1 Korinti 1 - Dadiya NT

Yaltǝm

¹ Nǝmǝ mǝ Bulus, wʊnɨ Kwaama a jo i nǝn jǝlatǝm gǝn sǝ n yǝlam bwɛ twama Kiristi Yesui. Nǝmǝ nǝbɔ kɨla bǝn Sastanisu,

² nǝn mʊla mʊrkalɨ nǝb bwangtǝm Kwaamaɨ nɨ gǝm lɛ a Korintii. Kwaama a jo jen sǝ jǝ́ yǝlam nǝb sagsag, a dǝg jen jǝ́ yǝlam nǝb sagsag a mʊgɔ Kiristi Yesui, kanga a maam nǝb bwangtǝmɔ gǝm gwam a daatɨnɔ gǝm gwamɨ, nʊ nɨ jo dun Tɛlalɔ bǝn Yesu Kiristii lɛɨ, Tɛlalɔ ji jǝbɔ a nǝnɔ.

³ Bɛ lǝmagɔ jǝbɔ yɨm kwamɨgǝn a Kwaama Tɛtɛ bǝnɨ jǝbɔ a Tɛlalɔ Yesu Kiristii a yɨ jǝbɔ jen.

Bulus A Buu Kwaama Gǝm Kang

⁴ Mǝ buu Kwaama gǝm kang lɛ kwangkwang a dul jen, a kɛl dul lǝma nɨ a maa jem a gola Kiristi Yesui.

⁵ Kwaama a nǝ jen bwili a golantɨn nɨ gwam a gola gǝn, a sʊwatǝm kɛl jǝbɔ nyǝmtǝm pʌd.

⁶ Jʊ nɨ gǝ nʊng, jʊ mǝ sʊwa jen nɛ a dul Kiristii n bɨlǝngǝn.

⁷ A jenɔ jǝ́ ke bɔ nǝb gɨyatǝm a gola nǝtǝm lǝma nɨ Yʊwa Kwaamaɨ a nǝ jeni, kanga jǝ́ yam bɛtǝm Tɛlalɔ bǝn Yesu Kiristii lɛɨ,

⁸ wʊnɨ kwam jem nǝl lɛɨ, a yɔ nǝn a dɨltǝmɨ. Ka jǝ́ yǝlam jǝ tuwol nǝn kwama Tɛlalɔ bǝn Yesu Kiristi bɛm lɛɨ.

⁹ Kwaama n nǝ yiitǝm swatǝm yaa. Nǝn gɔ a jo jen a yɨm dakini jǝbɔ Bʊla gɔ Yesu Kiristi Tɛlalɔ bǝnɨ.

Beltǝmɔ A Kʊm Mʊrkalɨ Nǝb Bwangtǝm Kwaamaɨ

¹⁰ N kela jen kɛtǝlam mɨ, a mʊgɔ dun Yesu Kiristi Tɛlalɔ bǝnɨ, pʌd jenɔ bɛ nyiyo jenɔ a yǝlam win. Ka beltǝm ya dɔ lɛ kʊm jen. Bɛ jǝ́ mʊrka dul, bʊʊlalɨgɔ win, maajɨgɔ win.

¹¹ Jʊ a bwɨ mǝ sʊwa nyɨɨ kɛtǝlam mɨ, kaamɨ nɨ a lɔ Kuluwii ja kiyo mɨ gɔ, gʊbkatǝmɔ wo a kʊm jen.

¹² Jʊ mǝ swɨ lɛ n sʊwaɨ, nǝn gɔ, pʌd jenɔ jǝ́ sʊwala katɨgɔ lɛ nǝn dʌmʌn jengɔ, “Mǝ nǝ bwangtǝm Bulusi,” kaa gɔ, “Mǝ nǝ bwangtǝm Afolosi,” kaa gɔ, “Mǝ nǝ bwangtǝm Kefasɨ,” kaa tag gɔ, “Mǝ nǝ bwangtǝm Kiristii.”

¹³ Kiristi nɨ a bel nǝn dʌmʌn ka? Nǝn Bulus ja kʊʊ a dʌbʌl tɨya a kɛl dul jeni ka? Ja yʊ jen mwɛ sagsagɔ sǝ jǝ́ yǝlam bɛtɔ mɛlalɨ Bulusi ka?

¹⁴ N buu Kwaama gǝm kang mǝ yʊ bɔ kaa nǝl win mwɛ sagsag a kʊm jen na ke bɔ Kiribus jǝbɔ Gayusi,

¹⁵ kage kaa nǝl a kʊm jen a sʊwa gɔ, mǝ yʊ jen mwɛ sagsagɔ nǝn dun mɨ.

¹⁶ Bɨlǝngǝn, n yʊ nǝbɔ lɔ Istifanusi mwɛ sagsag tag. Na ke bɔ nǝb nɨɨ, mǝ nyǝm bɔ kɛna n yʊ kaa nǝl mwɛ sagsag woi.

