1 Korinti 11 - Dadiya NT

¹ Jǝ́ maa mɛlalɨ nǝn mǝ kanga mǝ maa mɛlalɨ nǝn Kiristii.

Nɔɔtǝmɔ Ja Bwa Dwang A Dul

² Mǝ buu jem kang lɛ jʊ a bwɨɨ jǝ́ bʊʊla lɛ nǝn mǝ a kanjǝlɔ gǝm gwam, jǝ́ ta kanjǝlɔ gwam mǝ mɛla jemi.

³ Mǝ swɨ lɛ jǝ́ nyǝm nyɔ, nǝ dʊʊ balɨɨ nǝn Kiristi. Nǝ dʊʊ nɔɔlɨɨ nǝn bwɨla gɔ. Nǝ dʊʊ Kiristii nǝn Kwaama.

⁴ Balɨ nɨ gwam a maa keli jǝbɔ kuwotǝmkǝga a sum sumi dul gǝnɨ, gǝ nǝ dʊʊ gǝnɔ gunidul.

⁵ Gwam nɔɔlɨ nɨ a maa keli jǝbɔ kuwotǝmkǝga a bwa bɔ dwang a duli, gǝ nǝ dʊʊ gǝnɔ gunidul. Gǝ na win jǝbɔ a wʊnɨ ga bʊtɨ dul gǝnɨ.

⁶ Na nɔɔlɨ a kɔ bwatǝm dwang a duli, bɛ ga bʊtɨm dul gǝnɔ. Na jǝ gunidul nɔɔlɨ a bʊtɨ dul gǝnɨ, bɛ ga bwa dwang a dul.

⁷ Balɨ a bʊm bɔ a sum dul gǝnɔ, jʊ a bwɨɨ ga jelka Kwaama, gǝ nʊng dʊʊlǝn Kwaamaɨ tag. Nɔɔlɨ gǝ nʊng dʊʊlǝn bwɨla gɨɨ.

⁸ Jʊ a bwɨɨ balɨ a jel bɔ a daagɔ nɔɔlɨ woi, n nɔɔlɨ a jel a bʊtɔ balɨɨ.

⁹ Kwaama a fɛ bɔ balɨ a kɛl nɔɔlɨ. N nɔɔlɨ Kwaama a fɛ a kɛl balɨɨ.

¹⁰ N jʊ a bwɨ a bʊm nɔɔlɨ a bwa dwang a duli, n gola nʊngtǝm kwaan. A bʊm ga bwa dwang a dul a kɛl bɛtɔ twama Kwaamaɨ.

¹¹ A fɛkalɨ Tɛlalɔɨ, ja wʊlaka bɔ nɔɔlɨ jǝbɔ balɨ, ja wʊlaka bɔ balɨ jǝbɔ nɔɔlɨ.

¹² Kanga nɔɔlɨ a jel a daagɔ balɨ woi, gǝ na nyɔ, balɨ n bʌtʌm nɔɔlɨɨ. Kanjǝlɔ gwam a jel a daagɔ Kwaama woi.

¹³ Jen nǝn dul jen jǝ́ dʌng jǝ́ kuwo. A bʊm nyɔ nɔɔlɨ a kela Kwaama a bwa bɔ dwang a dul ka?

¹⁴ A fwaltǝmɔ gǝmɨ Kwaama a nʊng nyɔ gɔ na balɨ a bǝla yitʌn dulɔ a sʊ nyɨɨ, n jǝ gunidul. Mɨ nyɔ ka?

¹⁵ Na yitʌn dul nɔɔlɨ a sʊɨ, n jǝ bʊmɨ a daa gǝ woi. N kɛl sɔtǝm dul ja fɛ yitʌn dul gǝnɨ.

¹⁶ Na kaa nǝl saa gʊtǝm lɛɨ, a nǝnɔ nǝ nyǝm bɔ kaa jǝfʊlǝn. Mʊrkalɨ nǝb bwangtǝm Kwaamaɨ nyɔ tʌji.

Kaltǝm Jǝjalǝn Bʊʊlatǝm Nǝn Tɛlalɔɨ

¹⁷ A kɛl jʊ nɨ mǝ sʊwa jen sʊwa, mǝ buu jem bɔ kang, jʊ a bwɨɨ mʊrkalɨ jenɔ ke bɔ a nyan, na a bwɨla.

¹⁸ Na winɔ na jǝ́ mʊrkaɨ, n mʊrkalɨ nǝb bwangtǝm Kwaamaɨ, n nyʊwa gɔ gʊbkatǝmɔ wo a kʊm jen. N tǝl mǝ jǝla lɛ nǝn kɛl gɔ.

¹⁹ Mɨ nyǝmatǝm wo, jǝ́ nya nya gʊbkatǝm a kʊm jen, sǝ jǝ́ nyǝm nǝb nɨ Kwaama a jǝla nǝn ji a kʊm jeni.

