Zechariah 8 - De Beebaa Dabu

De hagatoo donu o de hagamanuuia o Zion

¹ Tagi o denga hagabuulinga hebagi ne hagaago mai ana muna, ga hai mai,

² “E hagadaba Tagi o denga hagabuulinga hebagi: Au gu kona donu dogu maagoda i hiidinga o Zion; au gu lili mmao i ono hiidinga.

³ E hagadaba Tagi Maolunga: Au e ahe mai naa gi Zion, ga noho i Jerusalem, gai Jerusalem e hagaingoo ange naa go de aduhale o de muna abodonu, gai de mounga o Tagi o denga hagabuulinga hebagi e hagaingoo ange go de mounga dabu.

⁴ E hagadaba Tagi o denga hagabuulinga hebagi: Denga daane ma haahine madumaatua e aahe ange naa ga nnoho i gaogao denga haiava o Jerusalem, dahi ma dahi e poo naa dono dogo i dono lima i hiidinga gilaadeu gu madumaatua.

⁵ Honga denga haiava o Jerusalem e soa naa gauligi haahine ma gauligi daane e hagadaahao ai.

⁶ E hagadaba Tagi o denga hagabuulinga hebagi: De mee nei se mee donu hai ngadaa i daho dangada e doe i laangi laa, aagai e aha, se mee hai ngadaa de mee nei i ogu daha? go Tagi o denga hagabuulinga hebagi e hagadaba.

⁷ E hagadaba Tagi o denga hagabuulinga hebagi: Tilo, au e hagaola naa ogu dangada mai i denga henua i dua ma henua i dai,

⁸ ga hagaahe mai gilaadeu gi nnoho i Jerusalem. Gilaadeu e hai naa go ogu dangada, gai au go delaadeu Maadua, i de muna abodonu ma de heohi.

⁹ E hagadaba Tagi o denga hagabuulinga hebagi: Goodou alodahi ne langona laa muna nei i daho denga pelaabisi, i de laangi ne hagadagodo ai tagelo o de hale o Tagi o denga hagabuulinga hebagi, goodou gi lodo mmahi gi maua ai i de hagaahe age de temple.

¹⁰ Laangi i mua, gai e deai donu se dangada e hagao ina tangada aabe go de manu aana e hagahai hegau laa. E deai hogi se dangada e baba ono lodo i dono hano saele, i hiidinga o de hagadaumee, go hiidinga au ne hai gi hagadau hai baasi dangada.

¹¹ Aagai iainei au gu dee hai dangada e doe i de gau nei bei dagu hai ne hai ai dangada i laangi i mua, go Tagi o denga hagabuulinga hebagi e hagadaba.

¹² Gilaadeu e doo naa denga golee i de masavaa o de nnoho paba. De grapevine e hua naa, gai de gelegele e lagolago naa huamanu e maua ai, gai de maluulu o taiao e hano iho naa i de langi ga hagamaluulu de gelegele. Au e gaavange naa gi dangada e doe mee nei alodahi.

¹³ Dangada o Judah ma dangada o Israel, i mua gai goodou se muna hagamalaia i daho denga huaahenua, aagai iainei au gu hagaola goodou e hai gi se mee hagamanuuia. Goodou aude maatagu, aagai gi lodo mmahi.

¹⁴ E hagadaba Tagi o denga hagabuulinga hebagi: Au gu baba donu dagu maanadu e gaamai de hai ngadaa gi goodou i de masavaa o oodou dubuna madagidagi ne hai ai au ga lili, go Tagi o denga hagabuulinga hebagi e hagadaba,

¹⁵ aagai e bei ai hogi, iainei gai au gu baba ange hogi e hai ange tanuaa gi Jerusalem ma dangada o Judah; goodou aude maatagu.

¹⁶ Gai aanei oodou mee e hai: goodou hagadau daalaa de muna abodonu i oodou magavaa, ma de hai hegau i de hagamodu muna heohi i de mommee hagamodu muna, e haia laa ga nnoho paba dangada.

¹⁷ Goodou aude hagasaelea de hagadau hai de baubau i oodou magavaa, goodou aude llodo e hai denga hagatoo donu hadu muna, go hiidinga au e kino i mee nei alodahi,” go Tagi Maolunga e hagadaba.

¹⁸ Gai gu hagailoo mai ange muna a Tagi o denga hagabuulinga hebagi gi de au, ga hai mai,

¹⁹ “E hagadaba Tagi o denga hagabuulinga hebagi: Denga hagahiikai i de haa, ma de lima, ma de hidu, aama de madaangahulu malama, e hai naa ga se masavaa e malangilangi ai ma de lodo danuaa ai dangada, gai ni daonga hagamalangilangi niio Judah. Deenei ai, goodou gi llodo i de muna abodonu ma de nnoho paba.”

²⁰ E hagadaba Tagi o denga hagabuulinga hebagi: “Denga huaahenua ma dangada e nnoho i aduhale lagolago e loomai naa;

²¹ dangada o dahi aduhale e loomai naa ga hai ange gi dangada i dahi aduhale ange laa, ‘Gidaadeu ga hagamoolau e hulo e dangidangi ange gi Tagi Maolunga gi abodonu mai gi gidaadeu, ma de ssala Tagi o denga hagabuulinga hebagi; gai au e hano naa donu.’

²² Dangada soa ma huaahenua mmahi e loomai naa e ssala Tagi o denga hagabuulinga hebagi i Jerusalem, e dangidangi ange ia gi abodonu ange gi gilaadeu.

²³ E hagadaba Tagi o denga hagabuulinga hebagi: laangi laa gai e dinoangahulu naa dangada mai i denga huaahenua, e pasa laa i muna henua gee, e poo naa de malo laa daha o dahi dangada Ssuu, ga hai ange, ‘Gimaadeu e hulo madali goe, go hiidinga gimaadeu gu langona bolo de Maadua e noho i oo daha.’ ”