1 Yohana 5 - Dadiya NT

Nǝtǝm Bɨlǝngkɛlɔ A Ku Jelʌn Yooligɔ

¹ Nʊ nɨ gwam a nǝ bɨlǝngkɛl gɔ Yesu nǝn Kiristii, nǝn bʊla Kwaamaɨ. Gwam nʊ nɨ swɨ Tɛ bwɛ lɛɨ, swɨ bwɛ lɛ.

² N gola nɨ bǝ nyǝm lɛ bǝ swɨ bɛtɔ lɔ Kwaamaɨ lɛɨ: Na bǝ swɨ Kwaama lɛ, bǝ bwangtǝn diil gǝnɔ lɛɨ.

³ Jʊ a bwɨɨ, swɨtǝm Kwaamaɨ n bwangtǝm diil gǝn. Bwangtǝm diil gǝnɔ a bwa bɔ.

⁴ Nʊ nɨ n bʌtʌm Kwaamaɨ, a ku jelʌn yooligɔ. Nǝtǝm bɨlǝngkɛl bǝnɔ nǝn gɔ a dǝg bǝn bǝ ku jelʌn yooligɨɨ.

⁵ Nuwo nyɨ ku jelʌn yooligɔ lɛɨ, na ke bɔ nʊ nɨ a nǝ bɨlǝngkɛl gɔ Yesu nǝn Bʊla Kwaamaɨ?

Nǝtǝm Nyiyo A Dul Bʊla Kwaamaɨ

⁶ Yesu Kiristi a bɛ a yooli nɨ, a bɛ a gola mwɛ jǝbɔ tʊʊm, ke bɔ a gola mwɛ kwaagɔ a bɛɨ, n gola tʊʊm tǝgǝn. Yʊwa Kwaamaɨ nǝn gɔ nǝ nǝtǝm nyiyogɨɨ, jʊ a bwɨɨ Yʊwagɔ nǝn gɔ n bɨlǝngkɛlɨ.

⁷ Kanjǝl nǝtǝm nyiyogɔ wo taal,

⁸ n Yʊwagɔ jǝbɔ mwɛmɔ jǝbɔ tʊʊmɔ. Kanjǝl nɨ taalɨ ja jǝlaka.

⁹ Kanga bǝ jǝla nǝn nǝtǝm nyiyo nǝbɨɨ, bɛ bǝ jǝla nǝn nǝtǝm nyiyo Kwaamaɨ, nǝtǝm nyiyo Kwaamaɨ a laa kwaan. Nǝn gɔ n nǝtǝm nyiyo a kanjǝl nɨ gǝm a dul Bʊla gɨɨ.

¹⁰ Gwam nʊ nɨ a nǝ bɨlǝngkɛl nǝn Bʊla Kwaamaɨ, nǝngǝn nǝn nǝtǝm nyiyo nɨ bɛ lɛ a daagɔ Kwaama woi a nǝl gǝn. Gwam nʊ nɨ a nǝ bɔ bɨlǝngkɛlɨ, a do Kwaama n nǝ gabakɛl, jʊ a bwɨɨ, ga nǝ bɔ bɨlǝngkɛl a nǝtǝm nyiyo Kwaamaɨ a maa Bʊla gɔ gǝmɨ.

¹¹ Wʊnɨ nǝn gɔ nǝtǝm nyiyo gɔ, Kwaama a nǝ bǝn kʊlɨ nɨ mɨ dɨtǝm woi, kʊlɨ nɨ gǝ na a mʊgɔ Bʊla gɨɨ.

¹² Nʊ nɨ nǝn Bwɛɨ, nǝn kʊlɨ. Nʊ nɨ mɨ nǝn Bʊla Kwaamaɨ, mɨ nǝn kʊlɨ.

Nyatǝm Kʊlɨ Nɨ Mɨ Dɨtǝm Woi

¹³ Mǝ mʊla jem jʊ nɨ, jen nɨ jǝ́ nǝ bɨlǝngkɛl nǝn dun Bʊla Kwaamaɨ, sǝ jǝ́ nyǝm jen nǝn kʊlɨ nɨ mɨ dɨtǝm woi.

¹⁴ Bǝ nǝn bɨtǝm nǝl bǝ tɨ a kǝga Kwaamaɨ, jʊ a bwɨɨ, na bǝ kel kanjǝlɔ a swɨtǝm gǝnɨ, gǝ nyʊwa bǝn nyʊwa.

¹⁵ Kanga bǝ nyǝm nyʊwa bǝn nɛ a kanjǝlɔ gwam bǝ kel a daa gǝ woi, bǝ nyǝm bǝ nya nya jʊ nɨ bǝ kel a daa gǝ woi.

¹⁶ Na nǝl a kuwo kɨla gɔ maa bwɨlangkɛl nɨ lɛ a la bɔ bwaaɨ, bɛ ga maa gǝm keli. A kɛl dul nǝ keli nɨ, Kwaama nǝ nǝ kʊlɨ a nǝb nɨ maa bwɨlangkɛl nɨ lɛ a la bɔ bwaaɨ. Kaa bwɨlangkɛlɔ wo nɨ a la na bwaaɨ. Mǝ sʊwa bɔ mǝʊ jǝ́ maa keli a dul gǝn.

¹⁷ Gwam maajɨ bwɨlagɔ n bwɨlangkɛl. Kaa bwɨlangkɛlɔ wo wʊnɨ a la bɔ bwaaɨ.

¹⁸ Bǝ nyǝm nʊ nɨ n bʌtʌm Kwaamaɨ, mɨsɔ ja kǝga lɛ nǝn maatǝm bwɨlangkɛl. Bʊla Kwaamaɨ nǝn gɔ kɨla gǝn nɛɨ. Nǝ bwɨla nɨ mɨsɔ ke gǝn nɛ.

¹⁹ Bǝ nyǝm bǝ bɛtɔ lɔ Kwaamaɨ, bǝ nyǝm tag yooligɔ gwam gǝ na a kang nǝ bwɨla nɨɨ.

²⁰ Bǝ nyǝm Bʊla Kwaamaɨ a bɛ nǝngɔ a nǝ bǝn nyǝmtǝmɨ, sǝ bǝ nyǝm nʊ nɨ nǝn bɨlǝngkɛlɨ. Bǝn bǝ na a mʊgɔ gǝn, gǝ nɨ n nǝ bɨlǝngkɛlɨ, nǝn gɔ nǝn Bʊla gɔ Yesu Kiristii. Nǝn gɔ nǝn Kwaama nǝ bɨlǝngkɛlɨ, jǝbɔ kʊlɨ nɨ mɨ dɨtǝm woi.

²¹ Jǝ́ bɛtɔ dwalǝn mǝndɨ, bɛ jǝ́ tɨ a kʊta kʊtaɨ jǝbɔ shomɔ.