1 Korinti 6 - Dadiya NT

Ka Jǝ́ Yɔ Lɛ Nǝn Katǝm Kɛl A Kǝga Nǝb Nɨ Ke Bɔ Nǝb Bwangtǝmɨ

¹ Na kaa nǝl a kʊm jen nǝn katǝm kɛl kɨla gɨɨ, maa nyǝn yɔ lɛ nǝn kɨla gɔ a kǝga nǝb maatǝm borang nɨ mɨ sagsagɨ? Bɛ jǝ́ yɔ nǝn a kǝga nǝb sagsagɨ.

² Jǝ́ nyǝm bɔ n nǝb sagsag maa yooli nɨ gǝm borang lɛɨ ka? Na nǝjen jǝ́ maa yooli nɨ gǝm borang lɛɨ, mɨsɔ jǝ́ dwal lɛ jǝ́ maa bɛlɨ kanjǝl nɨ ka?

³ Jǝ́ nyǝm bɔ bǝ maa maa bɛtɔ twama Kwaamaɨ gǝm borangɨɨ ka? Na gǝ na nyɨɨ, n wɛ a bwɨ jǝ́ dwal bɔ jǝ́ maa borang kanjǝl nɨ a ke yɨm yooli nɨɨ?

⁴ Na jǝ́ nǝngǝn nǝn katǝm kɛl nyɨɨ, a bwɨ nyǝn tag jǝ́ yɔ lɛ nǝn a kǝga nǝb nɨ mɨ ji nǝn nyiyo a mʊrkalɨ nǝb bwangtǝm Kwaamaɨ?

⁵ Mǝ sʊwa jʊ nɨ sǝ jǝ́ nyʊwa gunidul. Mɨ nʊ nɨ wo win nǝn nyǝmtǝm a kʊm jen dwal dɔ kʊm kambɨɨ lɛɨ ka?

⁶ Kɛ nǝ bwangtǝm gǝ ka ka kɛl kɨla gɨɨ a kan borang. Gǝ yɔ yɔ nǝn a kǝga nǝb nɨ ke bɔ nǝb bwangtǝmɨ!

⁷ Kabkatǝm kɛl, n yalatǝm a daa jen woi. A laa bɔ jǝl jǝ́ kʊ nǝl, ja bǝm jen ka? A laa bɔ jǝl jǝ́ kʊ nǝl tag ja ja jen ka?

⁸ N wɔ jen nǝn dul jen jǝ́ bǝmka lɛ. Jǝ́ jabka lɛ. Jǝ́ maa kɛtǝlam jenɔ gǝm nyɔ tʌji!

⁹ Jǝ́ nyǝm bɔ, nǝb nɨ mɨ sagsagɨɨ mɨsɔ jǝ nya kʊla fɔlɔn lɔ Kwaamaɨ lɛɨ ka? Ka ja swag jen nɛ! Nǝb bulonɔ, jǝbɔ nǝb bwangtǝm shomɔ, jǝbɔ batǝm kalalɨgɔ, jǝbɔ balɨ nɨ daa lɛ nǝn kǝga balɨɨ,

¹⁰ jǝbɔ nǝbkuumɔ, jǝbɔ nǝb wɛlɔ, jǝbɔ nǝbɔ a nɔɔ bʊgɛ maa ji lɛɨ, jǝbɔ nǝb tuwolatǝm tuwolɔ, jǝbɔ nǝb jatǝm mɨbamɔ, mɨsɔ jǝ nya kʊla fɔlɔn lɔ Kwaamaɨ lɛ.

¹¹ Kaam jenɔ jǝ́ na nyɔ galɨgǝn. Ja saal jen, jǝ́ sagsag. Ja dǝg jen jǝ́ yǝlam nǝb dǝngdǝng a dun Tɛlalɔ Yesu Kiristii, jǝbɔ Yʊwa Kwaama bǝnɨ.

Jǝ́ Dʊʊl Kwaama Nǝn Bʊtɔ Jenɔ

¹² Kaam jenɔ gɔ, “Kanjǝlɔ gwam ja jǝla mɨ maatǝmɔ.” Nǝngɔ mǝ sʊwa mǝʊ, “Ke bɔ kanjǝlɔ gwam n jǝ nyaɨ.” Kaam jenɔ gɔ, “Kanjǝlɔ gwam ja jǝla mɨ maatǝmɔ.” Nǝngɔ mǝ sʊwa mǝʊ, “Mɨsɔ mǝ yǝlam bwɛ jwaalɛ kanjǝl lɛ.

¹³ Jǝjalǝnɔ ja maam fʌl. Fʌlɔ ja maam jǝjalǝn.” Kwaama kal kal gwam jinɔ yo, wʊnɨ jǝbɔ a wuleni. Bʊtɔgɔ n ke bɔ a bulon, na a Tɛlalɔɨ, Tɛlalɔ nǝn gɔ dʌng bʊtɔgɔ lɛɨ.

¹⁴ Kwaama gung gung bʊtɔ bǝnɔ a bwaa nǝn kwaan gǝnɔ, kanga a gung Tɛlalɔ a bwaaɨ.

¹⁵ Jǝ́ nyǝm bɔ bʊtɔ jenɔ n jinʌn Kiristii ka? Mǝ do do jinʌn Kiristii n dǝg a yǝlam jinʌn nɔɔlɨ kalalɨ ka? Mɨ nyɔ!

¹⁶ Jǝ́ nyǝm bɔ nʊ nɨ pʌd a mʊrka bʊtɔ jǝbɔ nɔɔlɨ kalalɨɨ, ja yǝlam bʊtɔgɔ wini ka? A mʊla mʊlaɨ sʊwa lɛ gɔ, “Jǝ yo nɨ ja yǝlam bʊtɔgɔ win.”

¹⁷ Nʊ nɨ a mʊrka dul gǝnɔ jǝbɔ Tɛlalɔɨ, a yǝlam win jǝbɔ gɔ a yʊwa.

¹⁸ Jǝ́ mwal bulonɔ. Pʌd tangǝn bwɨlangkɛlɔ nǝl maa lɛɨ, a ke bɔ bʊtɔ gǝnɔ na maatǝm bulonɔ. Nʊ nɨ maa bulon nɛɨ, gǝ maa bwɨlangkɛl nɨ kal bʊtɔ gǝnɔ lɛɨ.

¹⁹ Jǝ́ nyǝm bɔ bʊtɔ jenɔ n Kan Kwaaman Yʊwa Kwaamaɨ wʊnɨ a nǝl jeni, wʊnɨ jǝ́ nya a daagɔ Kwaama woi ka? Jen jǝ́ ke bɔ a dul jen.

²⁰ Kwaama a ten jen teni, a ywa jǝ tentǝm jenɔ a lada. A dul kɛl nɨɨ, bɛ jǝ́ dʊʊl Kwaama nǝn bʊtɔ jenɔ.