Zechariah 2 - De Beebaa Dabu

De midi o dahi daane ma dana uga haide

¹ Au ne galo age ga gidee dahi daane e duu ma e daohi dahi uga haide i lo tono lima.

² Gai au ne ssili ange, “Go hee oou ga hano naa aagena?” Ia ne hai mai gi de au, “Au ga hano nei e haide Jerusalem, e tilo dono lahalaha ma dono looloa.”

³ Gai tilo, tangada de langi e pasa laa gimaau ne ngalue mai gi mada i mua, gai e dahi dangada de langi ange ne humai ga hedae ange gi de ia,

⁴ ga hai ange, “Savini hannoo hai ange gi tama daane laa, ‘Jerusalem e ahe ange naa ga noholia bei dagodo o denga aduhale e dee buibui, go hiidinga gu soa mmao dangada ma manu haangai e nnoho ai.

⁵ Gai Tagi Maolunga e hagadaba: Au e hai naa ga bei de ahi e duuli ina luu baasi o Jerusalem, gai go de mahamaha i ono lodo.’ ”

Tagi Maolunga e noho i daha ono dangada

⁶ “E vakaa naa! E vakaa naa! Saavini hulo gee mai i de henua i ngaiho, go Tagi Maolunga e hagadaba. Au ne hai gi mavaevae goodou gi denga madangi e haa o de langi, go Tagi Maolunga e hagadaba.

⁷ Hidi age hannoo gi Zion, koe tangada e noho madali tamaa hine o Babylon!

⁸ Gai e hagadaba Tagi o denga hagabuulinga hebagi: Dua dana hai gi hano au i dono mahamaha gi denga huaahenua ne haia gi de mahi oodou mee — go hiidinga be goai e poo adu gi goodou e poo ange donu gi tama legalega eidu o dono ganomada —

⁹ tilo, au e hagaabo naa dogu lima e hai baasi ange gi gilaadeu, ga hai olaadeu dangada hai hegau gi haia gi de mahi olaadeu goloa, gi iloo ai e goodou bolo go Tagi o denga hagabuulinga hebagi donu ne haia nei au gi humai.

¹⁰ Tamaa hine o Zion, koe gi daahili ma de malangilangi, go hiidinga au e humai naa e noho i oo daha, go Tagi Maolunga e hagadaba.

¹¹ Denga huaahenua soa e hagabuni mai naa gi daho Tagi Maolunga, i de laangi laa ga hai ai ono dangada. Gai au e noho naa i oodou daha, gi iloo ai e goodou bolo go Tagi o denga hagabuulinga hebagi donu ne haia nei au gi humai gi oodou daha.

¹² Tagi Maolunga e hai naa Judah go dono boolonga i honga de henua dabu, ma de ahe ange ga hili Jerusalem.

¹³ Dangada alodahi, goodou gi dee mmuu i mada luu mada o Tagi Maolunga, go hiidinga ia gu daamada ana hegau i dono mommee noho dabu.”