²⁰ Na jǝ́ mʊrka daagɔ win jengɔ jǝ́ ja jǝjalǝn bʊʊlatǝm nǝn Tɛlalɔɨ, n ke bɔ jǝjalǝn bʊʊlatǝm nǝn Tɛlalɔɨ jǝ́ ja lɛɨ!

²¹ Jʊ a bwɨɨ a daa jatǝm, kaamɨ gǝ ja kʌshi jin kwaaji, kaa wɔ nyʊwa jʊwan nɛ, kaa wɔ a nɔɔ maa gǝn nɛ.

²² Mɨ jen nǝn lɔtɨn nɨ jǝ́ ja lɛ, jǝ́ nɔɔ lɛ woi ka? Jǝ́ soga mʊrkalɨ nǝb bwangtǝm Kwaamaɨ, jǝ́ nǝ nǝb nɨ mɨ nǝn kaa jǝlɨ gunidul ka? N wɛ mǝ sʊwa jen nɛɨ? Mǝ wana jen a dul jʊ nɨ jǝ́ maaɨ ka? Mɨ nyɔ! Mɨsɔ mǝ wana jen nɛ.

Jatǝm Kʊkkʊm Jǝbɔ Nɔɔtǝm A Kʌshi Tɛlalɔɨ

²³ Jʊ nɨ mǝ yo a daagɔ Tɛlalɔ woi nǝn gɔ mǝ nǝ jeni, gɔ, Tɛlalɔ bǝn Yesu a kum nɨ ja lungtom gǝnɨ, a do kʊkkʊmɔ.

²⁴ Kwama a buu Kwaama gǝm kangɨ, nǝngɔ a kǝlsa, a sʊwa gɔ, “Wʊnɨ n bʊtɔ mɨ, wʊnɨ mǝ nǝ jeni. Ya jǝ́ maa lɛ nyɔ sǝ ya jǝ́ bʊʊla lɛ nǝn mǝ.”

²⁵ A gul jǝjalǝnɔ gǝmɨ, nǝngɔ a do kʌshigɔ a sʊwa gɔ, “Kʌshi nɨ n swatǝm yaa fɨ, a wʊnɨ ja swa nǝn tʊʊm mɨɨ. Kwama nɨ gwam jǝ́ nɔɔm lɛ a kʌshi nɨɨ, bɛ jǝ́ nɔɔ sǝ jǝ́ bʊʊla nǝn mǝ.”

²⁶ Kwama nɨ gwam jǝ́ jam kʊkkʊm nɨ lɛ, jǝ́ nɔɔm lɛ a kʌshi nɨɨ, jǝ́ sʊwa bwaa Tɛlalɔɨ ba la nǝn bɛtǝm gǝnɔ.

Jatǝm Kʊkkʊm Jǝbɔ Nɔɔtǝm A Kʌshi Tɛlalɔɨ A Gola Nɨ Mɨ Dǝngdǝngɨɨ

²⁷ Nʊ nɨ a ja kʊkkʊm nɨɨ, a nɔɔ a kʌshi Tɛlalɔɨ a gola nɨ mɨ dǝngdǝngɨ, a maa bwɨlangkɛl, a kal bʊtɔ Tɛlalɔɨ jǝbɔ tʊʊm gǝnɔ.

²⁸ Bɛ ga fɛ ga fɨɨ dul gǝnɔ sǝla ga ja kʊkkʊmɔ, ga nɔɔ a kʌshigɔ gǝm.

²⁹ Nʊ nɨ gwam a ja kʊkkʊmɔ, a nɔɔ a kʌshi nɨ, a dʊʊl bɔ bʊtɔ Tɛlalɔɨ, a gʊ dul gǝnɔ gǝm borang a gola jatǝm jǝbɔ nɔɔtǝm nɨ ga maaɨ.

³⁰ N jʊ a bwɨ kaamɨ a lada nyɔ a kʊm jen jǝ daa bɔɔla lɛ mɨ ji nǝn kwaanɨ, kaamɨ a daa dumi.

³¹ Na bǝ fɨɨ dul bǝnɨ, mɨsɔ jǝ maa bǝm borang lɛ.

³² Na nǝn Tɛlalɔ maa bǝm borangɔ lɛɨ, bǝ nya mwɛtǝm lɛ, kage Kwaama a mwatɨ bǝm borang jǝbɔ tangǝn nǝbɔ yoolii nɨ.

³³ A na nyɔ, kɛtǝlam mɨ, na jǝ́ mʊrka jatǝm jǝjalǝnɨ, bɛ jǝ́ yamka.

³⁴ Na kaa nǝl nyʊwa jʊwan nɛɨ, bɛ ga ja a lɔ gɔ, kage mʊrkatǝm jenɔ a gʊ jem borang. Tangǝn kaam katɨgɔ, mǝ nǝ jen nǝ diil na n bɛɨ.