Zechariah 6 - De Beebaa Dabu

De midi o denga hada hebagi e haa

¹ Au ne galo age ange ga gidee e haa hada hebagi e ssao mai i magavaa o e lua mounga; gai luu mounga laa e hai i denga bronze.

² Tahi hada hebagi ni hoosa mmea e daangia, gai de lua hada hebagi ni hoosa uli;

³ tolu hada ni hoosa tea, gai de hagahaa hada ni hoosa daubulebule.

⁴ Gai au ga hai ange gi tangada de langi e pasa laa gimaau, “Dogu dangada aamua, aahee hagadoonunga o denga hoosa nei?”

⁵ Tangada de langi laa ne hai mai gi de au, “Aanei denga madangi e haa o de langi ne ssao mai laa i dua delaadeu hulo gi mada i mua o de Ia Aamua o henua i lalo alodahi.

⁶ De hada hebagi iai laa denga hoosa uli e hano naa gi denga henua i ngaiho, denga hoosa tea e hulo gi dai, gai denga hoosa daubulebule e hulo gi ngaage.”

⁷ De masavaa o denga hoosa mmahi laa ne ssao mai ai, gai gilaadeu gu uluhia ange donu e hagadaga saele i henua i lalo. Gai tangada de langi laa ne hai ange, “Goodou hulo hagadaga i henua i lalo alodahi.” Gai gilaadeu ne hulo ga hagadaga i henua i lalo.

⁸ Dua mee nei gai tangada de langi ne oo ga hai mai, “Tilo, denga hoosa ne hulo laa gi henua i ngaiho gu hai ma gu sili dogu lili i de henua i ngaiho.”

De hau hodooligi o Joshua

⁹ Gai Tagi Maolunga ne hagaago mai ange hogi ana muna gi de au, ga hai mai,

¹⁰ “Hannoo gi daho Heldai, ma Tobijah, aama Jedaiah, go denga daane gu aahe mai laa i Babylon, gai koe hannoo hogi gi de hale o Josiah, tama daane a Zephaniah, i de laangi mau,

¹¹ ga kave mai i olaadeu daha, denga selevaa ma goolo ga hai ai dahi hau hodooligi, ga dugu ange gi honga de biho o Joshua, tama daane a Jehozadak, tangada haimeedabu maolunga.

¹² Gai koe ga hai ange gi de ia: ‘Tagi o denga hagabuulinga hebagi e hagadaba: Tilo, e dahi daane dono ingoo go de Uli Manu; ia e somo age naa i dono mommee, gai ia ga hagaduu age de temple o Tagi Maolunga.

¹³ Go ia e hagaduulia de temple o Tagi Maolunga, ma de kave de hagadubu o denga hodooligi, gai ia ga hodooligi ai i honga dono nohoanga hodooligi. Gai e dahi naa hogi dangada haimeedabu e balea dono nohoanga hodooligi, gai gilaau e hagadau bale naa ma de heloongoi.’

¹⁴ Gai de hau hodooligi e dugu naa i lo te temple o Tagi Maolunga e hagamaanadu ai Helem, ma Tobijah, ma Jedaiah, aama Josiah, tama daane a Zephaniah.

¹⁵ Gai dangada e nnoho laa i mommee mmao e loomai naa ga bale de hagaduu o de temple o Tagi Maolunga. Gai goodou e tonu ange naa bolo go Tagi o denga hagabuulinga hebagi ne haia ngau gi humai gi oodou daha. Gai mee nei alodahi e hai naa donu ga bei, noo koe e hagaduu ngae ga hagallongo ange gi muna a Tagi Maolunga doodou Maadua.”