Romans 8 - De Beebaa Dabu

De mouli i de Hagasaalunga Dabu

¹ Deenei ai, iainei gu deai donu se hagaduasala o dangada e mouli i lodo o Klisdo Iesu.

² Go hiidinga de hainga a de Hagasaalunga o de mouli gu hagailaage au mai i ssauaa o de hainga o de haisala ma de magau, i hiidinga o Klisdo Iesu.

³ Mee a de hainga tee maua laa i de hai, i hiidinga de baageaa o de baasi gi de angaanga, gai de Maadua ne hai gi humai dana Dama Daane dagidahi gi hagadulagi ange gi de angaanga e haisala laa, e hai ai ssigidaumaha e tala ai haisala. Gai ia ga daa ai gi magau de haisala e hai hegau laa i lo te angaanga,

⁴ gi maua ai e gidaadeu e dee daudali laa i lodo o de angaanga, aagai e daudali i lodo o de Hagasaalunga ⌊Dabu⌋, i de hagasula de hainga heohi i odaadeu lodo.

⁵ Dangada e mouli bei dagodo lodo o de angaanga e maanadu mee o de angaanga e lodo ai, aagai dangada e mouli bei dagodo lodo o de Hagasaalunga e maanadu mee o de Hagasaalunga e lodo ai.

⁶ De maanadu lodo o de angaanga e dagi ange gi de magau, aagai de maanadu lodo o de Hagasaalunga e dagi ange gi de mouli ma de baba.

⁷ Go hiidinga maanadu a de angaanga e hagadaumee ange donu gi de Maadua, ma tee hagallongo ange gi hainga a de Maadua, gai e dee maua donu i de hai mee nei.

⁸ Gai dangada e haia lodo o de angaanga e dee maua donu e gilaadeu i de hagamalangilangi de Maadua.

⁹ Aagai goodou gu dee nnoho i lalo ssauaa o de angaanga, gai gu nnoho i lalo ssauaa o de Hagasaalunga, noo de Hagasaalunga o de Maadua e noho i oodou lodo. Tangada e dee noho de Hagasaalunga o Klisdo i ono lodo, e dee se dangada niiona.

¹⁰ Aagai noo Klisdo e noho i oodou lodo, gai ga maakau naa donu oodou angaanga i hiidinga o de haisala, gai oodou hagasaalunga e mouli i hiidinga goodou gu lava i de hagaheohi i daho de Maadua.

¹¹ Gai noo de Hagasaalunga o de Maadua ne hagamouli ina age laa Iesu i de magau e noho i oodou lodo, gai de ia ne hagamouli ina age laa Iesu i de magau e hagamouli age naa hogi oodou angaanga e maakau laa i dono Hagasaalunga e noho laa i oodou lodo.

¹² Deenei ai, ogu daina, gidaadeu e dee ni dangada e muli ange gi lodo o de angaanga, gai gidaadeu ga hai ai lodo o de angaanga,

¹³ go hiidinga noo goodou e mouli i lodo o de angaanga, gai goodou e maakau donu; aagai noo goodou e daa gi maakau denga dahulinga o de angaanga i ssauaa o de Hagasaalunga ⌊Dabu⌋, gai goodou e mouli.

¹⁴ Dangada alodahi e dagi i daho de Hagasaalunga o de Maadua ni dama donu nii de Maadua.

¹⁵ Goodou tee kave de hagasaalunga e haia laa goodou ga ni dangada hai hegau, gai goodou ga aahe ange ai ga maatagu, aagai goodou ne kave de Hagasaalunga e haia goodou ga ni dama daohi. Gai go ono hiidinga odaadeu e maua i de hagataba, “Abba! Tamana!”

¹⁶ Gai go de Hagasaalunga e daalaa hagadonu ina mai i lodo odaadeu hagasaalunga bolo gidaadeu ni dama donu nii de Maadua.

¹⁷ Gai noo gidaadeu gu ni dama donu, aagai gidaadeu gu dau i de boolonga o de Maadua madali Klisdo; noo gidaadeu e kave de hagaduasala madali Klisdo, gai gidaadeu e kave donu hogi de mahamaha madali ia.

De mahamaha i de masavaa e humai

¹⁸ Gai au e hagadaba bolo denga hagaduasala o de mouli nei e dee maua donu i de hagahedae ange gi de mahamaha gu hagadabena mai laa gi gidaadeu.

¹⁹ Denga mee gu hagadau e tali ma de llodo mmao gi dae mai de masavaa e hagaago mai ai dama a de Maadua.

²⁰ Gai mee ne hai i taamada age gu hai gi deai ono haigamaiana, gai e dee go dana hilihili, aagai go hagatau a de ia ne haia de mee nei, gai gidaadeu e tali hagalodolodo

²¹ bolo mee ne hai i taamada age e hai naa ga ilaage mai i ssauaa o de magau ma de bobo, ga kave de ilaage ma de mahamaha o denga dama a de Maadua.

