1 Korinti 15 - Dadiya NT

Guntǝm Kiristii A Bwaa

¹ A kǝngkɔ, kambɔ, mǝ bʊʊla jem bʊʊla fulon kɛl lǝmɨ nɨ mǝ sʊwa jeni, wʊnɨ jǝ́ yoi, wʊnɨ jǝ́ bwangtǝnɨ.

² Nǝn gɔ jǝ bʊʊ jen nɛ nǝnɨ, na jǝ́ ta fulon kɛl lǝmɨ nɨ mǝ kiyo jemi a bʊm bʊmɨ. Na jǝ́ ta bɔ a kwamɨ, nǝtǝm bɨlǝngkɛlɔ jenɔ nǝn tɨkǝgaɨ, n jǝl nǝn kwan.

³ Kɛl nɨ a laa jǝl dangǝn wʊnɨ mǝ sʊwa jeni, nǝn gɔ nʊ nɨ mǝ yoi, gɔ, Kiristi a bʊla a dul bwɨlangkɛl bǝn kanga mʊlalɨ kɛl Kwaamaɨ a sʊwaɨ.

⁴ Nǝngɔ ja fʌl gǝnɨ. A gun a kum na taalɔ gǝm kanga langǝn bwangǝn Kwaamaɨ a sʊwaɨ.

⁵ A nʊng Bitrus dul gǝnɔ, nǝngɔ la a nʊng bɛtɔ twama gǝnɔ nɨ kʊb jeli yoi.

⁶ Nǝngɔ la a nʊng kambɔ nɨ ja shu fʊlkʊb nʊɨ dul gǝnɔ naagɔ wini. Kɔrɔ jinɔ wo ba la nǝn kǝngkɨɨ, kaamɨ a daa dum.

⁷ Nǝngɔ a nʊng Yakubu dul gǝnɨ. Nǝngɔ a nʊng dul gǝnɔ a daagɔ tangǝn bɛtɔ twamagɔ woi.

⁸ Nǝn gul gwamɨ, nǝngɔ a nʊng ɨɨ, mǝ nɨ ja bʌ i bɔ na tangǝn kambɨɨ.

⁹ Nǝmǝ mǝ maa dǝm a mʊgɔ bɛtɔ twamagɨɨ, mǝ la bɔ ja sʊwa gɔ mǝ bwɛ twama, jʊ a bwɨɨ n nǝ mʊrkalɨ nǝb bwangtǝm Kwaamaɨ gaalan.

¹⁰ N lǝma Kwaamaɨ mǝ yǝlam nyɨɨ. Lǝma nɨ a maa mɨɨ, mɨ nǝn kwan. N laa ji maajɨ gwam, n ke bɔ mǝ, n lǝma Kwaamaɨ nɨ jǝbɔ mɨɨ.

¹¹ Na nǝmɨɨ, na nǝjii, nǝn sʊwa fulon kɛl lǝmɨgɔ nyɔ, n jʊ jǝ́ nǝ bɨlǝngkɛlɨ.

Guntǝm A Bwaa

¹² Jǝ kiyo fulon kɛl lǝmɨ Kiristii lɛ gɔ, Kwaama a gung gǝn a bwaaɨ, a maa nyǝn tangǝn jenɔ sʊwa lɛ gɔ, mɨ guntǝm bwaa woi?

¹³ Na na mɨ guntǝm bwaa woi, na Kwaama a gung bɔ Kiristi.

¹⁴ Na na Kwaama a gung bɔ Kiristii, na fulon kɛl nɨ nǝn kiyoi, a yɔ nǝn kwan. Nǝtǝm bɨlǝngkɛl jenɔ a yɔ nǝn kwan tag.

¹⁵ A yǝlam nǝn gabakɛl lɛ a dul Kwaamaɨ, jʊ a bwɨɨ nǝn sʊwa nǝn gɔ Kwaama a gung Kiristi, a wʊnɨ a gun bɨɨ, na na n bɨlǝngkɛlɨ Kwaama a gung bɔ bwaagɔ.

