Titus 1 - De Beebaa Dabu

De hagaboo

¹ Mai i daho Paul, tangada hai hegau o de Maadua, gai se dangada tala niio Iesu Klisdo, e hai ai gi hagadagadaga age kai o dangada a de Maadua gu lava laa i de hili, ma delaadeu iloo de mee abodonu, e haia laa gi maua e gilaadeu i de hai lodo o de Maadua,

² ma de tali hagalodolodo ange gi de mouli e dee ngado mai, go de mee a de Maadua, e deai laa se hadu muna, gai gu hagatoo donu i mua taamada o henua i lalo,

³ gai ga dae huu de masavaa, gai ia ga hagaago mai i ana muna i agu agoago gu lava i de tala adu ai goodou, bei de hai a de Maadua taadeu Ia Hagaola gu tala mai ai gi de au.

⁴ Ange gi Titus, dagu dama abodonu i de gai. De abodonu ma de baba mai i daho de Maadua Tamana aama Klisdo Iesu taadeu Ia Hagamouli gi dagodo i oo daha.

De hegau a Titus i Crete

⁵ Au ne hai goe gi noho i Crete, gai koe ga hagalava ai mee tigi lava, ma de hili denga dagi o de nohoanga dabu i denga aduhale hugadoo, bei dagu hai gu tala adu ai.

⁶ Taane se dagi gi deai ono mee e hagabaubau ina ai, gai gi dahi donu huu ono bodu, ana dama gi ni dangada e hagadonusia, gilaadeu gi dee hagabaubau ina i delaadeu dahulinga baubau, aabe go delaadeu dee hagallongo i muna.

⁷ Go hiidinga tagi o de nohoanga dabu o de Maadua, e hai donu gi deai ono mee e hagabaubau ina ai — ia gi dee hagamaolunga, be gi moolau de lillili, be gi se dangada e lodo e unu gi senga, be se dangada alasala, aabe go de nnoo hagamau mee,

⁸ aagai gi abodonu ange gi dangada e loomai gi dono hale, ia gi malangilangi i de hai tanuaa, ia gi maanetonu, ia gi hai hegau i de mee heohi ma de hai gi dabu abodonu, aama de golomagi ono lodo.

⁹ Ia gi maua i de daohi de muna abodonu oona gu agoago ai laa, gi maua ai e ia i de hagammahi ange dangada i agoago abodonu aama de hagakana ange gilaadeu e hai baasi ange gi mee nei.

¹⁰ Gai e soa dangada e hai baasi ange gi mee nei, gilaadeu ni dangada e daalaa denga ngadi muna ma de daahanga dangada, gai e kii ai hugadoo de gau Ssuu gu tuu dagaholiage laa.

¹¹ Gai e heohi donu de hai de gau bee nei gi dee pasa, go hiidinga gu soa huaabodu alaadeu ne hai gi huuhuli gee i de mee heohi i alaadeu agoago dee heohi nei. Gai gilaadeu e hai mee nei i hiidinga delaadeu llodo i sseene.

¹² Gai e hagadaba dahi pelaabisi o de gau Crete, “De gau Crete ni dangada e hadu muna i masavaa alodahi, gilaadeu e bei dagodo o denga manu alasala baubau, gai e aagai ma de vaiduu.”

¹³ Gai muna nei ni muna abodonu, deenei ai, koe gi hagaseegina gilaadeu gi maua ai gi hagadagadaga age danuaa olaadeu kai,

¹⁴ gai gilaadeu gi dee hagalaangona denga ngadi daalanga a de gau Ssuu ma muna a dangada gu daahuli gee laa i de muna abodonu.

¹⁵ Gai mee alodahi e gilimalali ange gi tangada e gilimalali ana dahulinga, aagai ange gi tangada e hakino gee ana dahulinga gai e dee hagadonusia, e deai donu se mee daudahi e gilimalali, go hiidinga alaadeu maanadu aama olaadeu lodo e dee gilimalali.

¹⁶ Gilaadeu e hagataba bolo gilaadeu ni dangada e iloo de Maadua, aagai alaadeu dahulinga e hagahadu muna ia; gilaadeu ni dangada e haia dahulinga baubau ma tee hagallongo i muna, gai e deai olaadeu haigamaiana ange gi hegau danuaa.