1 Yohana 3 - Dadiya NT

Bɛtɔ Lɔ Kwaamaɨ

¹ Jǝ́ dʌng swɨtǝm nɨ Tɛtɛ a nʊng bǝmɨ. A jo bǝn gɔ bǝ bɛtɔ lɔ Kwaamaɨ, bǝ na nyɔ kǝngkɔ. Nǝb nɨ a yooli nɨɨ a nyǝm bǝn bɔ, jʊ a bwɨɨ ja nyǝm gǝn bɔ.

² Jǝ́ fatǝm nyan mǝndɨ, kǝngkɔ bǝ bɛtɔ lɔ Kwaamaɨ. Kanga bǝ yǝlam lɛ a kǝgaɨ, bǝ nyǝm bɔ dɨn. Bǝ nyǝm na a bɛɨ, bǝ yǝlam na gɔ, jʊ a bwɨɨ bǝ kuwo gǝn kuwo nyangnyang.

³ Gwam nʊ nɨ a ya nǝl a daa gǝ woi, a saalǝm dul gǝnɔ a yǝlam sagsag, kanga gǝ sagsagɨ.

⁴ Gwam nʊ nɨ maa bwɨlangkɛl lɛɨ gǝ kǝl diil. Maatǝm bwɨlangkɛlɔ n kǝltǝm diil.

⁵ Jǝ́ nyǝm Yesu a bɛ sǝ a dem bwɨlangkɛltɨn bǝnɔ. A daa gǝ woi mɨ nǝn bwɨlangkɛl.

⁶ Nʊ nɨ yǝm a mʊgɔ gǝnɨ, mɨ maa bwɨlangkɛl lɛ. Mɨ nʊ nɨ wo a ja kǝga nǝn maatǝm bwɨlangkɛl a kuwo gǝn woi, a nyǝm gǝnɨ.

⁷ Jǝ́ bɛtɔ dwalǝnɔ, ka kaa nǝl ya swag jen nɛ. Nʊ nɨ maa jǝ dǝngdǝng lɛɨ, n nǝ dǝngdǝng, kanga Kiristi n nǝ dǝngdǝngɨ.

⁸ Nʊ nɨ gwam maa bwɨlangkɛl lɛɨ, na a mammɨ. Jʊ a bwɨɨ, nǝn tɨkǝga mammɔ n nǝ maatǝm bwɨlangkɛl. Jʊ a bwɨ Bʊla Kwaamaɨ a bɛ sǝ a kalǝm maajɨ mammɨ.

⁹ Nʊ nɨ gwam n bʌtʌm Kwaamaɨ, mɨsɔ ja kǝga lɛ nǝn maatǝm bwɨlangkɛl, jʊ a bwɨɨ, kʊlɨ Kwaamaɨ yǝm a mʊgɔ gǝn. Mɨsɔ dwal lɛ a ja kǝga nǝn maatǝm bwɨlangkɛl, jʊ a bwɨɨ gɔ n bʌtʌm Kwaamaɨ.

¹⁰ Jʊ jǝ nyǝm bɛtɔ lɔ Kwaamaɨ lɛ nǝnɨ jǝbɔ bɛtɔ lɔ mammɨ nǝn gɔ, nʊ nɨ a maa bɔ jǝ dǝngdǝngɨ, ke bɔ a Kwaamaɨ, gǝ na nyɔ a nʊ nɨ mɨ swɨ kɨla gǝ lɛɨ.

Jǝ́ Maa Swɨkatǝm

¹¹ Wʊnɨ nǝn gɔ kɛlɔ jǝ́ nyʊwa nǝn tɨkǝgaɨ gɔ, bɛ bǝ swɨka.

¹² Ka bǝ yǝlam lɛ na Kayinu, nʊ nɨ a yǝlam a mammɨ, a jʌ kɨla gɨɨ. N wɛ a bwɨ a jʌ gǝnɨ? N kɛl dul maajɨ gǝnɔ wʊnɨ na a bwɨlaɨ, a kɨla gɨɨ n maajɨ dǝngdǝngɨ.

¹³ Kɛtǝlam mɨ, ka jǝ́ ta lɛ kang a nyiyo na yooligɔ a kɔ jeni.

¹⁴ A bǝnɔ bǝ nyǝm bǝ kwɛl bǝ bʊʊ bwaagɔ gǝm, bǝ nya kʊlɨgɔ, jʊ a bwɨɨ bǝ swɨ kɛtǝlam bǝnɔ lɛ. Nʊ nɨ mɨ maa yɨm swɨkan nɛɨ, n yɨm bwaa yɨmɨ.

¹⁵ Gwam nʊ nɨ kɔ kɨla gǝ lɛɨ, n nǝ jʌtǝm dul. Jǝ́ nyǝm mɨ nʊ nɨ wo jʌ dul lɛɨ nya kʊlɨ nɨ lɛ mɨ dɨtǝm woi.

¹⁶ Wʊnɨ n kanga bǝ nyǝm swɨtǝmɔ lɛɨ, a nǝtǝm kʊlɨ gǝnɔ a nǝ a kɛl dul bǝnɨ. Bǝn tǝbǝn bɛ bǝ nǝ kʊlɨ bǝnɔ a kɛl dul kɛtǝlam bǝnɨ.

¹⁷ Gwam nʊ nɨ nǝn jǝ kang a yooli nɨɨ, kuwo kɨla gɔ lɛ nǝn bʊnǝn, a mam nu a dul gǝnɨ, la swɨtǝm Kwaamaɨ na nyǝn a nǝl gǝn?

¹⁸ Jǝ́ bɛtɔ dwalǝnɔ, ka jǝ́ nʊng lɛ swɨtǝm a ben. Bɛ a yǝlam a maatǝm jǝbɔ bɨlǝngkɛl.

Jǝlatǝm A Kǝga Kwaamaɨ

¹⁹ Na bǝ swɨka lɛɨ, n daa bǝ nyǝm lɛ bǝ na a bɨlǝngkɛlɨ, bǝ tɨ tɨ a kǝga Kwaamaɨ nǝn kwaan bʊtɔ.

²⁰ Kwama nɨ nǝl bǝnɔ a nʊng bǝn gɔ bǝ nǝb bwɨlangkɛlɨ, Kwaamagɔ a laa nǝl bǝnɔ. A nyǝm kanjǝlɔ gwam.

²¹ Jǝ́ fatǝm nyan mǝndɨ, na nǝl bǝnɔ a nʊng bǝn bɔ gɔ bǝ nǝb bwɨlangkɛlɨ, bǝ nǝngǝn nǝn kwaan bʊtɔ nɨ bǝ tɨ lɛ a kǝga Kwaamaɨ.

²² Bǝ nya nya jʊ gwam bǝ kela a daa gǝ woi, jʊ a bwɨɨ, bǝ bwangtǝn diil gǝnɔ lɛ, bǝ maa jʊ lɛ gǝ swɨ lɛɨ.

²³ Diil gǝnɔ gɔ, bǝ nǝ bɨlǝngkɛl a mʊgɔ dun bʊla gɔ Yesu Kiristii, bǝ swɨka kanga a sʊwa bǝnɨ.

²⁴ Nǝb nɨ gwam bwangtǝn diil Kwaamaɨ lɛɨ, yǝm a mʊgɔ gǝn, gǝ tǝgǝn yǝm a mʊgɔ ji. Bǝ nyǝm bǝngɔ gɔ yǝm a mʊgɔ bǝn, jʊ a bwɨɨ a nǝ bǝn Yʊwa gǝnɔ.