1 Timoti 4 - Dadiya NT

Gʊtǝm Lɔl A Dul Nǝb Mɛlalɨ Gabakɛl

¹ Yʊwa Kwaamaɨ a sʊwa a talɨ gɔ, a dɨltǝm yooligɔ gǝm, kaam nǝbɔ bǝla bǝla nǝtǝm bɨlǝngkɛl jinɔ, ja yǝla ja bwangtǝn nǝblaamɔ jǝbɔ mɛlalɨ nǝblaamɨ.

² Nǝb nɨ mɛla kanjǝl nɨ lɛɨ jǝ maa lɛ na mɛlalɨ bɨlǝngkɛl jǝ mɛla lɛɨ, n fento, wʊnɨ nǝl jinɔ a bʊlam bʊlamɨ mǝ ja twɨ nǝn kemʌn shilo.

³ N nǝbɔ kaa nǝb lɛ a naakan jǝbɔ jatǝm kaam jǝjalǝnɨ, wʊnɨ Kwaama a fwal nǝb nǝtǝm bɨlǝngkɛlɔ gǝmɨ, ja nyǝm bɨlǝngkɛlɔ, ja yo nǝn buutǝm kang.

⁴ Jʊ nɨ Kwaama a fwal pʌdi na a nyan. Ka jǝ́ kɔ lɛ kaa jǝl na jǝ́ kwɛl jǝ́ yo nǝn buutǝm kangɨ,

⁵ jʊ a bwɨɨ ja saalǝm gǝn sagsag a gola kɛl Kwaamaɨ jǝbɔ keli.

Bwɛ Jwaalɛ Kiristii Nɨ Ja Jǝla Nǝn Gɨɨ

⁶ Na mʊ mɛla kambɔ gǝm kanjǝl nɨ lɛɨ, mʊ yǝlam yǝlam nǝ maajɨ nya a Kiristi Yesui, nʊ nɨ a dʊʊl a mʊgɔ kɛl nǝtǝm bɨlǝngkɛlɨ, jǝbɔ mɛlalɨ nyan nɨ mʊ bwangtǝn nɛ ba la nǝn dwiyeni.

⁷ Bɛ ń kɔ shinitɨn nɨ bɛ lɛ nǝn kaltǝm kɛl Kwaamaɨ, jǝbɔ fʌto katɨ nɨ mɨ a golaɨ. Bɛ ń mwɛ dul mʊnɔ a bwangtǝm Kwaamaɨ.

⁸ Mwɛl bʊtɔgɔ nǝn bʊmǝn gǝnɔ, bwangtǝm Kwaamaɨ a bʊm a shu a golantɨnɔ a gǝlala, jʊ a bwɨɨ nǝn gɔ bɛ lɛ nǝn bwili kʊlɨ a golantɨnɔ gǝmɨ, a wʊnɨ kǝngkɨɨ, jǝbɔ nʊ nɨ bɛ lɛ a kǝgaɨ.

⁹ Kɛl nɨ n bɨlǝngǝn. A bʊm nyɔ bǝ yo gǝn.

¹⁰ N dul kɛl nɨ bǝ dɔta lɛɨ, jʊ a bwɨɨ bǝ ya nǝl bǝnɔ a daagɔ Kwaama nɨ nǝn Kʊlɨɨ, wʊnɨ nǝn gɔ Nǝbʊʊlɨ nǝbɔ a yoolii gwamɨ, a ga keli a nǝb nɨ a nǝ bɨlǝngkɛlɨ.

¹¹ Bɛ ń mɛla nǝbɔ gǝm, dǝg ji ja bwangtǝn mɛlalɨ gǝnɔ.

¹² Ka ń jǝla lɛ nǝl a soga ń gɔ mɔ bwɛsǝn. Bɛ ń yǝlam jǝ mɛlalɨ a daagɔ nǝb nǝtǝm bɨlǝngkɛlɔ woi a gola sʊwatǝm kɛl, jǝbɔ gola yɨm, jǝbɔ swɨtǝm, jǝbɔ nǝtǝm bɨlǝngkɛl, jǝbɔ nǝl sagsag.

¹³ Bɛ ń ja kǝga nǝn kiyotǝm nǝbɨɨ gǝm kɛl Kwaamaɨ, jǝbɔ maltǝm nyiyo jǝbɔ mɛlalɨ, a ba la nǝn kwama mǝ bɛm lɛɨ.

¹⁴ Bɛ ka ń bǝla lɛ lǝma nɨ ja nǝ ńɨ, wʊnɨ ja nǝ ń a kuwotǝmkǝgaɨ, nǝn kwama nɨ mʊrkalɨ nǝb dʊʊm bwangtǝmɔ a ya mʊn kangɨ.

¹⁵ Bɛ ń ya nǝl mʊnɔ a kanjǝl nɨ. Bɛ ń dǝg dul mʊnɔ gwam, sǝ nǝbɔ a kuwo jatǝm kǝga nɨ mʊ maa lɛɨ.

¹⁶ Bɛ ń fɛ dʌng dul mʊnɔ jǝbɔ mɛlalɨ mʊnɔ. Bɛ ń ya ń maa lɛ nyɔ. Maatǝmɔ nyɨɨ nǝn gɔ mʊ bʊʊ lɛ nǝn dul mʊnɨ jǝbɔ nǝbɔ nyʊwa ń nɛɨ.