²² Gidaadeu e iloo bolo denga mee ne hagadau e bei dagodo o de hine haanau i dono mmae i de masavaa e hai ai ono hagalangona, ga dae mai ai gi iainei.

²³ Aagai e dee go mee donu huu ne hai laa i taamada, gai e bei ai hogi, gidaadeu gu kave laa hua i taamada, go de Hagasaalunga ⌊Dabu⌋, e duasala donu odaadeu lodo i taadeu tali de masavaa odaadeu e hai ai gi ni dama daohi, go de hagaola o odaadeu angaanga.

²⁴ Gidaadeu ne kave de tali hagalodolodo nei i de masavaa odaadeu ne hagamouli ai. Gai de tali hagalodolodo e gidee laa e dee se tali hagalodolodo abodonu. Gai goai e tali hagalodolodo ange laa gi mee aana gu lava laa i de gidee?

²⁵ Aagai noo gidaadeu e tali hagalodolodo ange gi mee adaadeu tigi gidee, gai gidaadeu e tali mee nei i de golomagi lodo.

²⁶ Gai e bei ai hogi de Hagasaalunga ⌊Dabu⌋, ia e bale mai gidaadeu i taadeu baageaa; go hiidinga gidaadeu e dee iloo de mee e heohi taadeu dalodalo ai, aagai go de Hagasaalunga e dalodalo i gidaadeu i taemaha e dee maua laa i de tala.

²⁷ Gai de Maadua e gidee dagodo lodo o dangada ma lodo o de Hagasaalunga, go hiidinga de Hagasaalunga e dalodalo i dangada o de Maadua bei dagodo de hagatau a de Maadua.

²⁸ Gai gidaadeu e iloo bolo de Maadua e hagahai hegau mee alodahi e hai ai de mee danuaa ange gi gilaadeu e aaloha i de ia, go gilaadeu gu hagahia laa bei dagodo o dana hagatau.

²⁹ Go hiidinga gilaadeu a de Maadua gu iloo i mua, gu lava hogi i dana hagatau bolo gilaadeu e hai naa gi bei dagodo o dana Dama, gai ia ga hai ai dana Dama go tama madua i magavaa o denga hai daina soa.

³⁰ Gai gilaadeu aana gu lava laa i de hagatau olaadeu dagodo gu lava hogi i dana hagahi, gai gilaadeu aana gu hagahi laa gu lava hogi i dana hai gi dabu; gai dangada aana gu hai laa gi dabu gu lava hogi i dana hagamahamaha.

De aloha o de Maadua i lodo o Klisdo

³¹ Gai aahee ai adaadeu muna ange gi de mee nei? Noo de Maadua e bale mai gidaadeu, gai goai ai naa e maua i de hai baasi mai gi gidaadeu?

³² De Maadua tee daohi donu dana Dama i gidaadeu, aagai ne gaavange ia e daa gi magau i odaadeu hiidinga alodahi, gai e dee kii ange laa dana mau i de gaamai mee alodahi gi gidaadeu madali dana Dama?

³³ Goai e maua i de hagabaubau gilaadeu a de Maadua gu hili? Go de Maadua e hagaheohi ina gilaadeu.

³⁴ Goai ai naa e maua i de hagabaubau gilaadeu? E deai donu. Go Klisdo Iesu ne magau — gai ia ne mouli age hogi — gai ia gu noho i de baasi madau o de Maadua, ma e dangidangi ai i odaadeu hiidinga.

³⁵ Gai goai e maua i de vvae gee gidaadeu mai i de aloha o Klisdo? E maua e de hagaduasala, be go hai ngadaa, be go de vaivai haia, be go de onge, be go teai odaadeu malo, be go de mee hagamanavasaa, aabe go de gadilaasa?

³⁶ Gai gu sisi e hai ange, “Gimaadeu e daia ga maakau i laangi alodahi i oo hiidinga; gimaadeu e bei dagodo o denga ssiibi gu paba ange laa e daa gi maakau.”

³⁷ E deai, i mee nei alodahi gai gidaadeu e kii ange donu i dangada gu kii laa i de hebagi, i hiidinga o de ia e aloha laa i gidaadeu.

³⁸ Gai au e iloo abodonu bolo e dee maua donu e de magau be go de mouli, be go de gau de langi, be go de masavaa iainei, be go de masavaa e humai, be go dahi sauaa daudahi,

³⁹ be go dahi mommee maolunga, be go dahi mommee gelo, aabe go dahi mee daudahi ne hai i taamada age, i de vvae gee gidaadeu i de aloha o de Maadua i lodo o Klisdo Iesu taadeu Dagi Maolunga.