1 Tasalonikaɨ 1 - Dadiya NT

Yaltǝm

¹ Nǝmǝ mǝ Bulus mǝ mʊla langǝn bwangǝn nɨ lɛɨ, nǝbɔ Sila, jǝbɔ Timoti. Nǝn mʊla mʊrkalɨ nǝb bwangtǝm Kwaamaɨ nɨ gǝm lɛ a Tasalonikaɨ, wʊnɨ na a Kwaama Tɛtɛɨ jǝbɔ Tɛlalɔ Yesu Kiristii. Bɛ lǝmagɔ, jǝbɔ yɨm kwamɨgǝn a yɨ jǝbɔ jen.

Nǝtǝm Bɨlǝngkɛl Nǝbɔ Tasalonikaɨ

² Kwangkwang nǝn buu Kwaama gǝm kang lɛ a kɛl dul jen gwam. Nǝn dǝg jen nɛ a mʊgɔ keli nǝnɔ gǝm kum jǝbɔ kɔkɔ.

³ Nǝn bʊʊla lɛ nǝn jen a keli nǝnɔ gǝm a kǝga Kwaama Tɛtɛ bǝnɨ a maajɨ nɨ jǝ́ maa lɛ a gola nǝtǝm bɨlǝngkɛlɨ, jǝbɔ gaalan maajɨgɔ jǝ́ nɔɔ lɛ a gola swɨtǝmɨ, jǝbɔ bwatǝm nǝlɔ jǝ́ maa lɛ nǝn yatǝm nǝl a mʊgɔ Tɛlalɔ bǝn Yesu Kiristii.

⁴ Kambɔ, nǝn nyǝm Kwaama a swɨ jen. Nǝn gɔ a jǝgam jeni, sǝ jǝ́ yǝlam nǝb gǝnɨ.

⁵ Jʊ a bwɨ nǝn nyǝm nyɨɨ, fulon kɛl lǝmɨ nǝnɔ n ke bɔ kɛl kwaagɔ a bɛ jemi, a bɛ nǝn kwaan fɔlɔn jǝbɔ Yʊwa Kwaamaɨ, jǝbɔ jǝlatǝm nɨ mɨsɔ dɨ lɛ woi. Jǝ́ nyǝm yɨm nɨ nǝn yɨ a kʊm jeni, n kɛl dul jen, sǝ a tɨka jen.

⁶ Jǝ́ banga nǝn nǝbɔ Tɛlalɔ. Jǝ́ yo kɛl Kwaamaɨ nǝn fulotǝm nǝl nɨ Yʊwa Kwaamaɨ nǝ lɛɨ, a mʊgɔ gaalan nɨ jǝ́ nɔɔ lɛɨ.

⁷ N jʊ a bwɨ jǝ́ yǝlam jǝ mɛlalɨ a nǝb nǝtǝm bɨlǝngkɛl nɨ gwam a tǝm Makidoniyaɨ jǝbɔ Akayaɨ.

⁸ N daa jen woi kɛl Tɛlalɔɨ a tǝl kwɨyatǝmɨ, ke bɔ a tǝm Makidoniya jǝbɔ Akaya kwaaji, a daatɨnɔ gǝm gwam ja nyǝm nǝtǝm bɨlǝngkɛl jenɔ a daagɔ Kwaama woi. Mɨ nǝ nǝn jǝ sʊwatǝm wo a dul gǝn.

⁹ Nǝji nǝn kang ji ja nǝ fulon fɔla nɨ nǝn maa a kʊm jeni, kanga jǝ́ bǝlam shomɔ, jǝ́ yǝla jǝ́ bwangtǝn Kwaama kʊlɨgɨɨ jǝbɔ a bɨlǝngkɛlɨ.

¹⁰ Ja sʊwa kanga jǝ́ yam yǝlatǝm Bʊla gɨɨ nɨ lɛ a dʌbʌl kwamaɨ, wʊnɨ a gung a bwaaɨ, nǝn gɔ nǝn Yesu, wʊnɨ jǝg bǝn nɛ a mʊgɔ nabwɨl Kwaamaɨ nɨ bɛ lɛɨ.