1 Korinti 7 - Dadiya NT

Kanjǝlɔ A Mʊgɔ Naakanɨ

¹ Kǝngkɔ a dul kanjǝl nɨ jǝ́ mʊla mɨɨ, a bʊm nyɔ ka balɨ ya daa lɛ nǝn nɔɔlɨ.

² A kaa gola a dul taal bulon, bɛ balɨ a daa nǝn nwala gɔ. Bɛ nɔɔlɨ tǝgǝn a daa nǝn bwɨla gɔ.

³ Bɛ balɨ a jǝla nwala gɔ gǝm daam fiyodaalɨgɔ kanga a yɔ dǝngdǝng jǝbɔ naakanɨ. Bɛ nɔɔlɨ a maa bwɨla gɔ gǝm nyɔ tǝgǝn.

⁴ Nɔɔlɨ mɨ nǝn kwaan a dul bʊtɔ gǝn, na ke bɔ bwɨla gɨɨ. Gǝ na nyɔ balɨ tǝgǝn mɨ nǝn kwaan a dul bʊtɔ gǝn, na ke bɔ nwala gɨɨ.

⁵ Ka kaa win ya kɔ a wini lɛ, na ke bɔ nyɨɨ, bɛ a yǝlam nǝn jǝlatǝm a kʊm jen, ka kʊta lɛ, sǝ jǝ́ ja kǝga a mʊgɔ keli. Sǝ jǝ́ yǝla jǝ́ mʊrka, kage Mammɔ a tɛl jen a gola nɨ mɨsɔ bɛ lɛ nǝn tatǝm duli.

⁶ Mǝ sʊwa jʊ nɨ sǝ n nʊng jen gola. Ke bɔ diil.

⁷ N swɨ na nǝbɔ pʌd a yǝlam na mǝ. Kwaama a nǝ kaamɨ lǝma yɨm naakan. Kaamɨ a nǝ ji lǝma yɨm mɨ nǝn naakan.

⁸ Jʊ mǝ sʊwa a nǝb nɨ mɨ nǝn naakanɨ, jǝbɔ nɔɔtǝmkʊlabɨ, a bʊm nyɔ ja yɨ nyɔ mɨ nǝn naakan na mǝ.

⁹ Na mɨsɔ jǝ dwal lɛ ja ta dul jini, bɛ ja maa naakan. A laa jǝl ja maa naakan kage wɛl bulonɔ a dɔ nǝlɔ.

¹⁰ Jǝ́ nǝb naakanɔ, mǝ nǝ jen diil lɛ. Ke bɔ mǝ, nǝn Tɛlalɔ a sʊwa gɔ ka nɔɔlɨ ya wʊlaka lɛ jǝbɔ bwɨla gɨɨ.

¹¹ (Na ga wʊlaka jǝbɔ gɨɨ, bɛ ga yɨ nyɔ mɨ naakan wo. Na mɨ nyɨɨ, bɛ ja yǝla ja fɛka naakan jinɔ.) Balɨ bɛ ka ga dem lɛ kang a nwala gɔ gǝm.

¹² Jǝ́ tangǝn nǝbɔ mǝ sʊwa nyɔ, ke bɔ Tɛlalɔ. Na kaa kɛ a kʊm jen nǝn nɔɔlɨ nɨ ke bɔ nǝ bwangtǝmɨ, na a jǝla gɔ jǝ yɨ dakini, bɛ ka ga dem lɛ kang.

¹³ Na nɔɔlɨ nǝn balɨ nɨ ke bɔ nǝ bwangtǝmɨ, na a jǝla gɔ jǝ yɨ dakini, bɛ ka ga wʊlaka lɛ jǝbɔ gɔ.

¹⁴ Balɨ nɨ a nǝ bɔ bɨlǝngkɛlɨ, a yǝlam sagsag a gola nwala gɨɨ. Nɔɔlɨ nɨ a nǝ bɔ bɨlǝngkɛlɨ, a yǝlam sagsag a gola bwɨla gɨɨ. Na na mɨ nyɨɨ, na bɛtɔ lɔ jeni a yǝlam bɔ sagsag, n bɨlǝngǝn jǝ sagsag.

