Zephaniah 3 - De Beebaa Dabu

De haisala ma de hagaola o Jerusalem

¹ E vakaa naa de aduhale hagamanege ma de hakino gee, gai se aduhale e vaivai haia dangada!

² Se aduhale e dee hagallongo ange gi dahi, ma tee malangilangi i de hagaheohi a dahi ia. Gai ia e dee hagadonu Tagi Maolunga, gai e dee lodo e hagabaa ange gi dono Maadua.

³ Denga dangada aamua e bei denga laiono e hagangolo laa, ono dagi e bei denga wolf i de ahiahi, gilaadeu e dee dugu hanu mee gi doe gi taiao age.

⁴ Denga pelaabisi i kilaa e llodo maolunga ma tee hai hegau i de muna abodonu. Ono gau haimeedabu e hagangadi mee denga mee dabu, ma de oha de hainga.

⁵ Aagai Tagi Maolunga e noho laa i kilaa e heohi, ia e dee hai hegau i de mee dee heohi. Daiao alodahi gai ia e hagamodu muna i de heohi, gai ia e dee tuu donu de hai mee nei i laangi alodahi; aagai de gau baubau e dee dookaa donu.

⁶ “Au gu hai gi llilo denga huaahenua; olaadeu mommee buibui makaga gu maoha. Au gu hai gi ngadi daakodo olaadeu haiava, gu deai donu dangada e seesee i kilaa. Olaadeu aduhale gu lava i de oha; gai e deai naa donu dangada e doe — gu deai donu dangada iai.

⁷ Au ne hagadaba, ‘Koe e madagu naa i de au ma de malangilangi i dagu hagaheohi goe!’ Gai ono mommee nnoho tee oha, bei mee alodahi aagu ne hagatau e hai ange gi de aduhale. Aagai gilaadeu ne kii ange de llodo i hai hegau hakino gee alodahi alaadeu ne hai.

⁸ Deenei ai, goodou daalia mai au, go Tagi Maolunga e hagadaba, de laangi laa gai au e duu age naa ga hagabaubau goodou. Au gu baba ange e hagabuni denga huaahenua, ma denga nohoanga hodooligi, gai au ga hagaduasala ai gilaadeu i dogu lili — ma dogu bole alodahi. Henua i lalo alodahi e oha ga odi i de ahi o dogu lili i hiidinga dogu lodo gaiaa.

⁹ Gai au e ahe ange naa ga sui denga huaadangada, ma de hagagilimalali alaadeu muna e tala, gai gilaadeu alodahi e dalodalo naa i de ingoo o Tagi Maolunga ma de daumaha ange gi de ia i de lodo daudahi.

¹⁰ Gai dangada e daumaha mai laa gi de au, go ogu dangada gu mavaevae saele laa, e loomai naa i de baasi laa denga saalingaa vai o Ethiopia, ga gaamai denga sigidaumaha gi de au.

¹¹ De laangi laa, gai koe e dee dogaa naa, i hiidinga o au hegau, go mee oou ne haisala mai ai gi de au, go hiidinga au e kave gee mai naa i oo daha de gau pasa hagamaolunga. Gai koe e dee aahe ange e hagamaolunga i honga dogu mounga dabu.

¹² Aagai au e dugu naa i oo daha gilaadeu e duasala ma de hagaau aloha, go gilaadeu e hagadonusia de ingoo o Tagi Maolunga.

¹³ Gai dangada o Israel e doe e dee hai naa donu de mee dee heohi; gilaadeu e dee tala naa donu denga muna hhadu, gai e deai naa hogi se muna hagasenga alaadeu e tala. Gilaadeu e gaimee naa ma de daakodo iho i de baba, gu deai dangada e haia gilaadeu gi maatagu.”

¹⁴ Tamaa hine o Zion, daahili; Israel, hagalaumalie ina doo leo e oo ai! Tamaa hine o Jerusalem, koe gi malangilangi ma de lodo danuaa i oo lodo alodahi!

¹⁵ Tagi Maolunga gu kave gee doo hagaduasala, ia gu hai gi aahe dua oo hagadaumee. Tagi Maolunga, de Hodooligi o Israel, e noho madali goe; gai koe e dee madagu ange naa donu i dahi mee hai ngadaa.

¹⁶ Gai dangada e hai ange naa gi Jerusalem i de laangi laa, “Zion, aude madagu; gai luoo lima gi dee baageaa.

¹⁷ Tagi Maolunga, doo Maadua e noho madali goe, gai e mmahi i de hagaola goe. Ia e malangilangi mmao donu i de goe, gai ia e hagaaneane naa goe i dono aloha; ia e malangilangi naa ma de daahili i oo hiidinga.”

¹⁸ “Au e hagabuni mai naa gilaadeu e daemaha laa i hiidinga tee daohi o denga daonga gu hagailonga laa; gai gu ni mee hagadaemaha ma de hagadookaa adu gi goodou.

¹⁹ Tilo, de masavaa laa gai au e hagaduasala naa gilaadeu alodahi ne vaivai haia goe. Au e hagaola naa tangada balagelage ma de hagabuni mai dangada gu mavaevae saele laa. Au e hai naa dangada gi duuhia ma de hagadubu gilaadeu, i henua alodahi olaadeu ne hagadookaa ina ai laa.

²⁰ De masavaa laa gai au e hagabuni naa goodou, ga gaamai gi doodou henua i de masavaa laa. Au e hai naa denga huaadangada alodahi i henua i lalo gi duuhia ma de hagadubu goodou, i de masavaa aagu e hagaahe adu ai doodou manuuia, gi gidee ai e goodou,” go Tagi Maolunga e hagadaba.