1 Korinti 10 - Dadiya NT

Gʊtǝm Lɔl A Dul Bwangtǝm Shom

¹ Mǝ swɨ lɛ jǝ́ nyǝm, kambɔ, tʊgalam bǝnɔ gwam ja bwangtǝn lul. Gwam jinɔ ja yab a mʊgɔ wɨma.

² Gwam jinɔ ja yʊ ji mwɛ sagsag a lul jǝbɔ wɨma, ja yǝlam nǝb bwangtǝm Musaɨ.

³ Gwam jinɔ n jǝjalǝn yʊwagɔ win Kwaama a nǝ ji ja jaɨ.

⁴ Gwam jinɔ n mwɛ yʊwagɔ win Kwaama a nǝ ji ja nɔɔɨ. Jʊ a bwɨɨ ja nɔɔ mwɛmɔ a sunte nɨ na a Kwaamaɨ, wʊnɨ a yɔ yɔm jǝbɔ jii. Sunte nɨ nǝn Kiristi.

⁵ Kwaama a maa bɔ fulotǝm nǝl wo dǝm nǝn kɔrɔ jinɔ. Nǝn gɔ a jʌbo ji a kuuli.

⁶ Kanjǝl nɨ n gʊtǝm lɔl a daa bǝn woi. Ka bǝ maa lɛ wɛl kanjǝl bwɨlantɨn kanga ja maaɨ.

⁷ Ka jǝ́ yǝlam lɛ nǝb bwangtǝm shom, na kaamɨ. A mʊla mʊlaɨ gɔ, “Nǝbɔ a yɨ jatǝm jǝjalǝn jǝbɔ nɔɔtǝm. Nǝngɔ ja gun ja ta yegɔ a kǝga shomi.”

⁸ Ka bǝ maa lɛ bulon kanga kaamɨ a maaɨ, wʊnɨ nǝbɔ fʊlkʊblǝnɔ fʊltiyo jeli taal (23,000) ja bʊla kumɔ wini.

⁹ Ka bǝ tɛl lɛ Tɛlalɔ na nɨ kaamɨ a maaɨ, sɔɔtɨnɔ a jʌbo jii.

¹⁰ Ka bǝ maa lɛ kʊngatǝm na wʊnɨ kaamɨ a maaɨ, bwɛ twama Kwaamaɨ nǝ jʌtǝmɔ a jʌbo jii.

¹¹ Jʊ nɨ a bwɨ nǝn ji gwam sǝ a yǝlam bǝm mɛlalɨ. Ja mʊla ji sǝ a gʊ bǝm lɔl, bǝn nɨ dɨltǝm yooli nɨ a bɛ bǝmɨ.

¹² Na gǝ na nyɨɨ, nʊ nɨ kuwo lɛ gɔ gǝ tɨɨ, bɛ ga nyǝm, kage ga yala.

¹³ Mɨ kaa tɛltǝm nɨ a nya jen a wʊnɨ ja maa bɔ nǝfili gǝm woi. Kwaama n nǝ yiitǝm swatǝm yaa. Mɨsɔ bǝla lɛ ja tɛl jen nǝn jʊ nɨ laa kwaan jenɔ lɛɨ. A tɛltǝmɔ gǝmɨ, maa jem maa gola nɨ jǝ́ jelʌm lɛɨ, sǝ jǝ́ bwa nǝlɨ.

¹⁴ Gǝ na nyɔ, fatǝlam mɨ nɨ mǝ swɨ lɛɨ, jǝ́ mwal bwangtǝm shomɔ.

¹⁵ Mǝ sʊwa jen kɛlɔ na nǝb nɨ nǝn yʊlanɨ. Jǝ́ dʌng nǝn kang jen jǝ́ kuwo, na jʊ mǝ sʊwa lɛɨ n bɨlǝngkɛlɨ.

¹⁶ Kʌshi buutǝm kang nɨ bǝ buum Kwaama gǝm kang lɛɨ, n ke bɔ jʊ a mʊrka bǝn a tʊʊm Kiristii ka? Kʊkkʊm nɨ bǝ kǝlsa lɛɨ, n ke bɔ jʊ a mʊrka bǝn a bʊtɔ Kiristii ka?

¹⁷ Kʊkkʊmɔ wo win, bǝn nɨ bǝ lada nyɨɨ, bǝ bʊtɔgɔ win, jʊ a bwɨɨ gwam bǝnɔ n kʊkkʊm nɨ win bǝ ja lɛɨ.

