1 Yohana 1 - Dadiya NT

Kɛl Kʊlɨgɔ

¹ Gǝ nɨ wo a tǝltǝmɨ, nʊ nɨ bǝ nyʊwa gǝnɨ, bǝ kuwo gǝn nǝn nu bǝnɨ, bǝ dʌng, kang bǝnɔ a ke tagɨ, n kɛl kʊlɨ nɨɨ nǝn sʊwa jen nɛɨ.

² Kʊlɨ nɨ Kwaama a nʊngɨ, nǝn kuwo. Nǝn gɔ nǝn nǝ nyiyo lɛɨ, nǝn sʊwa jen kʊlɨ nɨ mɨ dɨtǝm woi, wʊnɨ dakini jǝbɔ Tɛtɛɨ, ja nʊng gǝn a daa nǝn woi.

³ Nǝn sʊwa jen tʌjen jʊ nǝn kuwoi, nǝn nyʊwaɨ, sǝ jǝ́ yɨ yɨm dakini jǝbɔ nǝn. Yɨm bǝnɔ dakinii, gǝ na jǝbɔ Tɛtɛ jǝbɔ bʊla gɔ Yesu Kiristi.

⁴ Nǝn mʊla jem jʊ nɨ dɨsɔ fulotǝm nǝl nǝnɔ a yii dǝngdǝng.

Kwaama N Nyalǝm

⁵ Kɛlɔ wɔ nǝn nyʊwa a daa gǝ woi, nǝn sʊwa jen nǝngɔ Kwaama n nyalǝm, mɨ kumtojili wo a daa gǝ woi.

⁶ Na bǝ sʊwa bǝngɔ bǝ yɨ yɨm dakini lɛ jǝbɔ Kwaamaɨ, la bǝ yǝm a kumtojilii, bǝ maa gabakɛl, mɨ bǝn nǝn bɨlǝngkɛl.

⁷ A na nyɔ, na bǝ yǝm a mʊgɔ nyalǝmɨ, kanga gǝ yǝm a mʊgɔ nyalǝmɨ, yɨm bǝnɔ n dǝngdǝng a bʊtɔ. Tʊʊm Yesu Bʊla gɨɨ a saalǝm bǝn a bwɨlangkɛl bǝnɔ gǝm gwam.

⁸ Na bǝ sʊwa bǝngɔ mɨ bǝn nǝn bwɨlangkɛlɨ, n dul bǝn bǝ swag lɛɨ. Bɨlǝngkɛlɔ mɨ dakini jǝbɔ bǝn.

⁹ Na bǝ sʊwa bwɨlangkɛl bǝnɨ, gɔ, n nǝ yiitǝm swatǝm yaa, n nǝ dǝngdǝng, kǝlǝm bǝm kǝlǝm bwɨlangkɛl bǝnɔ, sǝ a saalǝm bǝn a jʊ nɨ bǝ maa lɛ gwam n ke bɔ dǝngdǝngɨ.

¹⁰ Na bǝ sʊwa bǝngɔ bǝ maa bɔ bwɨlangkɛlɨ, bǝ kǝl gǝm gabakɛl. Kɛl gǝnɔ mɨ a nǝl bǝn.