Zechariah 13 - De Beebaa Dabu

De hagagilimalali mai i haisala

¹ “De laangi laa gai e dahi naa vai e sali age e hagagilimalali ai haisala ma hakino gee o de huaabodu o David aama dangada e nnoho i Jerusalem.

² E hagadaba Tagi o denga hagabuulinga hebagi: De laangi laa gai au e aau naa ingoo o denga diinonga mai i de henua, gi dee aahe ange ai dangada gi manadua. Gai au e hai naa hogi gi hulo gee mai i honga de henua denga pelaabisi ma hagasaalunga hakino gee.

³ Gai noo dahi dangada e basa pelaabisi, gai luoono maadua ne hagadili ina ia gi hai ange, ‘E heohi donu doo daa gi magau, go hiidinga koe gu hadu muna i de ingoo o Tagi Maolunga.’ Gai de masavaa naa huu oona e basa pelaabisi ai, gai luoono maadua donu e velo naa ia ga magau.

⁴ De laangi laa gai denga pelaabisi e dookaa naa i de tala mee gu hagaago ange gi gilaadeu i de midi. Gilaadeu e dee kahu naa i malo daladala o de pelaabisi e daahanga ai dangada.

⁵ Dahi ma dahi e hagadaba naa, ‘Au e dee se pelaabisi. Au se dangada hai veelenga, i hiidinga au ne mouli i de gelegele mai i dogu gauligi.’

⁶ Gai noo dahi dangada e ssili ange gi de ia, ‘Ni maanuga aha i lo too dua naa?’ gai ia e hai ange naa, ‘Ni mee nii ogu soa ne hagalagolagohia ai au.’

De magau o de ia hagaloosi

⁷ “De gadilaasa, alahage, hai baasi ange gi dogu dangada hagaloosi, gai hai baasi ange gi tangada e baa mai gi de au! go Tagi o denga hagabuulinga hebagi e hagadaba. Daia gi magau tangada hagaloosi, gi mavaevae saele ai denga ssiibi, gai au e hagaabo naa dogu lima e hai baasi ange ai gi denga ssiibi gauligi.

⁸ E hagadaba Tagi Maolunga: E lua naa diba i diba e dolu o dangada e daa ga maakau i honga de henua alodahi, gai dahi diba i diba e dolu e doe.

⁹ Gai au e hai naa tahi diba i diba e dolu nei gi hulo laa lo te ahi; gai au ga hagagilimalali ai gilaadeu bei denga selevaa, ma de hagatale ange olaadeu dagodo bei denga goolo. Gilaadeu e hagaagahi naa dogu ingoo, gai au ga basa ange gi gilaadeu. Au e hagadaba naa, ‘Gilaadeu go ogu dangada,’ gai gilaadeu e hagataba naa, ‘Tagi Maolunga go taadeu Maadua.’ ”