¹⁶ Jʊ a bwɨɨ na na Kwaama a gung bɔ bwaagɨɨ, na Kiristi a gun bɔ.

¹⁷ Na na a gung bɔ Kiristii, na nǝtǝm bɨlǝngkɛl jenɔ a yɔ nǝn kwan, jǝ́ nǝngǝn nǝn bwɨlangkɛl jenɔ.

¹⁸ Na na gǝ na nyɨɨ, nǝb nɨ a daa dum jǝ na a Kiristii, na ja kala nǝn kwan.

¹⁹ Na na yatǝm nǝl bǝnɔ a daa Kiristi woi n kɛl kʊlɨ nɨ kwaagɨɨ, na bǝ laa nǝbɔ gwam yǝlamtǝm jǝ bʊnatǝm.

²⁰ N bɨlǝngkɛl Kwaama a gung Kiristi a bwaa. Nǝn gɔ a yǝlam nǝ tɨkǝga a nǝb nɨ a bʊlaɨ.

²¹ Kanga bwaagɔ a bɛ a gola nǝlɨ, guntǝmɔ a bwaaɨ bɛ a gola nǝlɨ tag.

²² Kanga nɨ gwam bǝ bʊla a kɛl dul Adamui, na nyɔ, Kwaama fulo nǝn bǝn gwam a kɛl dul Kiristii.

²³ Gwam bǝnɔ Kwaama gung bǝn gung win win. Kiristi nǝn gɔ tɨkǝga guntǝmɨ, na a yǝla a bɛɨ, nǝbam gǝnɔ gwam gun gun.

²⁴ Dɨltǝm yooligɔ bɛ bɛ, nǝn kwama a kalǝm fɔlɔn Mammɨ gwam jǝbɔ kwaan gǝnɨ, sǝla nǝn gul a nǝ Kwaama Tɛtɛ fɔlɔnɔ.

²⁵ Jʊ a bwɨɨ Kiristi maa maa fɔlɔnɔ, ba la nǝn kwama nɨ falam nǝb kiim gǝnɔ lɛɨ.

²⁶ Nǝ kii na gulɔ gǝ kal lɛɨ, nǝn bwaa.

²⁷ A mʊla mʊlaɨ gɔ, “Kwaama a ya kanjǝlɔ gwam a mʊgɔ kwaan gǝn.” Na ja sʊwa gɔ, “Kwaama a bǝla kanjǝlɔ gwam a mʊgɔ kwaan gǝnɨ,” gǝ na a talɨ, nʊ nɨ Kwaama a bǝla kanjǝlɔ gwam a mʊgɔ kwaan gǝnɨ, Kwaama a na bɔ a mʊgɔ gǝn.

²⁸ Gǝ nʊ nɨ Kwaama a bǝla kanjǝlɔ gwam a kwaan gǝnɨ, bwɛ nǝn kang gǝn tǝgǝn a bǝla dul gǝnɔ a daa nʊ nɨ a bǝla kanjǝlɔ a mʊgɔ kwaan gǝnɨ. Kwaama nǝn gɔ n dul kanjǝlɔ gwamɨ.

²⁹ Na na mɨ guntǝm wo a bwaaɨ, wɛ bwɨ lɛ nǝn nǝb nɨ ja yʊ ji mwɛ sagsag a dul nǝbɔ a bʊla bʊlaɨ? Na na mɨsɔ jǝ gung nǝb nɨ lɛ a bʊla bʊlaɨ, n wɛ a bwɨ jǝ yʊ kaamɨ mwɛ lɛ a kɛl dul nǝb nɨ a bʊla bʊlaɨ?

³⁰ Na gǝ na nyɨɨ, n wɛ a bwɨ nǝn dǝg dul nǝnɔ lɛ a bwaa kwangkwangɨ?

