Romans 5 - De Beebaa Dabu

De baba ma de tali hagalodolodo

¹ Deenei ai, go hiidinga gidaadeu ne hagaheohi i de gai, gidaadeu gu nnoho paba madali de Maadua i hiidinga o taadeu Dagi Maolunga go Iesu Klisdo,

² gai go ono hiidinga adaadeu ne kave ai nei de abodonu o de Maadua i de gai. Gai gidaadeu e tala tuhi taadeu tali de masavaa adaadeu e kave ai de mahamaha o de Maadua.

³ Gai e dee deenei donu huu, aagai gidaadeu e tuhi hogi taadeu hagaduasala ina, i hiidinga gidaadeu e iloo bolo taadeu hagaduasala ina e hai ga lodo mmahi gidaadeu;

⁴ gai de lodo mmahi e hai gi maatua abodonu gidaadeu, gai de maatua abodonu e hai gi dahi adaadeu tali hagalodolodo.

⁵ Gai de tali hagalodolodo nei e hai gi dee llodo baageaa gidaadeu, go hiidinga de Maadua gu gaamai dono aloha gi odaadeu lodo, i daho de Hagasaalunga Dabu aana ne gaamai laa gi noho i odaadeu lodo.

⁶ De masavaa odaadeu e deai ai odaadeu mahi, gai Klisdo ne magau i hiidinga o de gau baubau, i de masavaa gu lava laa i de hagamodu.

⁷ Gai e hai ngadaa donu de magau o dahi dangada i hiidinga o dahi dangada e heohi — gai maanadu e dahi naa dangada e lodo e hagatale de magau i hiidinga o dahi dangada danuaa.

⁸ Aagai de Maadua ne hagaago mai dono aloha i gidaadeu i dana gaamai Klisdo gi magau i odaadeu hiidinga, i de masavaa odaadeu goi nnoho ai i lodo odaadeu haisala.

⁹ Deenei ai, go hiidinga gidaadeu gu hagaheohi i dodo o Klisdo, gai e kii ange naa donu dana hagaola mai gidaadeu i de lili ⌊o de Maadua⌋.

¹⁰ Gai noo de masavaa odaadeu ni hagadaumee ai niio de Maadua, gai gidaadeu ne hagadanuaa odaadeu magavaa ma de Maadua, i de magau o dana Dama, gai dee hee maa ai naa de kii ange taadeu maua de hagamouli i hiidinga o dono mouli, i dua de hagadanuaa oodou magavaa ma de Maadua.

¹¹ Gai e dee deenei donu huu, gai gidaadeu e malangilangi hogi i de Maadua, i daho taadeu Dagi Maolunga go Iesu Klisdo, go de ia ne haia ga maua e gidaadeu de hagadanuaa odaadeu magavaa ma de Maadua.

Adam ma Klisdo

¹² Deenei ai, de haisala ne humai gi henua i lalo i daho dahi dangada, gai de magau ne humai i hiidinga o de haisala; deenei de hai ne duu ange ai de magau gi dangada alodahi, go hiidinga dangada alodahi gu haisala.

¹³ De haisala gu dagodo donu i henua i lalo i mua de gaamai o de hainga, gai de haisala e dee dau bolo se haisala noo e deai se hainga.

¹⁴ Aagai ssauaa o de magau gu dagodo mai huu i de masavaa o Adam ga dae mai ai gi de masavaa o Moses, i honga o dangada tee haisala laa bei de haisala o Adam, ia go de ada o de ia gu dai humai laa.

¹⁵ Aagai e dee dagodo daudahi de mee ngadi gaavange ma de haisala. Noo ne soa dangada ne maakau i hiidinga haisala o dahi dangada, gai e kii ange donu de soa dangada e gaavee de abodonu o de Maadua ma de ngadi gaavange o de abodonu i hiidinga o dahi dangada, go Iesu Klisdo.

¹⁶ E dee dagodo daudahi hogi de mee ngadi gaavange a de Maadua ma haisala o dahi dangada: de hagamodu muna e humai i hiidinga haisala o tangada, e hagaduasala tangada, aagai de mee ngadi gaavange e humai laa i dua haisala lagolago, e hai ga heohi tangada.

¹⁷ Gai noo haisala o dahi dangada ne gaavange ssauaa gi de magau e dagi i hiidinga o dahi dangada, aagai e kii ange donu de laumalie ssauaa olaadeu gu gaavee de abodonu ma de mee ngadi gaavange o de heohi e dagi ai i de mouli i hiidinga o dahi dangada sogosogo, go Iesu Klisdo.

¹⁸ Deenei ai, haisala o dahi dangada ne hai ga tuu ange dangada alodahi gi de magau, aagai hegau heohi a dahi dangada daudahi ne hagaheohi aama de gaavange de mouli gi dangada alodahi.

¹⁹ Go hiidinga tee hagallongo i muna o dahi dangada daudahi ne hai dangada soa ga haisala, gai e bei ai hogi, de hagallongo i muna o dahi dangada daudahi ne hai ga heohi dangada soa.

²⁰ De hainga ne gaamai gi kii ange ai de laumalie de haisala. Aagai ga hagadaga ange naa donu de laumalie de haisala, gai de abodonu o de Maadua e kii ange donu de laumalie.

²¹ Deenei ai, e bei de hai o de haisala e daohi ai laa ssauaa o de magau, gai e bei ai hogi, de abodonu o de Maadua e daohi ssauaa e hagaheohi ai dangada, ma de gaavange gi gilaadeu de mouli e dee ngado mai i hiidinga o Iesu Klisdo taadeu Dagi Maolunga.