1 Korinti 8 - Dadiya NT

Jǝjalǝn Nɨ Ja Tǝlam Shomɔ Gǝm Twamaɨ

¹ Kǝngkɔ a kɛl dul jǝjalǝn nɨ ja tǝlam shomɔ gǝm twamaɨ, bǝ nyǝm pʌd bǝnɔ bǝ nǝngǝn nǝn nyǝmtǝm. Nyǝmtǝmɔ gǝ dǝg dǝg nǝl dʊʊlǝn dul. Swɨtǝmɔ gǝ mɔ mɔ nǝl.

² Nʊ nɨ kuwo lɛ gɔ gǝ nyǝm kaa jǝlɨ, lǝga bɔ a nyǝm jʊ nɨ a bʊm na gǝ nyǝm lɛɨ.

³ Na kaa nǝl swɨ Kwaama lɛɨ, Kwaama a nyǝm gǝn.

⁴ A kɛl jatǝm jǝjalǝn nɨ ja tǝlam shomɔ gǝm twamaɨ, bǝ nyǝm yooligɔ pʌd, shomɔ mɨ a nyiyo kaa jǝl. Bǝ nyǝm Kwaama nǝn gɔ win swarɨ, mɨ kaa wo.

⁵ A kuwotǝm kaam nǝbɨɨ gɔ kaam kanjǝl wo jǝ jo lɛ gɔ kwaamatɨn a dʌbʌl jǝbɔ tǝm, jǝ wo, “kwaamatɨnɔ” jǝbɔ “tɛlalɔtɨnɔ” a lada.

⁶ Gǝ na nyɔ tag, a daa bǝn woi, Kwaamagɔ win, nǝn gɔ nǝn Tɛtɛɨ, wʊnɨ kanjǝlɔ gwam a bɛ a daa gǝ woi, wʊnɨ bǝn tǝbǝn n yɨm gǝn bǝ maa lɛɨ. Tɛlalɔ win, Yesu Kiristi, wʊnɨ n daa gǝ woi kanjǝlɔ gwam a yǝlamɨ, wʊnɨ n daa gǝ woi bǝ nya kʊlɨɨ.

⁷ Ke bɔ nǝbɔ pʌd a nyǝm jʊ nɨɨ. Kaamɨ a gola mɛkatǝm jinɔ jǝbɔ shomi, na jǝ ja jǝjalǝn nɨ lɛɨ jǝ bʊʊla lɛ gɔ ja tǝlam shomɔ gǝm twama. Na nǝl jinɔ a nʊng ji gɔ kɛna n bwɨlangkɛl jǝ maaɨ, ji nǝn gunidul a kǝga Kwaamaɨ.

⁸ Jǝjalǝn mɨsɔ yɔ lɛ nǝn bǝn a daagɔ Kwaama woi. Na bǝ jaɨ, bǝ sʊ bɔ kaa jǝl. Na bǝ ja bɔ tagɨ, bǝ yal bɔ a kaa jǝl.

⁹ Bɛ jǝ́ fɛ jǝ́ dʌng, kage nyatǝm dul jenɔ nɨ a yǝlam tɛl fǝtǝm naa a nǝb nɨ nǝl jinɔ a bɨ bɨɨ.

¹⁰ Na kaa nǝl wo wʊnɨ nǝlɔ a bɨ bɨɨ, a kuwo ń, mʊ nɨ mʊ nyǝm jǝlɨ, mʊ ja jǝjalǝn nɨ lɛ ja tǝlam twama a kan shomi, jʊ nɨ mɨsɔ sʊ gǝm kwaan nɛ a ja jǝjalǝnɔ ja nǝ shomi ka?

¹¹ A gola nyǝmtǝm mʊnɔ nɨ, mʊ kal kal kɛ nɨ nǝlɔ a bɨ bɨɨ, wʊnɨ Kiristi a bʊla a kɛl dul gǝnɨ!

¹² A gola maatǝm kɛtǝlam jenɔ gǝm bwɨlangkɛl, jǝ́ kal kɛtǝlam jenɔ nɨ lɛ nǝlɔ a bɨ bɨɨ. Jǝ́ maa Kiristi gǝm bwɨlangkɛl.

¹³ Gǝ na nyɔ, na jatǝm jǝjalǝnɔ dǝg dǝg kɨla mɨ fǝtǝm naaɨ, mɨsɔ mǝ ja jǝjalǝn nɛ tag, kage n dǝg kɨla mɨ fǝtǝm naa.