¹⁵ Na balɨ nɨ n ke bɔ nǝ bwangtǝmɨ swɨ lɛ a dem kang a nɔɔlɨ nǝ bwangtǝmɔ gǝmɨ, bɛ ga dem gǝm kang. Na nɔɔlɨ nɨ ke bɔ nǝ bwangtǝmɨ swɨ lɛ a wʊlaka jǝbɔ balɨ nǝ bwangtǝmɨ, bɛ ja wʊlaka. A dul kɛl nɨɨ, balɨ nǝ bwangtǝm jǝbɔ nɔɔlɨ nǝ bwangtǝm, mɨsɔ jǝ dǝg ji lɛ nǝn kwaan ja yɨ jǝbɔ nʊ nɨ ke bɔ nǝ bwangtǝmɨ, jʊ a bwɨɨ Kwaama a jo bǝn sǝ bǝ yɨ yɨm kwamɨgǝn.

¹⁶ Mɔ nɔɔlɨgɔ, mʊ nyǝm bɔ kɛna nǝmɔ mʊ bʊʊ lɛ nǝn bwɨla mʊɨ? Mɔ balɨgɔ, mʊ nyǝm bɔ kɛna nǝmɔ mʊ bʊʊ lɛ nǝn nwala mʊɨ?

Yɨmɔ Kwaama Swɨ Lɛɨ

¹⁷ Bɛ nǝl a yɨ yɨm nɨ Tɛlalɔ a jo gǝn gɔ ga yɨɨ. Bɛ ga yɨ yɨm gǝnɔ kanga Kwaama a jo gǝn a dul gǝnɨ. Wʊnɨ nǝn gɔ diilɔ mǝ nǝ jen nɛ gwam a mʊrkalɨtɨn nǝb bwangtǝm Kwaamaɨ.

¹⁸ Gwam nʊ nɨ Kwaama a jo galɨgǝn nǝn biyotǝm mwɛnɨ, bɛ ka ga saa lɛ ga yǝlam nʊ nɨ a biyo bɔ mwɛnɨ. Nʊ nɨ a jo gǝn ga biyo bɔ mwɛnɨ, bɛ ka ga saa lɛ ja biyo gǝm mwɛn.

¹⁹ Nǝ biyotǝm mwɛnɔ, jǝbɔ nʊ nɨ a biyo bɨɨ, mɨsɔ sʊ kaa jǝl lɛ. Jʊ a laa jǝlɨ, n kɨlatǝm diil Kwaamaɨ.

²⁰ Bɛ nǝbɔ gwam a yɨ a daa nɨ Kwaama a jom jii.

²¹ Na a jo ń mʊ bwɛ jwaalɛɨ, bɛ ka kom ń nɛ. Na mʊ nya nya gola yɨm duli, bɛ ń saa.

²² Nʊ nɨ n bwɛ jwaalɛ kwama Tɛlalɔ a jo gǝnɨ, a nya jǝgtǝm dul a gola Tɛlalɔɨ. Nʊ nɨ nǝn yɨm dul kwama Tɛlalɔ a jo gǝnɨ, n bwɛ jwaalɛ Kiristii.

²³ Kwaama a ten jen teni, a ywa jǝ tentǝm jenɔ a lada. Ka jǝ́ yǝlam lɛ jwaalɛb nǝfitʌmi.

²⁴ Kambɔ, gola nɨ Tɛlalɔ a jo jen a mʊgɔ gǝnɨ, bɛ jǝ́ yɨ wo, Kwaama gǝ na jǝbɔ jen.

Bwarabɔ Jǝbɔ Nɔɔtǝmkʊlabɔ

²⁵ A dul nɔɔtǝm nɨ a naa bɔ batǝm woi, mɨ mǝ nǝn jʊ nɨ Tɛlalɔ a sʊwa ɨɨ. Mǝ sʊwa jen kɛl nɨ a kuwotǝm mǝndɨ mǝ nʊ nɨ ja jǝla nǝn mǝ a lǝma Tɛlalɔɨ.

²⁶ A kɛl dul kanjǝl gaalan nɨ bɛ lɛ a kǝgaɨ, n kuwo a bʊm nyɔ nǝl a yɨ yɨm kanga gǝ wo a mʊgɔ gǝnɨ.

²⁷ Na dwang naakan wo a kwɨl mʊnɨ, bɛ ka ń saa lɛ ń tul gǝn. Na mɨ dwang naakan wo a kwɨl mʊnɨ, ka ń saa lɛ naakan.

²⁸ Na ń naa nɔɔlɨɨ, mʊ maa bɔ bwɨlangkɛl. Na bwɛnɔɔlɨ a naa balɨɨ, a maa bɔ bwɨlangkɛl. A kaa gola pʌd nǝb nɨ maa naakan nɛɨ, jǝ nyʊwa nyʊwa nǝn bʊtɔ. A kuwotǝm mǝndɨ mǝ shigʌm jem tuulo a dul jen.

