1 Timoti 5 - Dadiya NT

Nʊngtǝm Gola A Dul Nɔɔtǝmkʊlab, Jǝbɔ Dʊʊmɔ, Jǝbɔ Jwaalɛbɔ

¹ Bɛ ka ń ga lɛ nǝ dʊʊ gǝm wulong. Bɛ ń sʊwa gǝn kɛlɔ na nʊ a bʌ ńi. Bayǝlǝmɔ bɛ ń do ji na kɛtǝlam mʊn.

² Nɔɔtǝm dʊʊmɔ bɛ ń do ji na nɛtǝlam mʊn, bɛtǝnɔɔtǝnɔ na kɛtǝlam mʊn nǝn nǝl sagsag.

³ Bɛ ń nǝ nɔɔtǝmkʊlabɔ dʊʊn, nǝb nɨ mɨ nǝn nǝb tɨkalɨ.

⁴ Na kaa nɔɔkʊla nǝn bɛtɨ, nǝn tʊgamɨ, bɛ bɛtɨ jǝbɔ tʊgamɔ ja mɛla, ja tǝl nʊngtǝm bwangtǝm Kwaamaɨ nɨ jǝ maa lɛɨ a mʊgɔ lɔ ji. Bɛ ja dʌng nʊ nɨ a bʌ ji, maatǝm jǝ nya nɨ n jǝ yotǝm a daa Kwaama woi.

⁵ Nɔɔkʊla nɨ mɨ nǝn nǝ tɨkalɨ, wʊnɨ yǝm kwaagɔ wini, ga ya nǝl gǝnɔ a daagɔ Kwaama woi, ga ta keli Kwaamaɨ, ga maa keli kum jǝbɔ kɔkɔ sǝ Kwaama a tɨka gǝn.

⁶ Nɔɔkʊla nɨ nyʊwa lǝma yɨm dul gǝn nɛɨ, win jǝbɔ nʊ nɨ a bʊla bʊlaɨ.

⁷ Bɛ ń nǝ nǝb bwangtǝmɔ diiltɨn nɨ, sǝ ja yǝlam mɨ ji nǝn jǝ tuwol.

⁸ Na nʊ nɨ mɨ dʌng nanǝgam gǝnɔ lɛɨ, a ga keli a nǝbɔ lɔ gɨɨ gǝm, a kana nǝtǝm bɨlǝngkɛlɨ, a bwɨla a laa nʊ nɨ ke bɔ nǝ bwangtǝmɨ.

⁹ Ka jǝ́ kiyo lɛ nɔɔlɨ nɨ bwɨla gɔ a bʊlaɨ a mʊgɔ nɔɔtǝmkʊlab na a la bɔ jolɔ fʊltǝnukuni, na a ta bɔ swatǝm yaa a kwama nɨ bwɨla gɔ nǝn kʊlɨɨ.

¹⁰ Bɛ a yǝlam nʊ nɨ ja nyǝm gǝn nǝn maajɨ nyanɨ, nʊ nɨ bwa bɛtɔ lɔ gɨɨ lɛ dangǝnɨ, nʊ nɨ dʌng faabǝm lɛɨ, nʊ nɨ saal naa nǝb sagsagɔ lɛɨ, nʊ nɨ tɨka nǝb nɨ lɛ a mʊgɔ gaalanɨ, nʊ nɨ maa maajɨ nɨ lɛ gwam na a nyaɨ.

¹¹ Ka ń kiyo lɛ kal nɔɔtǝm nɨ batǝlam jinɔ a bʊlalaɨ a mʊgɔ nɔɔtǝmkʊlab, jʊ a bwɨɨ na swɨtǝm bʊtɔgɔ a dem nǝl jinɔ a bwangtǝm Kiristii, jǝ swɨ swɨ ja maa kaa naakan.

¹² Na ja maa nyɨɨ, Kwaama maa jim maa borang a kǝltǝm swatǝm yaa nɨ ja maa nǝn tɨkǝgaɨ.

