Romans 7 - De Beebaa Dabu

De mee hagasengasenga o de hai bodu

¹ Denga daina, goodou tigi tonu ange naa donu — go hiidinga au e basa ange gi dangada e iloo de hainga — bolo de hainga e sauaa donu huu i de masavaa o tangada e mouli ai?

² De hine dau bodu e noho i lalo de hainga o de hai bodu i taulooloa de mouli o dono bodu; aagai noo gu magau dono bodu, gai de hine laa gu ilaage mai i de hainga o de hai bodu.

³ Gai ia e hagabinga bolo se hine dagodo haisala noo ia e hai bodu ange gi dahi daane gee, i de masavaa o dono bodu e mouli ai. Aagai noo gu magau dono bodu, gai ia gu ilaage mai i de hainga laa, ia gu dee dagodo haisala noo ia e hai bodu ange gi dahi daane gee.

⁴ Denga daina, goodou gu maakau ange hogi gi de hainga i doodou dau i de angaanga o Klisdo, gi dau ange ai goodou gi dahi dangada gee, go de ia ne mouli age laa mai i de magau, gai gidaadeu ga hagadili ai denga hua danuaa a de Maadua.

⁵ De masavaa odaadeu e nnoho ai i lodo o de angaanga, gai de hainga e hagahai hegau de lodo haisala e dagodo laa i odaadeu lodo, ga hagadili ai hua e hidi mai ai laa de magau.

⁶ Aagai iainei gidaadeu gu ilaage mai i de hainga laa, gidaadeu gu maakau ange gi de hainga nogo noodia laa gidaadeu, gai gidaadeu gu dee hai hegau i de hainga duai gu lava laa i de sisi, aagai gu kave de mouli hoou o de Hagasaalunga ⌊Dabu⌋.

De hainga ma de haisala

⁷ E aha, e maua e gidaadeu i de hagataba bolo de hainga e haisala? E dee maua donu! Noo tee gaamai de hainga, gai au tee iloo dagodo o de haisala. Au tee maua hogi gi iloo be se aha de nnoo hagamau mee, noo de hainga tee hai mai, “Aude nnoo!”

⁸ Gai de haisala ne hagahale denga hagadaagangaa nnoo hagamau mee i ogu lodo. Noo teai se hainga, gai de haisala e magau.

⁹ I mua gai au tee mouli i de hainga, aagai de masavaa huu ne gaamai ai de hainga, gai de haisala gu mouli gai au gu magau.

¹⁰ Muna o de hainga ne gaamai laa gi maua ai e au de mouli, gu hai gi duu ange au gi de magau.

¹¹ De haisala ne hagasenga au, gai ne daa ga magau au i muna o de hainga.

¹² Deenei ai, de hainga e dabu, gai muna o de hainga e dabu ma de heohi gai e danuaa.

¹³ E aha, go de hainga danuaa laa ne hidi ai nei dogu magau? E dee maua donu! Aagai go de haisala ne hagahai hegau ina de mee danuaa laa ga dagi ange ai au gi de magau, e hagaago mai ai bolo de haisala e haisala donu, gai muna o de hainga ne hagaago mai bolo de haisala e baubau mmao.

¹⁴ Gidaadeu e iloo bolo de hainga se mee ange gi de baasi gi de hagasaalunga; aagai au se dangada, e noho i lalo ssauaa o de haisala.

¹⁵ Au e dee donu ange gi agu hegau e hai. Go hiidinga au e dee hai ogu mee e lodo e hai, aagai e hai mee alodahi oogu e kino ai.

¹⁶ Gai noo au e hai mee aagu e dee lodo e hai, gai e bei au gu hagadaba bolo de hainga e danuaa.

¹⁷ Deenei ai, e dee go au ai loo e haia mee nei, aagai go de haisala e dagodo laa i ogu lodo.

¹⁸ Gai au e iloo bolo e deai donu se mee danuaa daudahi e dagodo i ogu lodo, i de angaanga nei. Au e lodo e hai de mee danuaa, aagai au e dee maua donu i de hai.

¹⁹ Au e dee maua i de hai de mee danuaa aagu e lodo laa e hai, aagai de baubau aagu e dee lodo laa e hai, go ia donu aagu e hai.

²⁰ Gai noo au e dee hai ogu mee e lodo ai, gai e dee go au ai loo e haia mee nei, gai go de haisala e dagodo laa i ogu lodo.

²¹ Deenei ai, au e gidee bolo deenei de hainga e hai hegau: de masavaa aagu e lodo ai e hai de mee heohi, gai go de baubau aagu e hai.

²² Au e malangilangi i de hainga a de Maadua, i ogu lodo alodahi,

²³ aagai au e gidee dahi hainga gee e hebagi ange gi de hainga i ogu lodo laa, ma de daohi au gi noho i lalo ssauaa o de haisala e dagodo laa i lodo o de angaanga.

²⁴ E hagaaloha mmao ogu dagodo! Goai e maua i de hagaola ngau mai i de angaanga e magau nei?

²⁵ De abodonu ange gi de Maadua i daho Iesu Klisdo Tagi Maolunga odaadeu! Deenei tagodo, au e hai hegau ange gi de hainga a de Maadua i ogu lodo, aagai dogu angaanga e hai hegau ange gi de hainga o de haisala.