²⁹ Jʊ mǝ kuwo lɛɨ kambɔ, kwama nɨ Tɛlalɔ bɛm lɛɨ ya la lɛ. A kǝga nɨ, nǝb nɔɔtǝmɔ bɛ ja yɨɨ maamɔ mɨ ji nǝn.

³⁰ Nǝb jitǝm wigɔ, maamɔ ke bɔ wi jǝ ji lɛɨ, nǝb fulotǝm nǝlɔ, maamɔ ke bɔ fulotǝm nǝl jǝ maa lɛɨ, nǝb tentǝmɔ, maamɔ ja ta bɔ jǝl wo a kang.

³¹ Nǝbɔ maa maajɨ lɛ nǝn kanjǝl yooli nɨɨ, maamɔ ka ja nǝ lɛ kwaan a maatǝm gǝnɔ gǝm, jʊ a bwɨɨ kanjǝl yooli nɨ shu shu.

³² Mǝ swɨ lɛ jǝ́ nya jǝgtǝm dul a komtǝm nɨ gǝm. Nʊ nɨ a naa bɔ nɔɔlɨɨ, gǝ sʊtǝn sʊ dʌngtǝm kanjǝl Tɛlalɔɨ, kanga fulo Tɛlalɔ gǝm nǝl lɛɨ.

³³ Nʊ nɨ a naa nɔɔlɨɨ, gǝ sʊtǝn sʊ maatǝm kanjǝl yooligɔ, kanga gǝ fulo nwala gɔ gǝm nǝl lɛɨ.

³⁴ Bʊʊlalɨ gǝnɔ a bel yo. Nɔɔlɨ nɨ a naa bɔ balɨɨ, jǝbɔ bwɛnɔɔlɨ, jǝ sʊtǝn sʊ dʌngtǝm kanjǝl Tɛlalɔɨ kanga jǝ yɨ lɛ sagsag a mʊgɔ bʊtɔ, jǝbɔ bʊʊlalɨ tagɨ. Nɔɔlɨ nɨ a naa balɨɨ, gǝ sʊtǝn sʊ dʌngtǝm kanjǝl yooligɔ, kanga gǝ fulo bwɨla gɔ gǝm nǝl lɛɨ.

³⁵ Mǝ sʊwa nyɔ, sǝ n tɨka jen, ke bɔ sǝ n tɨ nǝn jen, sǝ jǝ́ yɨ yɨm nyan a bwangtǝm Tɛlalɔɨ, ke bɔ beltǝm bʊʊlalɨ.

³⁶ Na bwayǝlɨ nɨ a swa yaa jǝbɔ bwɛnɔɔlɨ nɨ gǝ swɨ naatǝm gǝnɔ lɛɨ, na bwɛnɔɔlɨgɔ tɨla lɛɨ, kwama naakanɔ shu lɛɨ, na gǝ kuwo lɛ ga maa bɔ dǝngdǝngɨ, na swɨtǝm gǝnɔ ja kǝga lɛɨ, bɛ ga maa jʊ gǝ swɨ lɛɨ, ga bwa gǝm naakan. Ga maa bɔ bwɨlangkɛl.

³⁷ Na bwayǝlɨ nɨ a kuwo a bʊm bɔ gǝ bwa naakan jǝbɔ bwɛnɔɔlɨ gǝnɨ, n ke bɔ dǝgtǝm nǝn kwaan, na ga ta dul gǝnɨ, ga ya nyɔ a nǝl gǝn, ga swɨ bɔ naakanɨ, n dǝngdǝng ga maaɨ, ka ga naa lɛ.

³⁸ Bwayǝlɨ nɨ a bwa naakan jǝbɔ bwɛnɔɔlɨ gǝnɨ, ga maa dǝngdǝng. Nʊ nɨ a bwa bɔ naakan jǝbɔ bwɛnɔɔlɨ gǝnɨ, a laa gǝn.

³⁹ Dwang naakanɔ wo a kwɨl nɔɔlɨɨ, na bwɨla gǝ nǝn kʊlɨɨ. Na bwɨla gɔ a bʊlaɨ, dwang naakanɔ a tulo. Gǝ naa naa kaa balɨ nɨ ga swɨɨ. Bɛ a yǝlam nǝ bwangtǝm Tɛlalɔɨ.

⁴⁰ A kuwotǝm mɨ, nɔɔlɨ nɨ nyʊwa nyʊwa lǝma, na ga yɨ nyɨɨ. A kuwotǝm mɨ, mǝ nǝngǝn nǝn Yʊwa Kwaamaɨ.