³¹ Mǝ sʊwa jen nɛ kambɔ, n kɛl lɨyal nɨ mǝ maa lɛ nǝn jen a mʊgɔ Kiristi Yesui, Tɛlalɔ bǝn, kwangkwang mǝ miyo kʊlɨ mɨ lɛ a bwaaɨ.

³² Na mǝ losam jǝbɔ namɔ kuuli a Afisa a kɛl dul nyatǝm nǝfilii, n bwili wɛ mǝ nyaɨ? Na na ja gung bɔ bwaagɨɨ, na “Ya bǝ ja lɛ, ya bǝ nɔɔ lɛ, kanga bǝ nyǝm fʌng bǝ bʊla bʊlaɨ.”

³³ Ka ja swag jen nɛ! “Yɨm jǝbɔ nǝb bwɨlan gǝ kal kal nǝ nya.”

³⁴ Jǝ́ yǝla jǝ́ bɛ a bʊʊlalɨ nyan jenɔ gǝm. Jǝ́ bǝla yɨmɔ wo a mʊgɔ bwɨlangkɛl. Kaam jenɔ a nyǝm bɔ Kwaama. Mǝ sʊwa nyɔ, sǝ jǝ́ nyʊwa gunidul.

Guntǝm Bʊtɔ

³⁵ Kaa nǝl bʌ bʌ gɔ, “Jǝ gung nǝb nɨ a bʊlaɨ nyǝn? N jelkalǝng wɛ jǝ jel lɛ nǝnɨ?”

³⁶ Mʊ nǝ swɛlalɨ! Jʊ nɨ mʊ kwalɨ, mɨsɔ gi lɛ, na a bʊla bɨɨ.

³⁷ Jʊ nɨ mʊ kwalɨ, mɨsɔ gi lɛ nǝn bʊtɔ jʊgɔ mʊ kwalɨ, n nu gǝn nǝn kwan, na jaamɨ, na kaa dʊʊm nǝn kwanɨ.

³⁸ Kwaamagɔ nǝ gǝn bʊtɔ nɨ gǝ swɨ lɛɨ. Dʊʊmɔ gwam Kwaama gǝ nǝ ji bʊtɔgɔ nǝn dʌmʌn.

³⁹ Ke bɔ nya namɔ gwam wini. Nǝfitʌmɔ nǝngǝn a jinɔ, yʊwaltɨnɔ nǝngǝn a jinɔ, lǝbɨtɨnɔ nǝngǝn a jinɔ, jʌngitɨnɔ tʌji nǝngǝn a jinɔ.

⁴⁰ Kanjǝl dʌbʌlɔ wo, kanjǝl tǝmɔ wo. Dʊʊlǝn a dʌbʌlɔ kwaagɔ, a tǝmɔ tǝgǝn kwaagɔ.

⁴¹ Dʊʊlǝn nu kwamagɔ kwaagɔ, a bwaalagɔ kwaagɔ, a nyanyamɨtɨnɔ kwaagɔ. Kaa nyanyamɨ gǝ laa laa kaa nʊngtǝm a dʊʊlǝnɔ gǝm.

⁴² Na nyɔ tag a guntǝm bwaagɔ gǝm. Ja kwal ji nǝn bʊtɔ bʊtatǝm. Jǝ gun nǝn bʊtɔ nɨ mɨsɔ bʊta lɛ woi.

⁴³ Ja kwal nǝn sogan. Jǝ gun nǝn dʊʊlǝn. Ja kwal mɨ nǝn kwaan. Jǝ gun nǝn kwaan.

⁴⁴ Ja kwal nǝn bʊtɔ nǝfilii. Jǝ gun nǝn bʊtɔ yʊwa. Na bʊtɔ nǝfiligɔ woi, bʊtɔ yʊwagɔ wo.

⁴⁵ A mʊla mʊlaɨ nyɔ gɔ, “Nǝ tɨkǝgagɔ nǝn Adamu a yǝlam nǝn kʊlɨɨ.” Adamu gulɔ n yʊwa nɨ nǝ kʊlɨ lɛɨ.

