Zechariah 1 - De Beebaa Dabu

De hagahi gi aahe mai gi Tagi Maolunga

¹ De valu malama huu i de lua ngadau o Darius ne hodooligi ai, gai Tagi Maolunga ga hagaago ange ana muna gi de pelaabisi go Zechariah, tama daane a Berekiah, tama daane a Iddo, ga hai ange:

² “Tagi Maolunga ne kona mmao dono lili i oodou dubuna madagidagi.

³ Deelaa ai, hai ange gi gilaadeu: E hagadaba Tagi o denga hagabuulinga hebagi, goodou aahe mai gi de au, gai au ga aahe adu gi oodou daha, go Tagi o denga hagabuulinga hebagi e hagadaba.

⁴ Goodou gi dee bei dagodo o oodou dubuna madagidagi; denga pelaabisi i mua ne hai ange: ‘E hagadaba Tagi o denga hagabuulinga hebagi, goodou daahuli gee i oodou hegau baubau ma oodou dahulinga baubau.’ Aagai gilaadeu tee hagallongo mai aabe ne aanga mai gi agu muna, go Tagi Maolunga e hagadaba.

⁵ I hee iai oodou dubuna madagidagi? Gai denga pelaabisi, gilaadeu e mouli laa ga hano ai?

⁶ Aagai agu muna ma agu hainga ne hagasauaa gu tala ange gi ogu dangada hai hegau go denga pelaabisi, tee tuu ange laa gi oodou dubuna madagidagi? Gai gilaadeu ne daahuli olaadeu lodo ga hagataba, ‘Tagi o denga hagabuulinga hebagi ne hagaduasala gimaadeu gi bei dagodo o adaadeu hegau aama dahulinga, bei dana hai gu hagatau ai laa.’ ”

De midi o taane i magavaa o denga myrtle

⁷ De madalua ma haa laangi huu o de madaangahulu ma dahi malama, go de malama go Shebat, i de lua ngadau o Darius ne hodooligi ai, gai Tagi Maolunga ne hagaago ange ana muna gi de pelaabisi go Zechariah, tama daane a Berekiah, tama daane a Iddo.

⁸ Au ne hai dahi midi hagaago ange i de boo, gai tilo, dahi daane e gage i honga dahi hoosa mmea. Gai ia e duu i magavaa o manu ssomo go denga myrtle i dahi mommee gelo. Gai e hanu hoosa mmea, ma hoosa kaagii, aama hoosa tea e tuu i ono dua.

⁹ Gai au ne ssili ange, “Dogu dangada aamua, ni aha aanei?” Gai tangada de langi e pasa laa gimaau, ne hai ange, “Au gu dai hagaago adu naa gi de goe hagadoonunga o mee nei.”

¹⁰ Gai taane e duu laa i magavaa o denga myrtle ne hai mai, “Aanei gilaadeu a Tagi Maolunga ne hai gi hulo gi henua i lalo alodahi.”

¹¹ Gai gilaadeu ne hai ange gi tangada de langi o Tagi Maolunga e duu laa i magavaa o denga myrtle, “Gimaadeu gu hulo ma gu hagaloosi henua i lalo, gai henua i lalo alodahi e nnoho paba ma de malino.”

¹² Gai tangada de langi o Tagi Maolunga ga hagadaba, “Tagi o denga hagabuulinga hebagi, dee hee maa taulooloa doo dee degi ange gi Jerusalem ma denga aduhale o Judah, ma de golo age doo lili i ngadau e madahidu nei?”

¹³ Gai Tagi Maolunga ne basa maamaane ange ma de hagaaneane ange tangada de langi nogo pasa laa gimaau.

¹⁴ Gai tangada de langi laa ne hai mai, “Oo ma gi daalaa muna a Tagi o denga hagabuulinga hebagi: Au gu kona mmao dogu maagoda i hiidinga o Jerusalem ma Zion.

¹⁵ Gai au gu kona hogi dogu lili i denga huaahenua e nnoho paba laa, go hiidinga de masavaa oogu ne damaa lili ai i ogu dangada, gai gilaadeu ne kona donu delaadeu hagaduasala ogu dangada.

¹⁶ Deenei ai, e hagadaba Tagi Maolunga: Au e ahe ange naa e lodo aloha ange gi Jerusalem; dogu hale e hagaduu naa i lo te aduhale laa, gai de uga haide e haide naa Jerusalem, go Tagi o denga hagabuulinga hebagi e hagadaba.

¹⁷ Ahe ange hagailoo ina hagadaba: E hagadaba Tagi o denga hagabuulinga hebagi: Ogu aduhale e aahe ange naa ga hagadagadaga age, gai Tagi Maolunga e ahe ange naa ga hagaaneane Zion ma de hili Jerusalem.”

Denga hanga e haa ma denga labagau dogohaa

¹⁸ Gai au ne galo age ga gidee e haa hanga manu.

¹⁹ Gai au ne ssili ange gi tangada de langi e pasa laa gimaau, “Aahee hagadoonunga o denga hanga nei?” Ia ne hai mai, “Aanei hanga ne haia ga mavaevae saele dangada o Judah ma Israel aama Jerusalem.”

²⁰ Gai Tagi Maolunga ne hagaago mai gi de au e dogohaa labagau o denga baalanga.

²¹ Gai au ne ssili ange, “Ni hegau aha a labagau o denga baalanga e loomai nei e hai?” Ia ne hai mai, “Aanei denga hanga ne haia laa ga mavaevae saele dangada o Judah, gai teai se dangada ne ilaage. Denga labagau nei ne loomai e hagamaatagu ma de hagamaolalo denga huaahenua ne hai baasi ange laa gi de henua o Judah ga hai gu mavaevae saele ono dangada.”