Romans 6 - De Beebaa Dabu

Magau ange gi de haisala, mouli i lodo o Klisdo

¹ Gai aahee ai adaadeu muna ange gi mee nei? Gidaadeu ga duudagi de nnoho i lodo odaadeu haisala gi kii ange ai de laumalie de abodonu o de Maadua?

² E dee maua donu! Dee hee taadeu hai e duudagi ai de hai hegau i de haisala, gai gidaadeu gu maakau ange gi de haisala?

³ Goodou e dee iloo bolo gidaadeu alodahi gu babudaisi i lodo o Klisdo Iesu, gu babudaisi donu hogi i dono magau?

⁴ Deenei ai, gidaadeu gu maakau ma gu danu madali ia i taadeu babudaisi, gi bei ai gidaadeu dagodo o Klisdo i dono mouli age mai i de magau i ssauaa o de mahamaha o Tamana, gai gidaadeu ga mouli ai hogi i de mouli hoou.

⁵ Go hiidinga gidaadeu ne maakau madali ia bei dono hai ne magau ai laa, deelaa ai, gidaadeu e mouli age naa hogi madali ia bei dono hai ne mouli age ai laa.

⁶ Gidaadeu e iloo bolo odaadeu mouli duai gu daudau i de laagau lui madali ia, e oha ai ssauaa o de haisala, gi dee nnoho ai gidaadeu i lalo ssauaa o de haisala.

⁷ Go hiidinga tangada magau gu ilaage mai donu i ssauaa o de haisala.

⁸ Gai noo gidaadeu gu maakau madali Klisdo, gai gidaadeu e hagadonusia bolo gidaadeu e mouli age donu hogi madali ia.

⁹ Gai gidaadeu e iloo bolo go hiidinga Klisdo gu mouli age i de magau, gai ia gu dee ahe ange donu e magau; de magau gu deai donu sono sauaa e daohi ai ia.

¹⁰ Dono magau, gai ia ne magau ange gi de haisala, i dahi hanonga daudahi; aagai dono mouli, gai ia e mouli ange gi de Maadua.

¹¹ Gai e bei ai hogi, goodou gi tonu ange bolo goodou gu maakau ange donu gi de haisala, aagai gu mouli ange gi de Maadua i lodo o Klisdo Iesu.

¹² Deenei ai, goodou gi dee dugua ange de haisala gi dagina oodou angaanga e maakau laa, gai goodou ga hagallongo ange ai gi denga hagadaagangaa lodo alodahi o de angaanga.

¹³ Goodou aude dugua ange oodou angaanga gi ni goloa hai hegau niio de baubau, aagai gi dugua ange oodou angaanga gi de Maadua, bei dagodo o dangada gu maakau laa ma gu mouli age ange, gai gaavange oodou angaanga alodahi gi de Maadua e hai ai de mee heohi.

¹⁴ Go hiidinga de haisala gu deai sono sauaa e dagi ai goodou, i hiidinga goodou gu dee nnoho i lalo ssauaa o de hainga, aagai gu nnoho i lalo ssauaa o de abodonu o de Maadua.

De gau hai hegau o de heohi

¹⁵ Gai aahee ai adaadeu mee e hai? Gidaadeu ga duudagi de nnoho i lodo odaadeu haisala, i hiidinga gidaadeu gu dee nnoho i lalo de hainga, gai gu nnoho i lalo de abodonu o de Maadua? E dee maua donu!

¹⁶ E aha, goodou e dee iloo bolo noo goodou e dugu ange goodou e hai ai tangada hai hegau o dahi, gai goodou gu ni dangada hai hegau donu niiona — e dee hilihili be goodou e hai hegau ange gi de haisala, e dagina ange laa goodou gi maakau, aabe e hagallongo ange gi de mee e haia ga heohi goodou.

¹⁷ Aagai de abodonu ange gi de Maadua! I mua gai goodou ni mee hai hegau niio de haisala, aagai iainei goodou gu hagallongo ange gi mee oodou gu agoago ai, i oodou lodo alodahi.

¹⁸ Iainei goodou gu ilaage mai i de haisala, gai gu hai gi ni mee hai hegau niio de heohi.

¹⁹ Au e basa adu gi goodou i mee e hai i de laa tubua, i hiidinga doodou dee tonu. Gai e bei doodou hai ne dugu ange ai laa oodou angaanga gi denga hegau hakino gee, ma de baubau alodahi, aagai iainei goodou dugua ange oodou angaanga, gi hai hegau ange gi de heohi, e maua laa i de hai goodou gi dabu.

²⁰ De masavaa oodou ni dangada hai hegau ai niio de haisala, gai goodou e ilaage mai i ssauaa o de heohi.

²¹ Aagai ni aha oodou ne mau laa i de masavaa laa, mai i mee oodou gu dookaa ai naa iainei? De hagaodi o mee laa go de magau donu.

²² Aagai iainei goodou gu ilaage mai i de haisala, gai gu ni dangada hai hegau niio de Maadua, gai doodou mee e maua ai go doodou hai ga ni dangada e dabu, gai de hagaodi o de mee nei go de mouli e dee ngado mai.

²³ Gai de hagaoanga o de haisala go de magau, gai de mee ngadi gaavange a de Maadua go de mouli e dee ngado mai i lodo o Klisdo Iesu taadeu Dagi Maolunga.