¹⁷ Kiristi a twam ɨ bɔ gɔ n yʊ nǝbɔ mwɛ sagsag. A twam ɨ gɔ n kiyo fulon kɛl lǝmɨ, ke bɔ a dul yʊlan sʊwatǝm kɛl, kage ja dǝg kwaan tɨya kʊʊtǝm Kiristii a yǝlam jǝl nǝn kwan.

Kiristi N Kwaan Kwaamaɨ Jǝbɔ Yʊlan Gǝnɔ

¹⁸ Kɛl kʊʊtǝmɔ, n kɛl fʌmʌn a nǝb nɨ a gola kalatǝmɨ. N kwaan Kwaamaɨ a daa bǝn woi, bǝn nɨ ja bʊʊ nǝn bǝnɨ.

¹⁹ A mʊla mʊlaɨ gɔ, “Mǝ kal kal nyǝmtǝm nǝb nyǝmtǝmɨ, mǝ falam falam nǝb nɨ kuwo lɛ gɔ ji nǝn yʊlanɨ.”

²⁰ Nǝb yʊlanɔ jǝ na a fee? Nǝb nyǝmtǝmɔ n fee? Nǝb gʊbkatǝm kɛlɔ a dul yooli nɨ n fee? Kwaama a dǝg nyǝmtǝm nǝbɔ yooli nɨɨ a yǝlam jǝ fʌmʌn, mɨ nyɔ ka?

²¹ Kanga Kwaama a mʊgɔ nyǝmtǝm gǝn a bʊʊla gɔ, yooligɔ mɨsɔ nyǝm gǝn nɛ a gola yʊlan jin. Nǝngɔ Kwaama a nyʊwa lǝma bʊʊtǝm nǝb nɨ a nǝ bɨlǝngkɛl a gola kiyotǝm fulon kɛl lǝmɨ nɨɨ, wʊnɨ kaam nǝbɔ kuwo lɛ na jǝ fʌmʌni.

²² Yahudawagɔ n maatǝm jǝ laatǝm kang jǝ swɨ lɛ ja kuwoi. Nǝbɔ Girikaɨ n nyǝmtǝm jǝ swɨ lɛ jǝ nyaɨ.

²³ Nǝn nǝn kiyo kɛl Kiristii nǝ kʊʊtǝm, wʊnɨ a dǝg Yahudawagɔ a fǝ naaɨ, n jǝ fʌmʌn a daagɔ Bʌtʌbɔ woi.

²⁴ A daagɔ nǝb nɨ Kwaama a jo joi, Yahudawagɔ jǝbɔ nǝbɔ Girikaɨ pʌd yo, Kiristi n kwaan Kwaamaɨ jǝbɔ yʊlan Kwaamaɨ.

²⁵ Jʊ nɨ nǝbɔ kuwo lɛ na jǝ fʌmʌn a daagɔ Kwaama woi, a laa laaɨ kwaan yʊlan nǝfilii. Jʊ nɨ jǝ kuwo lɛ na jǝ gɨyatǝm a daagɔ Kwaama woi, a laa laaɨ kwaan nǝfilii.

²⁶ Jǝ́ dʌng jotǝmɔ ja jo jeni kambɔ. A kʊm jen ja jo bɔ nǝb nyǝmtǝm yooligɔ a lada, nǝb kwaan fɔlɔnɔ a lada bɔ tʌji, bɛtɔ nǝb dʊʊmɨ a lada bɔ.

²⁷ Kwaamagɔ a jǝgǝm jǝ fʌmʌnɔ a yooli nɨ sǝ a nǝ nǝb nyǝmtǝmɔ gunidul. Kwaama a jǝgǝm jʊ nɨ gɨya gɨyaɨ a yooli nɨ sǝ a nǝ nǝb kwaanɔ gunidul.

²⁸ Kwaama a jǝgǝm nǝb nɨ mɨ a nyiyo jǝlɨ, jǝbɔ nǝb nɨ yooligɔ a kɔɨ, jǝbɔ kanjǝl nɨ mɨ woi, sǝ a kalǝm kanjǝl nɨ woi.

²⁹ Kwaama a maa jʊ nɨ kage kaa nǝl a maa lɨyal a kǝga gǝn.

³⁰ Nǝn Kwaama a dǝg jǝ́ yǝlam a mʊgɔ Kiristi Yesui. Nǝn Kwaama tag a dǝg Kiristi a yǝlam nǝ yʊlan a daa bǝn woi. N daagɔ Kiristi woi bǝ nya dǝngdǝng Kwaamaɨ lɛɨ, sagsag Kwaamaɨ jǝbɔ jǝgtǝm dul.

³¹ A mʊla mʊlaɨ gɔ, “Nʊ nɨ maa lɨyal lɛɨ, bɛ a maa lɨyal nǝn jʊ nɨ Tɛlalɔ a maaɨ.”