Romans 4 - De Beebaa Dabu

De gai o Abraham

¹ Gai aahee ai adaadeu muna ange gi dagodo o mee a Abraham, taadeu dubuna madagidagi, ne gidee?

² Noo Abraham ne hagaheohi i daho de Maadua i ana hegau, gai e hanu donu mee aana e tuhi ai ia, aagai ia e dee maua i de tuhi ia i mada luu mada o de Maadua i mee nei.

³ Gai aahee muna a de Beebaa Dabu gu tala laa? “Abraham ne hagadonusia de Maadua, gai de mee nei gu dau ia gi se dangada e heohi.”

⁴ De hagaoanga o tangada hai hegau e dee dau bolo se mee ngadi gaavange, aagai go dono hagaoanga.

⁵ Aagai tangada e dee hai hegau, gai ia e hagadonusia de Maadua e hagaheohi ina laa de gau baubau, gai dono gai e dau ia gi se dangada e heohi,

⁶ David ne hagamanuuia hogi tangada a de Maadua gu dau bolo gu heohi, gai e dee go hiidinga o ana hegau:

⁷ “E manuuia tangada a de Maadua gu degi ange gi ono haisala, gai ono haisala gu haoli.

⁸ E manuuia tangada a Tagi Maolunga e dee dau ange ono haisala gi de ia.”

⁹ E aha, de manuuia nei se mee ange donu huu gi de gau Ssuu, aabe se mee ange hogi gi denga Gentile? Gidaadeu gu hagataba bolo de gai o Abraham ne hai ia gi dau bolo se dangada e heohi.

¹⁰ Gai dee hee de masavaa oona ne dau ai gi se dangada e heohi? Go dua aabe go mua dono tuu dagaholiage? E dee go dua, aagai go mua dono tuu dagaholiage!

¹¹ Gai dono tuu dagaholiage se hagailonga, e maaga ai dono hai ga se dangada e heohi i de gai, i de masavaa oona tigi tuu dagaholiage ai. Deenei ai, go ia tamana o dangada alodahi e hagadonusia aagai tigi tuu dagaholiage. Gilaadeu gu dau gi ni dangada e heohi i olaadeu kai.

¹² Gai go ia hogi tamana o dangada e dee tuu dagaholiage laa donu huu i olaadeu angaanga, gai e daudali hogi i de gai o taadeu dubuna go Abraham, i de masavaa oona tigi tuu dagaholiage ai.

¹³ Gai de hagatoo donu ange gi Abraham ma dono aamuli, bolo henua i lalo alodahi e bolo ange naa gi gilaadeu gi henua ai, tee hai i hiidinga o de hainga, aagai ne hai i hiidinga o delaadeu hagaheohi i de gai.

¹⁴ Gai noo de hagatoo donu a de Maadua se mee ange donu huu gi gilaadeu e daudali i de hainga, gai de gai gu dee hai hegau gai de hagatoo donu laa gu deai ono haigamaiana.

¹⁵ De hainga e hai ga humai de lili ⌊o de Maadua⌋, aagai noo e deai se hainga, aagai e deai hogi se haisala.

¹⁶ Deenei ai, de hagatoo donu nei e maua donu huu i de gai, gai gi se mee ai e maua i de abodonu ma de hagatoo donu ange gi hagadiilinga alodahi o Abraham — e dee ange donu huu gi gilaadeu e daudali i de hainga, aagai ange hogi gi gilaadeu e kai bei dagodo o Abraham. Ia go tamana odaadeu alodahi.

¹⁷ Gai gu sisi e hai ange, “Au gu hai goe go tamana o denga huaahenua soa”  — i mada luu mada o de Maadua aana ne hagadonusia laa, go de Maadua e gaavange laa de mouli gi gilaadeu e maakau ma de basa ga hai gi hanu mee tigi ai laa.

¹⁸ Gai Abraham ne hagadonusia ma de tali hagalodolodo, i de masavaa e dagodo ai be e deai donu haigamaiana dana tali hagalodolodo, bolo ia e hai go tamana o denga huaahenua soa; bei de hai gu tala ange ai laa, “Deelaa naa hogi de soa o doo aamuli.”

¹⁹ Gai Abraham tee baageaa donu dono gai i dana maanadu dagodo o dono angaanga gu dai magau laa, i hiidinga ia gu lau ono ngadau, aabe go dana maanadu bolo Sarah se hine e dee maua i de hagadili.

²⁰ Gai ia tee lua lodo donu i dana hagadonu de hagatoo donu a de Maadua, aagai dono gai ne mmahi mmao aama de hagamahamaha de Maadua,

²¹ ia ne hagadonusia bolo de Maadua e maua i de hagassula ana mee gu lava i de hagatoo donu.

²² Deelaa ai, “dono gai ne hai ia gi dau bolo se dangada e heohi.”

²³ Gai muna e hai ange laa, “dono gai ne hai ia gi dau bolo se dangada e heohi” tee sisi ange donu huu gi de ia,

²⁴ aagai mai hogi gi gidaadeu — go gidaadeu gu dau hogi bolo ni dangada e heohi i taadeu hagadonu de ia ne hagamouli ina age Iesu taadeu Dagi Maolunga i de magau.

²⁵ Ia ne gaavange e daa gi magau i hiidinga odaadeu haisala, gai ne mouli age ange e hagaheohi ai gidaadeu.