Zephaniah 1 - De Beebaa Dabu

¹ Tagi Maolunga ne hagaago ange ana muna gi Zephaniah, tama daane a Cushi, tama daane a Gedaliah, tama daane a Amariah, tama daane a Hezekiah, i laangi o Josiah, tama daane a Amon, e hodooligi ai i Judah.

De hagaduasala o Judah gu dai dae mai

² “Au e oha naa mee alodahi i honga de henua, go Tagi Maolunga e hagadaba.

³ Au e daa naa dangada ma manu dolodolo alodahi; au e daa naa gi maakau denga manu llele i lo te moana ma denga mamu i lo te dai. De gau baubau e bei naa denga hagabuudungaa gainga, i de masavaa aagu e daa ai gi maakau dangada i honga henua i lalo, go Tagi Maolunga e hagadaba.

⁴ Au e hagaabo naa dogu lima e hai baasi ange ai gi Judah ma dangada alodahi e nnoho i Jerusalem. Au e hai naa gi deai se mommee daumaha o Baal e doe, ma ingoo o de gau henua gee aama de gau haimeedabu o denga diinonga —

⁵ go gilaadeu e ino gi lalo i tua denga hale ma e daumaha ange gi denga heduu i lo te langi; ma dangada e ino ange ma de hagatoo donu i de ingoo o Tagi Maolunga aagai e hagatoo donu hogi i de ingoo o Milcom,

⁶ ma gilaadeu e daahuli gee gu dee daudali ange i Tagi Maolunga, aagai e dee ssala hogi Tagi Maolunga, aabe e dangidangi ange gi de ia i de bale.

⁷ Goodou gi dee mmuu i mada luu mada o de Ia Aamua go Iahweh, go hiidinga de laangi o Tagi Maolunga gu baa mai donu. Tagi Maolunga gu hagadabena dahi sigidaumaha; ia gu hagadabu gilaadeu aana gu ssala ange.

⁸ De laangi o ssigidaumaha a Tagi Maolunga, gai au e hagaduasala naa denga dagi ma dama a de hodooligi aama gilaadeu alodahi e kahu i malo mai i denga henua gee.

⁹ De laangi laa, gai au e hagaduasala naa dangada alodahi e dee llaga laa honga de laagau i ma te abaaba, go dangada e haoa de hale o olaadeu dangada aamua i goloa alaadeu e mau i de vaivai hai ma de daahanga dangada.

¹⁰ De laangi laa, go Tagi Maolunga e hagadaba, gai de tangi o dangada e langona naa i de Haitoga o denga Mamu, ma de tangi ssee o dangada i de mommee hoou o de aduhale, aama de saamumu mai mee i denga duuduu.

¹¹ Dangada e nnoho i de mommee hagao mee, goodou tangi see; go hiidinga de gau hagao mee e maakau naa, gai alodahi e hagao mee i selevaa gu odi hogi i teai.

¹² De masavaa laa, gai au e ssala naa mee i Jerusalem i denga laama, ma de hagaduasala dangada e maanadu laa bolo gilaadeu e danuaa donu huu, go gilaadeu e hagataba laa i olaadeu lodo, ‘Tagi Maolunga e deai naa donu ana mee e hai i mee nei.’

¹³ Goloa o dangada bee nei e gaiaadia naa, olaadeu hale e odi naa i de oha iho. Gilaadeu e hagatuu naa denga hale, aagai gilaadeu e dee nnoho ai; gilaadeu e doo naa denga veelengaa grape, aagai gilaadeu e dee unu uvaini e hai ai.”

De laangi maolunga o Tagi Maolunga

¹⁴ De laangi maolunga o Tagi Maolunga gu baa mai, gu baa mai donu, gai e moolau mai naa donu. De tangi o dangada i de laangi o Tagi Maolunga e kona naa donu; denga daane hebagi e tangi naa hogi.

¹⁵ De laangi laa se laangi niio de bole — se laangi hagamaatagu ma de hagamanavasaa, se laangi hai ngadaa gai e oha ai mee alodahi, se laangi gohu ma tee maalama, se laangi hagausinga ina ma de gohu boo dangodango,

¹⁶ se laangi e ili ai de hanga manu ma de hagailoo ai de hai de hebagi, e hai baasi ange ai gi denga aduhale buibui ma denga hale dagitilo maolunga.

¹⁷ Au e hagahai ngadaa naa dangada, gai gilaadeu e seesee saele naa bei dagodo o de gau dee kide, go hiidinga gilaadeu gu haisala ange gi Tagi Maolunga. Olaadeu dodo e hagassii saele naa bei de mama o de gelegele, gai olaadeu angaanga e bei naa denga mee hakino gee.

¹⁸ Alaadeu selevaa ma alaadeu goolo e dee maua naa donu i de hagaola gilaadeu i de laangi o Tagi Maolunga e bole ai. Dono magiaa e bei naa de ahi e dudu naa ga odi henua i lalo alodahi, gai ia e moolau naa donu dana daa ga maakau dangada alodahi i henua i lalo.