1 Timoti 2 - Dadiya NT

Gʊtǝm Lɔl A Dul Keli Kwaamaɨ

¹ Jʊ a laa jǝlɨ, mǝ gʊ jem lɔl lɛ, bɛ ya jǝ́ maa nǝbɔ gǝm keli lɛ. Jǝ́ kela Kwaama sǝ a tɨka ji. Jǝ́ buu Kwaama gǝm kang lɛ a kɛl dul nǝbɨɨ gwam.

² Jǝ́ maa fɔlɔlɔmɔ gǝm keli jǝbɔ nǝb dʊʊmɔ, sǝ bǝ nya yɨm lǝma kʊlɨgɔ kwamɨgǝn, yɨm nɨ a daa tʌgo a kɛl Kwaamaɨ jǝbɔ yɨm sagsag.

³ Wʊnɨ n jǝ nya, n jǝ yotǝm a kǝga Kwaamaɨ, Nǝbʊʊlɨ bǝnɔ,

⁴ nʊ nɨ swɨ lɛ nǝbɔ gwam a bʊʊɨ, ja nyǝm bɨlǝngkɛlɨ.

⁵ Kwaama win, nʊ a tɨbǝl bǝn jǝbɔ Kwaamaɨ win. Nǝfili nɨ nǝn Kiristi Yesu,

⁶ nʊ nɨ a nǝ dul gǝnɔ sǝ a jǝg nǝbɔ gwamɨ, wʊnɨ nǝn gɔ n nǝtǝm nyiyogɔ a nǝ a dǝngdǝng kwamagɨɨ.

⁷ N dul kɛl nɨ Kwaama a jǝg ɨ nǝ sʊwatǝm kɛl gǝnɨ, jǝbɔ bwɛ twama, nʊ nɨ mɛla Bʌtʌbɔ gǝm bɨlǝngkɛl lɛ jǝbɔ nǝtǝm bɨlǝngkɛlɨ. Mǝ sʊwa bɨlǝngkɛl, ke bɔ gabakɛl.

⁸ A daa maatǝm keli gwam mǝ swɨ lɛ batǝmɔ a maa keli, jǝ gung kang sagsag lɛ, mɨ nabwɨl wo jǝbɔ gʊbkatǝm.

⁹ A bwangtǝnɨ, mǝ swɨ lɛ nɔɔtǝmɔ a dʊʊ dʊʊl nɨ a maa jim dǝngdǝngɨ. Ja dʊʊ dʊʊl nɨ a daa tʌgoi. Ke bɔ mumtǝm dul nɨ a shu kwaanɨ, jǝbɔ dʊtǝm kanjǝl mʊn, jǝbɔ tɛl bʊmǝntɨn, jǝbɔ dwang nɨ kemʌnɔ a kwamɨ.

¹⁰ Bɛ ja maa maajɨ nyan nɨ a daa tʌgo a nɔɔtǝm nyan nɨ a nǝ dul jinɔ a bwangtǝn Kwaamaɨ.

¹¹ Bɛ nɔɔlɨ a yɨ shig a mɛlalɨ nǝn shigtǝm dul.

¹² Mǝ nǝ bɔ nɔɔlɨ gola a maa mɛlalɨ jǝbɔ fɔlɔn a dul batǝmɨ. Bɛ ga yɨ shig.

¹³ Jʊ a bwɨɨ nǝn Adamu a tǝl fwaltǝmɨ, nǝngɔ la a fwal Hawaui.

¹⁴ Ke bɔ Adamu Mammɔ a swagɨ, n nɔɔlɨgɔ a swagɨ, nǝn gɔ a kǝl diilii.

¹⁵ A bʌtʌm bɛtɨɨ, nɔɔtǝmɔ bʊʊ bʊʊ na ja yɨ yɨm nǝtǝm bɨlǝngkɛlɨ, jǝbɔ swɨtǝm, jǝbɔ yɨm sagsag jǝbɔ yɨm nɨ dǝngdǝngɨ.