Zechariah 5 - De Beebaa Dabu

De midi o de beebaa mulo e lele laa

¹ Au ne galo age hogi ga gidee, gai tilo, dahi beebaa mulo lele.

² Gai ia ne ssili mai gi de au, “Ni aha aau e gide laa?” Au ne hai ange, “Au e gidee dahi beebaa mulo e lele i lo te moana; dono looloa se madalua sugilima, gai de lahalaha se madaangahulu sugilima.”

³ Gai ia ga hai mai gi de au, “De beebaa nei e sisi ai de hagamalaia e gaavange gi honga henua i lalo alodahi; dahi baasi e sisi ai de hagaduasala o tangada gaiaa, gai de baasi ange laa e sisi ai de hagaduasala o tangada e haia dahi hagatoo donu hadu muna.

⁴ Tagi o denga hagabuulinga hebagi e hagadaba: Au e hai naa gi humai de hagamalaia gi ulu i de hale o tangada gaiaa, ma de hale o tangada e basa hagatoo donu i de hadu muna i dogu ingoo; gai e dagodo naa i dono hale ga dae ai gi dana oha ga odi denga laagau ma hadu iai.”

De midi o de hine i lo te gede

⁵ Gai tangada de langi e pasa laa gimaau ne seesee mai ga hai mai, “Galo ange diiloo be se aha gu sula age naa!”

⁶ Gai au ne ssili ange, “Se aha donu deelaa?” Ia ne hai mai, “De mee naa se gede e lele naa ma e hano.” Ia ne hai mai hogi, “Gai e hhao ai baubau o dangada i henua i lalo alodahi.”

⁷ Gai ga hhuge age huu dono pono baalanga, gai au ne gidee dahi hahine e noho i lo te gede laa!

⁸ Gai tangada de langi ne hai mai, “De hine nei se ada niio de baubau.” Gai ia ga usu iho ia gi lo te gede laa ga pono ange.

⁹ Dua mee nei gai au ne galo age gu gidee e dogolua haahine gu llele mai! Gai de madangi e langa age olaau bakau. Olaadeu bakau e bei bakau o dahi stork, gai gilaau e langa age de gede laa i magavaa o henua i lalo ma de langi.

¹⁰ Gai au ga ssili ange gi tangada de langi e pasa laa gimaau, “Luu haahine laa ga kave laa gi hee de gede laa?”

¹¹ Ia ne hai mai gi de au, “Gilaau e kave de gede laa gi de henua go Shinar, ma de hagaduu dahi hale e dugu ai. Gai ga lava naa huu de hale laa, gai gilaau ga dugu ange de gede laa gi honga dono mommee donu.”