Titus 3 - De Beebaa Dabu

Koe kana ange haia hegau danuaa

¹ Gai hagamanadua ange gi dangada gilaadeu gi hagadubu ina denga dagi ma gilaadeu iai ssauaa e dagi ai, gilaadeu gi daudali i alaadeu muna, ma de hai gi paba ange gilaadeu gi denga hegau danuaa alodahi;

² gilaadeu gi dee hagabaubau ina dahi dangada, gilaadeu gi dee hagadau mee, gai gi daudonu ma de abodonu ange gi dangada alodahi.

³ Go hiidinga i mua gai gidaadeu alodahi ni dangada llodo ssenga, ma tee hagallongo i muna, gai ne daahangadia, ma de noodia i denga hagadaagangaa lodo odaadeu e malangilangi ai. Gidaadeu ne mouli i de kino ma de lodo gaiaa, gai e hai hegau i de lili ma de hagadau kino.

⁴ Aagai de masavaa huu o de abodonu ma de aloha o de Maadua taadeu Ia Hagaola ne hagasula mai ai,

⁵ gai ia ga hagamouli gidaadeu; gai e dee go hiidinga o adaadeu hegau heohi, aagai go hiidinga dono degi, i dana hagagilimalali i de hagahoou odaadeu lodo i daho de Hagasaalunga Dabu,

⁶ go de ia a de Maadua ne hai gi hano iho gi odaadeu elunga, i hiidinga o Iesu Klisdo taadeu Ia Hagaola,

⁷ gi dau ai gidaadeu i de boolonga, ma de dahi adaadeu tali hagalodolodo ange gi de mouli e dee ngado mai, i hiidinga gidaadeu gu hagaheohi i de abodonu o de Maadua.

⁸ Muna nei ni muna abodonu. Gai au e lodo koe gi hagamanadua ina ange gi dangada mee nei, gi kana ange ai dangada gu hagadonusia laa de Maadua gi haia denga hegau danuaa. Mee nei ni mee e danuaa ma de haigamaiana ange gi dangada alodahi.

⁹ Aagai koe huli gee i denga ngadi mee e dee heloongoi ai dangada, ma hagatau o denga aamuli, ma mee o de hainga e hagadaumee ai ma de hebagi ai dangada, i hiidinga mee nei e deai donu olaadeu haigamaiana.

¹⁰ Gai koe hagakana ina tangada e haia gi dee heloongoi magavaa o dangada i e lua hanonga, aagai koe gi dee hagabuni ange gi de ia.

¹¹ Gai koe gi donu ange bolo tangada bee nei e dee gilimalali ma de haisala, gai gu hagamalaia donu huu ia.

Muna hagaodi

¹² De masavaa naa huu o Artemas aabe go Tychicus e dae adu ai, gai koe hagamoolau humai gi dae mai goe gi ogu daha i Nicopolis, go hiidinga au gu hagatau bolo e noho i kinei ga ui ai de masavaa hagamagalili.

¹³ Gai koe bale ange Zenas, tangada hagamodu muna, ma Apollos gi moolau delaau hulo, ma de tilo ga hai gi odi ange danuaa olaau mee e hulo ai.

¹⁴ Gai balea ange odaau dangada gi agoagona de hai denga hegau danuaa, gi maua ai e gilaadeu i de bale ange dangada gu duasala abodonu, gilaadeu gi dee ngadi nnoho.

¹⁵ Dangada alodahi madali au e gaavadu hogi delaadeu hagaboo gi de goe. Demaadeu hagaboo ange gi gilaadeu alodahi e aaloha i gimaadeu i de gai. De abodonu ⌊o de Maadua⌋ gi dagodo i oodou daha alodahi.