Zechariah 9 - De Beebaa Dabu

De hagaduasala o hagadaumee o Israel

¹ Muna hagadaemaha a Tagi Maolunga i dagodo o de henua o Hadrak ma de aduhale go Damascus. Go hiidinga dangada ma aamuli o Israel alodahi e daumada Tagi Maolunga.

² Gai niiona hogi Hamath, e baa ange laa gi Hadrak, ma Tyre aama Sidon, e dee galemu donu delaadeu heiangi.

³ Tyre ne hagaduu age dono buibui, ma de hagabudu selevaa lagolago bei gelegele, ma goolo lagolago bei gelegele i honga denga haiava.

⁴ Aagai de Ia Aamua e kave gee naa dono lava ma de kave gee ono mahi i honga tai, gai de aduhale e dudu naa i de ahi.

⁵ Ashkelon e madagu naa i dana gidee mee nei; Gaza e mmae naa hogi ma de duasala; gai e bei ai hogi Ekron, go hiidinga gu deai sana tali. Gaza e deai naa sono hodooligi; gai Ashkelon e deai naa dangada e nnoho ai.

⁶ De gau henua gee e loomai naa ga nnoho i Ashdod; gai au e oha naa de mee a de gau Philistia e tuhi laa.

⁷ Au e hai naa gilaadeu gi dee gaina kano manu iai dodo, gai gi deai mee hakino gee alaadeu e gai. Dangada e doe e hai naa ga ni dangada niio taadeu Maadua; gilaadeu e bei naa donu dahi aamuli o Judah, Ekron e bei naa dagodo o de gau Jebus.

⁸ Aagai au e duuli naa dogu hale, ma de tilo gi deai hagabuulinga hebagi e ulu ai. E deai ange naa hogi daane hebagi e vaivai haia ogu dangada, go hiidinga iainei gai au gu dagitilo gilaadeu.

De humai o de hodooligi o Zion

⁹ Tamaa hine o Zion, koe gi malangilangi! Tamaa hine o Jerusalem, koe gi oo i doo malangilangi! Tilo, doo hodooligi e humai naa gi oo daha; ia e heohi gai de hagaola i ono daha, ia e daudonu gai e gage i honga dahi donkey, ma dahi manu gauligi, go tama a dahi donkey.

¹⁰ Au e hai naa gi deai hada hebagi o Ephraim ma hoosa hebagi i Jerusalem, ma de hhadi de mee hholu e hai ai de hebagi. Ia e hai naa gi noho paba denga huaahenua; gai ia e dagi naa mai i tai ga dae ai gi tai ange laa, ma mai i ssaalingaa vai go Euphrates, ga dae ai gi de bido laa o henua i lalo.

¹¹ Gai oodou dagodo, go hiidinga dagu hagatoo donu hagaheloongoi ne hai i dodo, deenei ai, au e hagassao mai naa oodou dangada i lo te geelonga e deai vai iai.

¹² Goodou e nnoho i lo te hale pono, e dahi donu oodou tali, aahe gi de mommee buibui makaga; ailaa nei gai au e tala adu bolo au e hagaahe adu naa doodou manuuia ga hai gi lua hanonga e kii ange ai.

¹³ Au e hholu naa Judah e hai ai dagu mee hholu; au e hai naa Ephraim go ono dao. Zion, au e hai naa oo daane gi hebagi ange gi Greece, ma de hai goe gi bei de gadilaasa a dahi daane hebagi mmahi.

De hagasula mai o Tagi Maolunga

¹⁴ Gai Tagi Maolunga e hagasula mai naa i honga ono dangada, gai tao o dana mee hholu e gemo bei de uila. De Ia Aamua go Iahweh e ili naa de hanga manu; ia e hano naa e hebagi bei dagodo o ssio e humai laa i ngaage,

¹⁵ gai Tagi o denga hagabuulinga hebagi e buibui naa gilaadeu. Gilaadeu e daa naa dangada ma de hagadee kii gilaadeu i denga buada. Gilaadeu e unu naa ma de hevaalogi bei dagodo o dangada gu ssenga i de unu uvaini; gilaadeu gu hoohonu bei de gumedi iai laa dodo e hagassii ange laa gi dege o de mommee o ssigidaumaha.

¹⁶ De laangi laa gai Tagi Maolunga delaadeu Maadua e hagaola naa gilaadeu, bei de hagabuulinga o ono dangada. Gilaadeu e hai naa ga maalama i honga dono henua bei dagodo o denga hadu hagamogomogo i de hau hodooligi.

¹⁷ Ga dae laa de tilo danuaa ma de mahamaha ono dangada! Hua o denga grain e hai naa ga mmahi denga dama daane, gai denga uvaini hoou e hai naa ga mmahi denga damaa hine.