¹⁸ Jǝ́ dʌng gola nǝbɔ Israilaɨ. Nǝbɔ ja jʊ nɨ lɛ ja maam tǝlatǝm twamaɨ, n ke bɔ jʊ a mʊrka ji a daa twɨtǝm yulʌni ka?

¹⁹ N wɛ mǝ swɨ lɛ n sʊwaɨ? N jǝjalǝnɔ ja tǝlam shomɔ gǝm twamaɨ, nǝn gɔ n kaa jǝlɨ ka? N shomɔ n kaa jǝlɨ ka?

²⁰ Mɨ nyɔ! Mǝ nʊng mǝʊ jʊ nɨ Bʌtʌbɔ biyo lɛɨ, jǝ biyom nǝblaam. Ke bɔ a Kwaamaɨ. Mǝ swɨ bɔ jǝ́ yǝlam fatǝm yɨm jǝbɔ nǝblaamɔ.

²¹ A bʊm bɔ jǝ́ nɔɔ a kʌshi Tɛlalɔɨ, ba jǝ́ nɔɔ tag a kʌshi nǝblaamɨ. A bʊm bɔ jǝ́ ja a daa jatǝm Tɛlalɔɨ, ba jǝ́ ja tag a daa jatǝm nǝblaamɨ.

²² Jǝ́ dǝg Tɛlalɔ sǝ a maa nungon ka? Bǝ laa gǝn kwaan ka?

Maa Kanjǝl Na Dʊʊlǝn Kwaamaɨ

²³ “Kanjǝlɔ gwam n jǝ jǝlatǝm.” Ke bɔ kanjǝlɔ gwam n jǝ nyaɨ. “Kanjǝlɔ gwam n jǝ jǝlatǝm.” Ke bɔ kanjǝlɔ gwam bɛ lɛ nǝn mɔtǝmɨ.

²⁴ Ka kaa nǝl ya maa lɛ dul gǝnɔ gǝm jǝ nya kwaagɔ. Bɛ ga maa kambɔ gǝm tʌji.

²⁵ Jǝ́ ja nam nɨ gwam jǝ miyo lɛ a gamdʌboi, ka jǝ́ bʌ lɛ kɛl a dul gǝn, kage a yǝlam jem komʌn a mʊgɔ nǝl.

²⁶ A mʊla mʊlaɨ gɔ, “Yooligɔ na a Tɛlalɔɨ jǝbɔ kanjǝlɔ gwam a mʊgɔ gǝnɨ.”

²⁷ Na kaa nʊ nɨ n ke bɔ nǝ bwangtǝmɨ a jo jen jatǝm jǝjalǝnɨ, na jǝ́ jǝla jǝ́ yɔɨ, jǝ́ ja jʊ nɨ gwam ja nǝ jeni. Ka jǝ́ bʌ lɛ kɛl, kage jǝ́ nya komʌn a mʊgɔ nǝl jen.

²⁸ Na kaa nǝl a sʊwa jen gɔ, “Ja biyom shom jʊ nɨɨ,” ka jǝ́ ja lɛ, jǝ́ dʌng nʊ nɨ a sʊwa jeni nǝn bʊʊlalɨ mʊgɔ nǝl.

²⁹ Mǝ sʊwa bʊʊlalɨ mʊgɔ nǝl gǝn, ke bɔ a mɔ. Bʊʊlalɨ nǝlɨ mɨsɔ kal nyatǝm dul mǝndɨ lɛ.

³⁰ Na n buu Kwaama gǝm kang a jǝjalǝn mǝndɨ gǝm mǝ jaɨ, n wɛ a bwɨ jǝ́ tuwo i lɛ a jǝjalǝn nɨ mǝ ja nǝn buutǝm kang a daa Kwaama woi?

³¹ Na n nɔɔtǝmɨ, na n jatǝmɨ, na na kaa jǝl jǝ́ maa lɛɨ, jǝ́ maa gǝn gwam nǝn dʊʊlǝn Kwaamaɨ.

³² Ka jǝ́ yǝlam lɛ tɛl fǝtǝm naa a daagɔ Yahudawagɔ woi, jǝbɔ nǝbɔ Girikaɨ, jǝbɔ mʊrkalɨ nǝb bwangtǝm Kwaamaɨ.

³³ Mǝ maa sǝ n fulo nǝbɔ gǝm nǝl a mʊgɔ kanjǝlɔ gǝm gwam mǝ maa lɛɨ. Ke bɔ dul mɨ mǝ saam lɛɨ. Mǝ maa nyɔ a dul nǝbɨɨ a lada sǝ ja nya bʊʊtǝm.