2 Korinti 11 - Dadiya NT

Bulus Jǝbɔ Bɛtɔ Twama Gabakɛlɔ

¹ N ya nǝl jǝ́ bɨ bɨ nǝl nǝn kǝlɨ fʌmʌn mǝndɨ. Jǝ́ bǝm nǝl nǝn mǝ!

² Mǝ maa nungon nɛ a dul jen kanga Kwaama maa lɛɨ. N fɛka jen na bwɛnɔɔlɨ nɨ naa Kiristi lɛɨ. Mǝ swɨ lɛ n nǝ jen na nɔɔgwaalɨ nɨ sagsag a daa bwɨla gǝ woi kwaagɔ.

³ Mǝ nyʊwa taal lɛ kage a yǝlam kanga sɔɔgɔ a swag Hawau nǝn yʊlan gǝnɨ, kaam nǝbɔ a dǝg jen jǝ́ yǝlam nǝn nǝl jenɔ sagsagɨɨ a daa Kiristi woi, wʊnɨ jǝ́ jǝla jǝ́ bwang gǝm lɛ nǝn nǝl jenɔ gwamɨ.

⁴ Na kaa nǝl a bɛ ba kiyo jem kɛl lɛ a dul kaa Yesu wʊnɨ ke bɔ nʊ nǝn kiyo jemi, na jǝ́ nya kaa yʊwa tag wʊnɨ ke bɔ Yʊwagɔ jǝ́ nyaɨ, na jǝ́ yo kaa fulon kɛl lǝmɨ ke bɔ a wʊnɨ nǝ sʊwa jeni, jǝ́ jǝla nǝn nǝb gǝmɔ dǝbǝr dǝbǝr!

⁵ A kuwotǝm mǝndɨ, mǝ gɨya bɔ wo dǝm a nǝb nɨ jǝ́ jo lɛ gɔ, “daltɔ bɛtɔ twamaɨ.”

⁶ Mǝ nyǝm bɔ sʊwatǝm kɛl sul, nyǝmtǝmɔ mǝ nǝn. Nǝn nʊng jen jʊ nɨ a golantɨnɔ gǝm gwam nǝngɔ nǝn nǝn nyǝmtǝm a dul Kiristii.

⁷ Mǝ shig dul mǝndɨ dɨsɔ ja gung jen. N bwɨlangkɛl ka? Mǝ sʊwa jen fulon kɛl lǝmɨ Kwaamaɨ nǝn kwan. N bwɨlangkɛl ka?

⁸ Kaam mʊrkalɨtɨn nǝb bwangtǝm Kwaamaɨ jǝ ywa ɨ maajɨ mǝndɨ lɛ. A yǝlam maamɔ mǝ yo jim nǝn kwaan, dɨsɔ n maa jem maajɨ.

⁹ Nǝn kwama mǝ a daa jen woi, na jǝl a kom ii, mɨ mǝ bʌ jen nɛ. Mǝ ya jem bɔ tuulo mǝndɨ n saa jǝl a kang jen, jʊ a bwɨɨ kambɔ nɨ a bɛ a Makidoniyaɨ, nǝji jǝ nɨ ɨ jʊ nɨ lɛ a kom ii. N jʊ a bwɨ mǝ ya jem bɔ tuulo a golantɨnɔ gǝmɨ. Mɨsɔ mǝ ya jem tuulo lɛ wo.

¹⁰ N bɨlǝngǝn mǝ sʊwa lɛ a dul Kiristii, mɨ nʊ nɨ wo kaa ɨ lɛ a maatǝm lɨyal a tǝm Akayaɨ.

¹¹ N wɛ a bwɨ mǝ sʊwa nyɨɨ? Mɨ mǝ swɨ jen nɛ ka? Kwaamagɔ a nyǝm mǝ swɨ jen nɛ!

¹² Jʊ mǝ maa lɛɨ, nǝn gɔ ya mǝ maa lɛɨ, dɨsɔ n mǝlǝm gola nǝb nɨ maa lɨyal lɛ gɔ maajɨ nǝnɔ win jǝbɔ a jini.

¹³ Nǝb gɔ n bɛtɔ twama gabakɛl, n nǝb maajɨ swagtǝm. Jǝ yǝla nǝn dul jinɔ maamɔ jǝ bɛtɔ twama Kiristii.

¹⁴ N ke bɔ jǝ tatǝm kang a nyiyo, jʊ a bwɨɨ Mammɔ nǝn kang gǝn gǝ yǝla yǝla nǝn dul gǝnɔ na bwɛ twama Kwaamaɨ nɨ nǝn nyalǝmɨ.

¹⁵ N ke bɔ jǝ tatǝm kang a nyiyo, na bɛtɔ jwaalɛn gǝnɔ yǝla yǝla nǝn dul jinɔ na bɛtɔ jwaalɛb maajɨ dǝngdǝngɨ. A dɨltǝmɔ gǝm jǝ ywa ji ywa maajɨ jinɔ ja maaɨ.

Gaalan Bulusi Na Bwɛ Twama

¹⁶ Mǝ sʊwa jen nɛ tag, ka kaa nǝl ya bʊʊla lɛ gɔ n fʌm fʌmi. Na jǝ́ do jengɔ mǝ na nyɨɨ, jǝ́ yo i na nǝ fʌmʌn, dɨsɔ mǝ tǝmɨ n nya n twɨ lɨyalɔ wo dǝm.

