daa kaa nǝl woi, a mʊgɔ nǝb nɨ mǝ twam a daa jen woi ka?

¹⁸ N kela Titus mǝʊ a yɔ. N twam kaa kɨla bǝn dakini jǝbɔ gɔ. Titus a bǝm jen bǝm ka? Bʊʊlalɨ mɨ mɨ win jǝbɔ a gǝnɔ ka? Ke bɔ golagɔ win nǝn bwangtǝn nɛɨ ka?

¹⁹ Jǝ́ maa bʊʊlalɨ jengɔ nǝn bɛ nǝn kɛl sǝ nǝn kʌshi dul nǝnɔ ka? Mɨ nyɔ! A kǝga Kwaamaɨ nǝ sʊwa kɛlɔ lɛɨ, nǝn na a Kiristii. Gwam jʊ nɨ nǝ maa sǝ nǝ sʊ jem kwaan, jǝ́ nǝbɔ nǝ swɨ lɛɨ.

²⁰ Mǝ nyʊwa taal lɛ mǝʊ kage na n yɔɨ, ya n nya jen ke bɔ kanga mǝ swɨ lɛɨ. Jen tʌjen jǝ́ kuwo i n ke bɔ kanga jǝ́ swɨ lɛɨ. Mǝ nyʊwa taal lɛ kage ya n nya gʊbkatǝm, jǝbɔ nungon, jǝbɔ fitǝm nǝl, jǝbɔ swɨtǝm dul, jǝbɔ kabkatǝm naa, jǝbɔ yʊʊlakatǝm, jǝbɔ gungtǝm dul, jǝbɔ kutʌm.

²¹ Mǝ nyʊwa taal lɛ mǝʊ kage na n yǝla n yɔɨ, Kwaama mǝndɨ shig shig dul mǝndɨ a kǝga jen. N maa fitǝm nǝl a dul kaamɨ a lada, wʊnɨ kwama gɔ ja maa bwɨlangkɛl galɨgǝnɨ, ja yǝla bɔ ja bǝla maatǝm bulonɔ, jǝbɔ kanjǝl bwɨlan jinɔ nɨ ja maaɨ.