Romans 9 - De Beebaa Dabu

De hilihili a de Maadua

¹ Au e tala adu gi goodou de muna abodonu i lodo o Klisdo, au e dee hadu muna donu; gai tagi o ogu lodo go dogu ia tala hagadonu i ssauaa o de Hagasaalunga Dabu,

² bolo au e kona mmao de daemaha ma tee baba ogu lodo.

³ Mee naa go au e hagamalaia ga vvae gee mai i Klisdo e sui ai ogu daina, go ogu dangada i de baasi gi de angaanga.

⁴ Gilaadeu go dangada o Israel, gai go gilaadeu donu denga dama daohi a de Maadua, go gilaadeu ne gaavange aagena de mahamaha, ma de hagatoo donu hagaheloongoi, ma de hainga a Moses, ma de hai daumaha heohi, aama denga hagatoo donu.

⁵ Gai go gilaadeu hogi hagadiilinga o denga dubuna madagidagi, gai Klisdo se mogobuna niiolaadeu, gai go ia de Maadua i honga mee alodahi, gai gi duuhia ia ga hano ai! Amen.

⁶ Aagai e dee go muna a de Maadua e deai ono haigamaiana. Gai e dee go dangada alodahi i de aamuli o Israel, ni dangada Israel abodonu.

⁷ Gai e dee gilaadeu alodahi ni dama nii Abraham i hiidinga gilaadeu ni hagadiilinga niiona. Aagai “go de aamuli o Isaac e dau bolo go doo hagadiilinga.”

⁸ Deenei tagodo, e dee go denga dama alodahi a Abraham ne hagadili e dau bolo go dama a de Maadua, aagai go dama donu huu a de Maadua ne hagatoo donu ange ai laa gi Abraham e dau bolo go dono hagadiilinga.

⁹ Gai aanei muna o de hagatoo donu, “De masavaa bee nei gai au e ahe mai naa, gai Sarah e haanau naa dahi dama daane.”

¹⁰ Gai e dee deenaa donu huu hogi, aagai de masavaa o Rebekah ne hai dama ange ai gi taadeu dubuna madagidagi go Isaac,

¹¹ gai i mua de haanau o luu dama daane laa, tigi haia hogi e gilaau tanuaa aabe go de baubau — gai gi hagassula ai de hagatau a de Maadua i dana hilihili e dee maua laa i de sui, gai e dee go hiidinga hegau a dahi, aagai go hiidinga o dana hagahi —

¹² gai ia ne hai ange gi delaau dinana, “Tama madua e hai hegau ange naa gi tama gauligi.”

¹³ Gai gu sisi e hai ange, “Au e aloha i Jacob gai au e kino i Esau.”

¹⁴ Gai aahee ai adaadeu muna ange gi mee nei? De Maadua tee heohi laa ana mee ne hai? E dee maua donu!

¹⁵ Go hiidinga ia ne hai ange gi Moses, “Au e abodonu ange gi de ia oogu e lodo e abodonu ange aagena, gai au e lodo aloha ange gi tangada oogu e lodo e lodo aloha ange aagena.”

¹⁶ Deelaa ai, e dee go lodo o tangada be go ana hegau e maua ai mee nei, aagai go de abodonu o de Maadua.

¹⁷ Gai de Beebaa Dabu ne tala ange muna a de Maadua gi Pharaoh, “Au ne hai goe gi hodooligi e hagaago mai ai dogu sauaa i oo daha, ma de hai gi langona e henua i lalo alodahi dogu ingoo.”

¹⁸ Deelaa ai, de Maadua e abodonu ange gi tangada oona e lodo e abodonu ange aagena, gai e hagamakaga lodo o tangada aana e lodo e hagamakaga ono lodo.

¹⁹ Gai koe ga ssili mai naa gi de au, “Gu aha de Maadua goi hagabaubau ai naa huu dangada? Gai goai naa donu e hai baasi ange gi ono lodo?”

²⁰ Koe se dangada, gai go koe goai, gai koe ga tugi ange ai muna a de Maadua? E maua e de gumedi hadu i de hai ange gi tangada hai gumedi, “Gu aha goe gu hai ai nei au gi dagodo bee nei?”

²¹ Tangada hai gumedi e maua donu i de hai be ni aha aana e lodo e hai i bela pigi; ia e maua i de hai dahi hagabuudungaa bela pigi ga hai ai dahi gumedi hagamogomogo aabe go dahi gumedi e hai mee ai i de laa tubua!

²² Gai de Maadua ne lodo e hagaago mai dono lili ma dono sauaa mmahi, i de golomagi ono lodo i gilaadeu aana gu baba ange e daa gi maakau,

²³ gai ia ga hagaago mai ai dono mahamaha laumalie ange gi gilaadeu oona gu abodonu ange laa aagena, go gilaadeu aana gu hagadabena ange gi de mahamaha mai i mua.

²⁴ Aanei gidaadeu aana gu lava laa i de hagahi, e dee mai donu huu i magavaa o de gau Ssuu, gai mai hogi i magavaa o denga Gentile.

²⁵ Gai ia gu hagadaba hogi i de beebaa go Hosea, “Gilaadeu e dee ni dangada laa niiogu, au e hagabinga naa bolo go ‘ogu dangada,’ gai de huaahenua oogu e dee aloha ai, au e hagabinga naa go ‘de huaahenua oogu e aloha ai.’

²⁶ Gai de mommee ne hai ange ai laa gi gilaadeu, ‘Goodou e dee ni dangada niiogu,’ gai go kilaa hogi olaadeu e hagabinga ai bolo go dama a de Maadua e mouli laa.”

²⁷ Isaiah ne tala dagodo o Israel: “E dee galemu donu de soa de gau Israel bei de lagolago gelegele i gabugabu tai, gai e sogoisi naa donu huu gilaadeu e ola.

²⁸ Gai Tagi Maolunga e moolau naa donu dana hagasula de hagaduasala o henua i lalo alodahi.”

²⁹ Gai e bei donu de hai a Isaiah gu tala ai laa i mua, “Noo Tagi o denga hagabuulinga hebagi tee hagaola hanu i omaadeu hagadiilinga, gai gimaadeu ne bei donu dagodo o Sodom ma Gomorrah.”

Israel tee hagadonusia

³⁰ Gai aahee ai adaadeu muna ange gi mee nei? Gidaadeu e maua i de hagataba bolo denga Gentile tee hagaduu ngae laa e ssala delaadeu hagaheohi i daho de Maadua, gu maua e gilaadeu de hagaheohi i de gai;

³¹ aagai dangada o Israel ne hagaduu ngae laa ga ssala delaadeu hai e hagaheohi ai i de hainga, tee maua e gilaadeu i de hagasula de hainga.

³² Gu aha? Go hiidinga gilaadeu tee ssala de hagaheohi i de gai, aagai ne ssala de hagaheohi i alaadeu hegau donu. Gilaadeu ne baakuu i de hadu e hagalaavea gilaadeu,

³³ bei de hai gu sisi ai laa, “Tilo, au e hagaduu dahi hadu i Zion e hagalaavea vae o dangada, se hadu e haia ga baakuu gilaadeu; gai be goai e hagadonusia e dee hagadogaa ina donu.”