¹³ A bɨtǝnɨ jǝ mɛla mɛla yɨm nǝn kwan, nǝb dɔbatǝm lɔ. Ke bɔ yɨm nǝn kwan kwaagɔ. Ja yǝlam nǝb yʊʊlatǝm nǝbɨɨ, nǝb dǝnglatǝm kɛl, jǝ sʊwala kanjǝl nɨ lɛ a bʊm bɨɨ.

¹⁴ A dul kɛl nɨ, mǝ swɨ lɛ kal nɔɔtǝmkʊlabɔ ja naa batǝm, ja bʌ bɛtɨ, ja dʌng lɔ jinɔ. Ka ja nǝ lɛ nǝ kii bǝnɔ gola tuwol bǝn.

¹⁵ Kaamɨ ja kwɛl ja yǝla, jǝ bwangtǝn Mamm.

¹⁶ Na nɔɔlɨ n nǝ nǝtǝm bɨlǝngkɛl nǝn nanǝgam nɔɔtǝmkʊlabɨ, bɛ ga tɨka ji. Ka ja nǝ lɛ mʊrkalɨ nǝb bwangtǝm Kwaamaɨ gaalan, sǝ nǝb bwangtǝmɔ a nya gola tɨkalɨ nɔɔtǝmkʊlab nɨ mɨ nǝn nǝb tɨkalɨ.

¹⁷ Nǝb dʊʊm nɨ maa maajɨ lɛ dǝngdǝng a mʊrkalɨ nǝb bwangtǝm Kwaamaɨ, bɛ ja nǝ ji dʊʊn a lada, ja ywa ji dangǝn, a ga keli a nǝb dʊʊm nɨ kiyo kɛl Kwaamaɨ lɛɨ jǝbɔ mɛlalɨɨ.

¹⁸ Jʊ a bwɨɨ mʊlalɨ kɛl Kwaamaɨ a sʊwa gɔ, “Ka ń dǝg lɛ nɛɛ gǝm kung a nyiyo na tɨka ń tuutǝm jaam lɛɨ.” A sʊwa tag gɔ, “Nǝ maajɨ bɛ ń ywa gǝn mɨbam gǝnɔ.”

¹⁹ Ka ń yo lɛ kɛl tuwol a dul nǝ dʊʊ mʊrkalɨ nǝb bwangtǝm Kwaamaɨ, na ke bɔ a nyiyo nǝb nǝtǝm nyiyo yo a yɔ nǝn a taal ja sʊwa gɔ gǝ na nyɨɨ.

²⁰ Nǝb dʊʊm nɨ maa bwɨlangkɛl lɛɨ, bɛ ń ga jim wulong a kǝga nǝb bwangtǝmɨ, sǝ tangǝn nǝbɔ a nyʊwa taal.

²¹ N mʊrka ń jǝbɔ Kwaama, jǝbɔ Kiristi Yesu, jǝbɔ bɛtɔ twama Kwaamaɨ nɨ ja jǝgamɨ, bɛ ń kɨla kanjǝl nɨ dangǝn, nǝn bɨlǝngǝn. Ka ń maa lɛ swɨtǝm dul.

²² Ka ń gaala lɛ nu ń ya kaa nǝl gǝm kang bwili. Ka ń dǝg lɛ dul mʊnɔ a bwɨlangkɛl kaam nǝbɨɨ. Bɛ ń kɨla dul mʊnɔ sagsag.

²³ A kǝga nɨ ke bɔ mwɛ kwaagɔ mʊ nɔɔ lɛɨ. Bɛ ń nɔɔ bʊgɛmɔ dǝm, a kɛl dul fʌl mʊnɔ jǝbɔ kʊngan bʊtɔ mʊnɔ.

²⁴ Bwɨlangkɛl kaam nǝbɨɨ gǝ na a talɨ. Nǝbɔ a kwɛl a nyǝm nyǝmɨ sǝla ja biyo jim borangɔ. Bwɨlangkɛl kaam nǝbɨɨ gǝ nʊng nǝn gul.

²⁵ A na nyɔ maajɨ nyan kaam nǝbɨɨ gǝ na a talɨ. Nǝb nɨ a jel bɔ a talɨɨ, mɨsɔ wuu lɛ.