Zechariah 14 - De Beebaa Dabu

De hodooligi o Tagi Maolunga

¹ Tilo, de laangi o Tagi Maolunga e dae mai naa, gai oodou goloa e gaavee naa ga duha ange gi dangada i oodou mada i mua.

² Au e hagabuni mai naa denga huaahenua alodahi gi hebagi ange gi Jerusalem, gai de aduhale e gaavee naa, denga goloa i lodo hale e gaiaadia naa, gai denga haahine e haia naa gi de mahi. Dahi luu baasi o dangada i de aduhale e noonoodia naa ga gaavee gi dahi henua gee, aagai dangada e doe e dee kave gee mai naa i de aduhale.

³ Gai Tagi Maolunga e hano naa ga hebagi ange gi denga huaahenua, bei de hai de hebagi i de laangi o taua.

⁴ De laangi laa gai ia e duu naa i honga de Mounga o denga Olive, i baasi i dua o Jerusalem, gai de Mounga o denga Olive e mahanga lua naa mai i dua ga sao i dai, ga hai ai dahi geelonga laumalie mmao. Dahi luu baasi o de mounga e ngalue naa gi ngaiho, gai de baasi ange laa e ngalue gi ngaage.

⁵ Gai goodou e saavini naa ga hulo laa gaogao de geelonga e vaaea laa denga mounga, go hiidinga de geelonga laa e dae laa gi Azal. Gai goodou e saavini naa ga hulo gee, e dagodo be goodou e saavini e hulo gee mai i de ngalungalue o de henua, i laangi o Uzziah ne hodooligi ai i Judah. Gai Tagi Maolunga dogu Maadua e humai naa madali de gau dabu alodahi.

⁶ De laangi laa gai e deai naa donu se maalama o de laa, be e hagamagalili, aabe ni haisi.

⁷ Gai de laangi laa e dagodo gee naa donu — go Tagi Maolunga donu huu e iloo dagodo o de laangi laa — de laangi ma de boo se dagodo daudahi donu huu. De ahiahi e maalama donu hogi.

⁸ De laangi laa gai de vai mouli e ssali mai naa i Jerusalem. Hanu e ssali ga hulo gi tai i baasi i dua, gai hanu e ssali ga hulo gi tai i baasi i dai, i de masavaa hagamahana ma de masavaa hagamagalili.

⁹ Gai Tagi Maolunga e hodooligi naa i henua i lalo alodahi. De laangi laa gai e dahi naa donu huu Dagi Maolunga, gai go dono ingoo donu huu e dahi.

¹⁰ De henua alodahi e hai naa ga soe, mai i Geba ga dae ai gi Rimmon i baasi i ngaage o Jerusalem. Aagai Jerusalem e duu naa i dono duulanga donu i de mommee maolunga, mai i de haitoga o Benjamin ga dae ai gi tuulanga o de haitoga madagidagi, ma de Haitoga i Tege, aama mai i de hale dagitilo o Hananel ga dae ai gi de mommee e kumi ai uvaini a de hodooligi.

¹¹ Gai dangada e nnoho naa i kilaa, gu dee ahe ange e hai gi se mommee gu hagamalaia. Gai Jerusalem e noho baba naa.

¹² Gai deenei de mee hagamaakau a Tagi Maolunga e hagaduasala ai denga huaahenua ne hebagi ange gi Jerusalem: olaadeu angaanga e daamada naa de pobo i de masavaa olaadeu goi tuu ai gi lunga, olaadeu hadu mada e pobo naa i lodo olaadeu duulanga, olaadeu alelo e pobo naa hogi i lodo olaadeu ngudu.

¹³ De laangi laa gai Tagi Maolunga e hai naa gi kona delaadeu maatagu. Dahi ma dahi e poo naa dono soa, gai gilaau ga hagadau hebagi.

¹⁴ Judah e hebagi naa hogi i Jerusalem. Gai goloa o denga huaahenua alodahi e paa ange gi gilaadeu e hagabudu mai naa: go goolo ma selevaa, aama malo lagolago.

¹⁵ Gai de mee hagamaakau mau e baa naa i denga hoosa, ma mule, ma gamelo, ma donkey, aama manu alodahi i olaadeu mommee nnoho gaainga.

¹⁶ Gai dangada ne ola mai i denga huaahenua alodahi ne hebagi ange laa gi Jerusalem, e loomai naa i ngadau alodahi ga daumaha ange gi de Hodooligi, go Tagi o denga hagabuulinga hebagi, ma de hai Taonga o denga Baasi Hale.

¹⁷ Gai noo hanu huaabodu o henua i lalo tee loomai gi Jerusalem e daumaha ange gi de Hodooligi, go Tagi o denga hagabuulinga hebagi, gai de langi e dee pala naa donu i olaadeu mommee.

¹⁸ Gai noo de gau Egypt e dee loomai gi taonga, gai e dee pala naa de langi i delaadeu henua. Gai de mee hagamaakau a Tagi Maolunga e hagaduasala naa denga huaahenua tee hulo laa e dao Taonga o denga Baasi Hale.

¹⁹ Deenei de hai e hagaduasala ai Egypt ma denga huaahenua alodahi, e dee loomai laa e dao Taonga o denga Baasi Hale.

²⁰ De laangi laa gai e sisi ange naa gi honga denga baalanga e dau i denga hoosa, “Gu hagadabu ange gi Tagi Maolunga.” Denga anibada i lo te hale o Tagi Maolunga e dabu naa, bei boolo i gaogao de mommee o ssigidaumaha.

²¹ Denga anibada alodahi i Jerusalem ma Judah, e hagadabu ange naa gi Tagi o denga hagabuulinga hebagi, gai dangada alodahi e loomai e sigidaumaha, e kave naa denga anibada nei ga boale ai kano manu e hai ai alaadeu sigidaumaha. Gai e deai naa donu se dangada hagao mee i lo te hale o Tagi o denga hagabuulinga hebagi i de laangi laa.