¹⁷ Jʊ nɨ mǝ sʊwa lɛɨ, ke bɔ a diil Tɛlalɔɨ mǝ sʊwa lɛɨ. A gola lɨyal nɨ mǝ maa lɛɨ, mǝ sʊwa kɛlɔ na nǝ fʌmʌni.

¹⁸ Kanga nǝbɔ a lada maa lɨyal lɛ nǝn kanjǝl yooli nɨɨ, mǝ tǝmɨ mǝ maa maa lɨyal.

¹⁹ Jǝ́ kuwo lɛ maamɔ jǝ́ nǝb nyǝmtǝm, jǝ́ nyʊwa lǝma nyʊwatǝm kɛl nǝb nɨ lɛ a fʌm fʌmi!

²⁰ Na kaa nǝl a dǝg jen jwaalɛnɨ, na a yo jǝ jen nǝn kwaanɨ, na a ja jeni, na a nʊng jen gɔ gǝ laɨ, na a jǝga jen a kǝgaɨ, jǝ́ kʊ nǝl.

²¹ Mǝ nyʊwa gunidul lɛ a gɨyatǝm mǝndɨ gǝm. Mɨsɔ mǝ maa nǝbɔ gǝm jʊ nɨ lɛ nyɔ! Na kaa nǝl a maa lɨyal gɔ gǝ kaa jǝlɨ, mǝ tǝmɨ mǝ maa maa nyɔ. A daa nɨ, mǝ sʊwa kɛlɔ na nǝ fʌmʌn!

²² Na jǝ nǝbɔ Ibranei, mǝ tǝmɨ mǝ na nyɔ. Na jǝ nǝbɔ Israilaɨ, mǝ tǝmɨ mǝ na nyɔ. Na jǝ guu Ibrahimi, mǝ tǝmɨ mǝ na nyɔ.

²³ Na jǝ bɛtɔ jwaalɛn Kiristii, n laa ji tag. Mǝ sʊwa kɛlɔ na nǝ wabɨ! N laa ji maatǝm maajɨ dangǝn. A bwatǝmɔ ja bwa ɨɨ, mɨ kiyotǝm wo. Ja bʊg ɨ dangǝn. Mǝ na a nyiyo bwaa kwangkwang.

²⁴ Naagɔ nʊ Yahudawagɔ a tʊm ɨ fʊtǝtaal jeli tʊlkʊb nǝn banjangɨ.

²⁵ Ja bʊg ɨ naagɔ taal nǝn dwam. Naa win ja mala ɨ nǝn tɛl sǝ jǝ jʌ ii. Naagɔ taal tɨyamwɛngɔ a wʊlalaɨ, mǝ na a mʊgɔ gǝn. N daa kum jǝbɔ kɔkɔ a wɨma, mwɛmɔ shu lɛ nǝn mǝ.

²⁶ N yɔ yɔmɔ a lada. N nyʊwa gaalan a tiyotɨn. N nyʊwa gaalan a kang nǝb wultǝmɨ. N nyʊwa gaalan a kang nǝbam nǝnɨ. N nyʊwa gaalan a kang Bʌtʌbi. N nyʊwa gaalan a tuulɔtɨn. N nyʊwa gaalan a yǝla. N nyʊwa gaalan a wɨmatɨn. N nyʊwa gaalan tag a kang kɛtǝlam gabakɛlɔ woi.

²⁷ N nɔɔ gaalan maajɨ dangǝn. Mǝ nya bɔ daatǝm dum. N nɔɔ gaalan jʊwan jǝbɔ laatǝm mwɛ. Naagɔ a laa kwaan mǝ nya bɔ jǝjalǝn. N nyʊwa juul. N yɔ bʊtɔgɔ kwakwa.

²⁸ A bwangtǝn kanjǝl nɨ gwamɨ, kwangkwang mǝ na a bwantǝm a dul mʊrkalɨ nǝb bwangtǝm Kwaamaɨ gwam.

²⁹ Nuwo a gɨya, mǝ nyʊwa bɔ gɨyatǝm gǝnɔ a bʊtɔ mɨɨ? Nuwo ja dǝg gǝn a yal a bwɨlangkɛl, mǝ nyʊwa bɔ nabwɨl jini?

³⁰ Na a yǝlam nyɔ, mǝ maa maa lɨyalɨ, mǝ maa nǝn jʊtǝb nɨ a nʊng gɨyatǝm mǝndɨ.

³¹ Kwaama wʊnɨ nǝn gɔ nǝn Tɛtɛ Tɛlalɔ bǝn Yesui, wʊnɨ bǝlátǝmɔ na a gɔ mɨ dɨtǝm woi, a nyǝm ke bɔ gabakɛl mǝ maa lɛɨ.

³² A Dimaska, gwamna wʊnɨ a tǝm jǝbɔ fɔlɔ Aretisi, a ya nǝb tɔɔtǝm nyanga tuulɔ Dimaskagɔ, dɨsɔ ja ta ɨ.

³³ Nǝngɔ ja ya ɨ a mʊgɔ dalɨ tuni, ja shig i a du kwalɨɨ, nǝngɔ mǝ bʊʊ gǝmɨ.