Zechariah 3 - De Beebaa Dabu

Tangada haimeedabu maolunga go Joshua

¹ Ia ne hagaago mai hogi Joshua tangada haimeedabu maolunga e duu i mada i mua o tangada de langi o Tagi Maolunga, gai Satan e duu i dono baasi madau ma e hagabaubau ai ia.

² Tagi Maolunga ne hai ange gi Satan, “Satan, Tagi Maolunga gi hagaseegina goe! Tagi Maolunga ne hilia laa Jerusalem gi hagaseegina goe! E dee deenei taane e bei laa de laagau, aau ne dada mai i lo te ahi?”

³ De masavaa laa gai Joshua e duu i mada i mua o tangada de langi, gai ia e gahu i hanu malo vai gelegele.

⁴ Gai tangada de langi ne hai ange gi gilaadeu e tuu i ono mada i mua, “Hagauia ono malo vai gelegele naa.” Gai ia ne hai ange gi Joshua, “Tilo, au gu kave gee oo baubau, gai ga hakahu adu goe i hanu malo hoou.”

⁵ Gai au ne hai ange, “Dugua ange de goobai malo gilimalali gi honga dono biho.” Gai gilaadeu ga dugu ange de goobai malo gi honga dono biho ma de hakahu ange ia i hanu malo, gai tangada de langi o Tagi Maolunga e duu i ono gaogao.

⁶ Gai tangada de langi o Tagi Maolunga ne hagammahi ange lodo o Joshua:

⁷ “E hagadaba Tagi o denga hagabuulinga hebagi: Noo koe e hagallongo mai gi de au ma de daohi agu muna, gai koe e dagi naa i dogu hale ma de tilo ange ono buibui, gai au ga gaavadu gi de goe ssauaa madali gilaadeu e tuu nei i kinei.

⁸ Nnoho mai hagalaangona, Joshua, tangada haimeedabu maolunga, ma oo soa e nnoho madali goe, go hiidinga gilaadeu ni hagailonga niio mee e loomai: tilo, au e hai naa gi humai dogu dangada hai hegau go de Uli o David.

⁹ Gai tilo, au e maaga ange naa dahi hagailonga gi honga dagu hadu gu hagaduu i mada i mua o Joshua, e dahi donu huu hadu nei gai e hidu ono ganomada, go Tagi o denga hagabuulinga hebagi e hagadaba. Au e aau gee naa baubau alodahi o de henua nei i e dahi laangi daudahi.

¹⁰ E hagadaba Tagi o denga hagabuulinga hebagi: De laangi laa gai dahi ma dahi e gauna ange naa dono soa gi noho madali ia i lalo dana grapevine ma dana fig.”