Zechariah 4 - De Beebaa Dabu

De mee dugu laama goolo ma luu olive

¹ Gai tangada de langi nogo pasa laa gimaau ne humai ange ga hhango mai au, bei dagodo o tangada se goodo alahage laa i de seni.

² Gai ia ne ssili mai gi de au, “Ni aha aau e gide laa?” Gai au ne hai ange, “Au e gidee dahi mee dugu laama goolo, gai e dahi boolo e dugu i de ulu, ma e hidu laama i ono elunga, gai e dagidahi olaadeu mommee e velo ange aagena de uvigi.

³ Gai e lua olive e ssomo i ono gaogao; dahi i de baasi madau gai dahi i de baasi masui.”

⁴ Gai au ne ssili ange gi tangada de langi e pasa laa gimaau, “Dogu dangada aamua, aahee hagadoonunga o mee nei?”

⁵ Gai tangada de langi e pasa laa gimaau ga hai mai, “Koe tigi iloo naa donu be ni aha aanei?” Gai au ga hai ange, “Dogu Ia Aamua, deai.”

⁶ Gai ia ne hai ma gi de au, “Aanei muna a Tagi Maolunga ne tala ange gi Zerubbabel: e dee go mahi aabe go ssauaa o tangada, aagai go mahi o dogu Hagasaalunga, aanei muna a Tagi o denga hagabuulinga hebagi.

⁷ De mounga laumalie, go koe goai? Zerubbabel e hai naa goe ga bei de mommee e soe laa. Gai ia e gaamai naa tuludulu o de logunga, gai dangada e oo naa ga hagataba, ‘Ia gi hagamanuuia ina de hadu! Ia gi hagamanuuia ina de hadu!’ ”

⁸ Tagi Maolunga ne hagaago mai ange hogi ana muna, ga hai mai:

⁹ “Zerubbabel gu lava i de hagaduu tagelo o de hale nei; gai go ia hogi e hagalava ina. Gai gi iloo ai e goodou bolo go Tagi o denga hagabuulinga hebagi donu ne haia nei au gi humai gi oodou daha.

¹⁰ Be goai e hagangadi mee ina de laangi o de hegau damaa mee nei, gai gilaadeu e malangilangi naa ma de gidee de uga haide i lo te lima o Zerubbabel. Denga laama e hidu nei go ganomada o Tagi Maolunga e tilo ai laa henua i lalo alodahi.”

¹¹ Dua mee nei, gai au ne ssili ange hogi gi de ia, “Dee hee de hagadoonunga o luu olive e ssomo laa i de baasi madau ma de baasi masui o de mee dugu laama?”

¹² Au ne ssili ange hogi gi de ia i de lua hanonga, “Dee hee de hagadoonunga o luu laa olive e tuu laa i gaogao luu paibu goolo e llingi mai ai laa denga lolo?”

¹³ Ia ne hai mai gi de au, “Koe e dee iloo naa donu de hagadoonunga o mee nei?” Au ne hai ange, “Dogu dangada aamua, e deai.”

¹⁴ Ia ne hai mai gi de au, “Aanei luu dangada gu hagadabu laa gi tuu i mada luu mada o de Ia Aamua o henua i lalo alodahi.”