Zephaniah 2 - De Beebaa Dabu

De hagahi dangada o Judah gi daahuli

¹ De huaahenua hagadookaa, goodou hagabuni, goodou hagabuni,

² i mua de dae mai o de masavaa gu hagasauaa laa, i mua de laangi o denga gili grain e ilihia laa ga gaavee, i mua de dae mai gi goodou de lili laumalie o Tagi Maolunga, i mua de dae mai gi goodou de laangi o de bole o Tagi Maolunga.

³ Goodou saalaa Tagi Maolunga, alodahi e daudonu i honga de henua, ma de daudali i ana muna. Goodou saalaa de mee heohi, saalaa de lodo maolalo; kana adu ia e buibui naa goodou, i de laangi o Tagi Maolunga e bole ai.

De hagaduasala o Philistia

⁴ Gaza e deai naa dangada e nnoho ai gai Ashkelon e maoha naa ga ngadi dagodo. Dangada o Ashdod e gaavee gee naa i de madohi lua o de laangi gai Ekron e oohaa naa.

⁵ E vakaa naa goodou e nnoho i tagudai, de huaahenua o de gau Kereth; muna a Tagi Maolunga e hai baasi adu gi goodou, Canaan, de henua o de gau Philistia: “Au e oha naa goe, ga dae ai gi teai dangada e doe.”

⁶ De henua i gaogao tagudai e hai naa ga se mommee iai denga helii, gai se mommee ange gi de gau hagaloosi ssiibi aama buibui o denga ssiibi.

⁷ Gai dangada e doe i Judah e henua ai naa; gilaadeu e dugu naa alaadeu ssiibi i kilaa. Gilaadeu e daakodo iho naa i de ahiahi i lodo hale o de gau Ashkelon. Gai Tagi Maolunga, delaadeu Maadua e tilo ange naa gilaadeu, ma de hagaahe mai delaadeu manuuia.

De hagaduasala o Moab ma Ammon

⁸ “Au gu langona de hagammae manava a de gau Moab ma de gau Ammon ogu dangada, i delaadeu hagammae manava dogu huaadangada ma de pasa hagamaolunga i delaadeu henua.

⁹ Deenei ai, au e hagatoo donu i dogu mouli, go Tagi o denga hagabuulinga hebagi, de Maadua o Israel e hagadaba: Moab e bei naa donu dagodo o Sodom, de gau Ammon e bei naa dagodo o Gomorrah — se henua iai denga helii ma haonga iai soolo, gai e ngadi dagodo naa ga hano ai. Dangada e doe i ogu dangada e hai gi de mahi naa olaadeu goloa; dangada e ola i dogu huaahenua e kave naa delaadeu henua.”

¹⁰ Deenei delaadeu hagaoanga e sui ange ai delaadeu hagamaolunga, i hiidinga delaadeu hagammae manava ma de hakadanga i dangada o Tagi o denga hagabuulinga hebagi.

¹¹ Tagi Maolunga e hagalele mouli i dono hai baasi ange gi gilaadeu, i de masavaa aana e oha ai denga diinonga alodahi o de henua. Denga huaahenua alodahi e daumaha ange naa gi de ia, dahi ma dahi i dono henua donu.

De hagaduasala o Ethiopia ma Assyria

¹² “De gau Ethiopia, goodou e bei naa hogi olaadeu dagodo, goodou e daa naa ga maakau i de gadilaasa.”

¹³ Ia e hebagi ange naa gi denga henua i ngaiho, ma de oha Assyria; Nineveh e hai naa ga ngadi dagodo, gai gi se vao e deai vai iai.

¹⁴ Denga hagabuulingaa ssiibi ma kaau e nnoho naa i kilaa, ma hagadaagangaa manu lodo henua alodahi. De owl lodo henua ma de owl e goo laa e toga naa i honga ono duludulu gu baakuu laa. Gilaadeu e koo saele laa i magavaa o denga abaaba vaaligiligi, gai denga haitoga e hoohonu naa i denga gainga, gai denga laagau cedar e deai naa mee e haolia.

¹⁵ Deenei de aduhale nogo duuhia laa ono dagodo, ma de noho baba i mua, ma de hagadaba i ono lodo, “Go au tahi, gai e deai ange donu e bei ogu dagodo.” Iainei de aduhale laa gu maoha ma e dagodo ai, gai gu se mommee e nnoho ai denga manu aada! Alodahi e seesee laa ono gaogao e doo mee naa ma de tugi ange olaadeu lima.