⁴⁶ Nʊ nɨ n yʊwaɨ a bɛ bɔ dɨn, n nǝ bʊtɔgɔ a bɛɨ. Nǝn gul nǝngɔ la nʊ nɨ n yʊwaɨ a bɛɨ.

⁴⁷ Nǝfili na tɨkǝgagɔ a jel a tǝm, n boli. Na yogɔ a jel a dʌbʌl.

⁴⁸ Kanga nǝfitʌmɔ gwam nǝngǝn nǝn bʊtɔ tǝm na a Adamui, gǝ na nyɔ bʊtɔ dʌbʌlɔ yǝlam na a Kiristii.

⁴⁹ Kanga ja bʌ bǝn bǝ do jelkalǝng nǝfilii, n kanga bǝ do jelkalǝng nʊ nɨ lɛ a dʌbʌli.

⁵⁰ Mǝ sʊwa jen kɛl nɨ kambɔ, mɨsɔ maa lɛ bʊtɔ jǝbɔ tʊʊm a nya kʊla fɔlɔn lɔ Kwaamaɨ. A na nyɔ tag, bʊtɔ bʊtatǝmɔ mɨsɔ nya kʊla lɛ a daa nɨ mɨ bʊtatǝm woi.

⁵¹ N wɔ mǝ sʊwa jen kaa jʊ nɨ lɛ ja yʊ yʊɨ. Ke bɔ gwam bǝnɔ bǝ bʊla lɛɨ, gwam bǝnɔ Kwaama fʌto bǝm fʌto bʊtɔgɔ.

⁵² Bwɨ bwɨ nyɔ tʌgo a kang, na kʊmtǝm nu, a nyʊwatǝm guutǝm jum na gulɔ. Jǝ guu guu jumɔ, Kwaama gung gung nǝbɔ a bʊlalaɨ nǝn bʊtɔ nɨ mɨsɔ bʊta lɛ woi. Kwaama fʌto fʌto bʊtɔ bǝnɔ.

⁵³ Bʊtɔ nɨ bʊta lɛɨ, Kwaama fʌto fʌto nǝn bʊtɔ nɨ mɨsɔ bʊta lɛ woi. Bʊtɔ nɨ bʊla lɛɨ, Kwaama fʌto fʌto nǝn bʊtɔ nɨ mɨsɔ bʊla lɛ woi.

⁵⁴ Na bʊtɔ nɨ bʊta lɛɨ a fʌto bʊtɔ nɨ mɨsɔ bʊta lɛ woi, na bʊtɔ nɨ bʊla lɛɨ a fʌto bʊtɔ nɨ mɨsɔ bʊla lɛ woi, kɛl nɨ ja mʊlaɨ a yii, wʊnɨ sʊwa lɛ gɔ, “Ja kaa bwaagɔ, ja ku jelʌn a dul gǝn.”

⁵⁵ “Mʊ bwaagɔ, mʊ ku jelʌn a fee? Mʊ bwaagɔ, twalǝm mʊnɔ n fee?”

⁵⁶ Bwɨlangkɛlɔ nǝn gɔ n twalǝm bwaagɨɨ. Diilɔ nǝn gɔ n kwaan bwɨlangkɛlɨ.

⁵⁷ Buutǝm kangɔ na a Kwaamaɨ, wʊnɨ a dǝg bǝn bǝ ku jelʌn a gola Tɛlalɔ bǝn Yesu Kiristii.

⁵⁸ Gǝ na nyɔ, kɛtǝlam mɨ nɨ mǝ swɨ lɛɨ, jǝ́ tɨ nǝn kwaan, ka kaa jǝl ya mǝg jen nɛ, kwangkwang jǝ́ maa maajɨ Tɛlalɔɨ nǝn kwaan bʊtɔ, jʊ a bwɨɨ jǝ́ nyǝm gaalan jenɔ a kɛl dul Tɛlalɔɨ, mɨsɔ yɔ lɛ nǝn kwan.