1 Korinti 5 - Dadiya NT

Biyotǝm Borang A Dul Bulon

¹ Jǝ sʊwa lɛ gɔ maatǝm bulonɔ wo a kʊm jen, a wʊnɨ mɨ jǝ maa lɛ a kʊm nǝb nɨ ke bɔ nǝb bwangtǝmɨ. Kaa gǝ do do nwala tɛtɛ gɨɨ a daa nǝn.

² Jǝ́ maa sʊtɔ lɛ nǝn! A laa bɔ jǝl jǝ́ maa fitǝm nǝl ka? A laa bɔ jǝl jǝ́ jǝg nʊ nɨ maa bwɨlang maajɨ nɨ lɛɨ a kʊm jen ka?

³ N nyǝm nyɔ mɨ mǝ dakini nǝbɔ jen a mʊgɔ bʊtɔ, yʊwa mǝndɨ wo dakini jǝbɔ jen. Nʊ nɨ maa jʊ nɨ lɛɨ, n kwɛl n biyo gǝm biyoi borang maamɔ mǝ na a kʊm jen.

⁴ Na nǝn kwama jǝ́ mʊrka a mʊgɔ dun Tɛlalɔ bǝn Yesui, yʊwa mǝndɨ jǝbɔ kwaan Tɛlalɔ bǝn Yesui wo jǝbɔ jen.

⁵ Bɛ jǝ́ dǝg nʊ nɨ a kang Mammɨ, sǝ a kalǝm bʊtɔ bwɨlangkɛl gǝnɔ, sǝ yʊwa gǝnɔ a bʊʊ nǝn kɔkɔ Tɛlalɔɨ.

⁶ Maatǝm sʊtɔ jenɔ a bʊm bɔ. Jǝ́ nyǝm bɔ, kǝlɨ yisti nǝn dǝm nyɔ gǝ dɔ bʊtɔ kʊkkʊmɔ lɛ gwamɨ ka?

⁷ Bɛ jǝ́ jǝgǝm yisti galɨ nɨ, sǝ jǝ́ yǝlam bʊtɔ fɨ, maamɔ n bɨlǝngǝn jǝ́ na nyɔ. Jʊ a bwɨɨ ja kwɛl ja biyo Bɛ Gal bǝnɔ a Dikulom Yabtǝm, wʊnɨ nǝn Kiristii.

⁸ A dul kɛl nɨɨ bɛ ya bǝ maa Dikulom bǝnɔ lɛ, ke bɔ nǝn kʊkkʊm nɨ nǝn yisti galɨɨ, wʊnɨ n shil jǝbɔ bwɨlang jǝlɨ. Bɛ bǝ maa Dikulom bǝnɔ nǝn kʊkkʊm nɨ mɨ yisti woi, yǝlɨgǝnɔ jǝbɔ a bɨlǝngǝnɔ.

⁹ N mʊla jem a mʊgɔ langǝn bwangǝn mǝndɨ gǝm mǝʊ, bɛ ka jǝ́ mʊrka lɛ dul jǝbɔ nǝb bulon.

¹⁰ Mǝ sʊwa bɔ a dul nǝb nɨ ke bɔ nǝb bwangtǝmɨ, wʊnɨ maa bulon nɛɨ, jǝbɔ nǝb wɛl, jǝbɔ nǝb jatǝm mɨbam, jǝbɔ nǝb bwangtǝm shom. Na na n sʊwa nyɨɨ, na yǝlam yǝlam nyɔ jǝ́ bǝla yooli nɨɨ.

¹¹ Mǝ mʊla jem mǝʊ, ka jǝ́ mʊrka lɛ dul jǝbɔ nʊ nɨ pʌd jǝ jo gǝn nɛ gɔ, kɛ nǝ bwangtǝmɨ, wʊnɨ maa bulon nɛɨ, jǝbɔ wɛl, jǝbɔ bwangtǝm shom, jǝbɔ tuwolatǝm tuwol, jǝbɔ nɔɔtǝm bʊgɛ ya maa gǝn nɛɨ, jǝbɔ jatǝm mɨbam. Ka jǝ́ ja lɛ jǝjalǝn jǝbɔ nǝb nɨ.

¹² N wɛ a dǝg ɨ wo a biyotǝm borang a nǝb nɨ ke bɔ a bǝnɨ? Nǝb nɨ a mʊgɔ nǝb bwangtǝmɨ maa nǝb bwangtǝmɔ gǝm borang lɛɨ, mɨ nyɔ ka?

¹³ Nǝn Kwaama gǝ mwatɨ borang nǝb nɨ lɛ mɨ jǝbɔ bǝnɨ. Kanga mʊlalɨgɔ a sʊwa gɔ, “Bɛ jǝ́ kaa nǝ bwɨla nɨ a kʊm jeni.”