Romans 3 - De Beebaa Dabu

De Maadua e hai hegau i de mee abodonu

¹ Gai se aha o tangada Ssuu e dubu ange ai laa? Gai aahee haigamaiana o de tuu dagaholiage?

² E lagolago donu mee o de gau Ssuu e dubu ange ai! Tahi mee: de Maadua ne gaavange ana muna donu gi gilaadeu.

³ Gai noo hanu e dee hai hegau i de mee abodonu? Gai e maua naa delaadeu dee hai hegau i de muna abodonu, i de hai gi dee hai haigamaiana de hai hegau o de Maadua i de mee abodonu?

⁴ E dee maua donu! De Maadua e heohi, aagai dangada alodahi ni dangada hadu muna. Gai gu sisi e hai ange, “Koe e hagaheohi donu i doo masavaa e basa ai, ma de kii i de masavaa aau e hagamodu ai muna.”

⁵ Gai noo odaadeu baubau e hai ga sula danuaa mai de heohi o Maadua, gai aahee ai adaadeu muna ange gi mee nei? E maua e gidaadeu i de hagataba bolo de Maadua e dee heohi dana hagaduasala gidaadeu i dono bole? (Au e basa bei de hai o dangada e pasa ai.)

⁶ E dee maua donu! Gai dee hee ai de hai a de Maadua e maua ai i de hagamodu muna o henua i lalo?

⁷ Aagai noo go dogu dee hai hegau i de mee abodonu e haia ga sula danuaa mai de hai hegau o de Maadua i de mee abodonu ma de hai gi kii ange dono hagamahamaha, gai gu aha ia gu hagamodu ai nei bolo au se dangada haisala?

⁸ Gai gu aha gidaadeu gu dee hai ai de baubau gi sula danuaa mai ai tanuaa? — bei de hai a hanu dangada e tala ai naa bolo aanei amaadeu muna e tala. Gai e heohi donu delaadeu hagaduasala.

E deai donu se dangada e heohi

⁹ Aahee ai adaadeu muna ange gi mee nei? E maua e gidaadeu de gau Ssuu i de hagataba bolo gidaadeu e kii ange tanuaa? E dee maua donu! Gidaadeu gu lava i de hagaago danuaa mai bolo de gau Ssuu ma denga Gentile alodahi gu too ange gi lalo ssauaa o de haisala,

¹⁰ bei de hai gu sisi ai laa, “E deai donu se dangada e heohi, e deai donu;

¹¹ e deai donu se dangada e donu ange; e deai donu se dangada e saalaa de Maadua.

¹² Dangada alodahi gu hulo gee mai i de haiava, gilaadeu alodahi gu deai olaadeu haigamaiana; gu deai donu se gilaadeu e haia de mee danuaa, gu deai donu se dangada daudahi.

¹³ Olaadeu holomanga e bei denga daanunga e maahuge laa; olaadeu alelo e daahanga dangada. Mee hagammau o denga labodo hagammau i lalo olaadeu malaungudu.

¹⁴ Olaadeu ngudu e hoohonu i denga muna baubau ma de mmala.

¹⁵ Gai e moolau naa donu delaadeu daa dangada ga maakau;

¹⁶ gilaadeu e oha ma de vaivai hai dangada i mommee alodahi olaadeu e hulo aagena,

¹⁷ gilaadeu e dee tonu ange gi dagodo o de nnoho paba.

¹⁸ Gai e deai donu se madagu i de Maadua i olaadeu daha.”

¹⁹ Gidaadeu e iloo bolo muna alodahi o de hainga e basa ange gi dangada e nnoho laa i lalo de hainga, gi dee maua ai e dahi dangada daudahi i de hagaheohi donu huu ia, gai henua i lalo alodahi gi too ange gi de hagaduasala a de Maadua.

²⁰ Go hiidinga e deai donu se dangada e maua i de hai gi heohi ia i daho de Maadua i dono daudali i de hainga; gai de hainga e hai gi iloo e dangada dagodo o de haisala.

De hagaheohi i de gai

²¹ Aagai iainei de Maadua gu hagaago mai bolo ia e hagaheohi dangada, aagai e dee go delaadeu daudali i de hainga. Gai de hainga ma denga pelaabisi gu tala hagadonu dagodo o de mee nei.

²² Gai de hagaheohi nei ne gaavange gi dangada alodahi i delaadeu hagadonu Iesu Klisdo. Gai e dee dagodo geegee donu dangada,

²³ go hiidinga dangada alodahi gu haisala gai gu dee maua i de kave de mahamaha o de Maadua,

²⁴ gai dangada gu hagadanuaa i de mee ngadi gaavange go dono abodonu, i de hagaoanga a Klisdo Iesu gu hagao laa.

²⁵ De Maadua ne gaavange Iesu ga hai ai ssigidaumaha i ono dodo, e tala ai haisala o dangada e kai ange gi de ia. Ssigidaumaha nei e hagaago mai bolo de Maadua e heohi, i hiidinga ia ne golomagi ono lodo, ga hagadee anga ange gi denga haisala i mua.

²⁶ De mee nei ne hai e hagaago mai ai dono heohi i de masavaa nei, gai ia e hagaheohi tangada e gai ange gi Iesu.

²⁷ Gai e maua ai naa e gidaadeu i de tuhi donu huu gidaadeu? E dee maua donu! Gai dee hee ai naa de hainga odaadeu e daudali ai? Go de hainga o denga hegau? E deai, go de hainga o de gai.

²⁸ Deenei ai, gidaadeu e iloo bolo go de gai o tangada e hagaheohi ai, e dee go dono daudali i de hainga a Moses.

²⁹ E aha, de Maadua se Maadua donu huu niio de gau Ssuu, e dee se Maadua hogi niio denga Gentile? Uaa, ia se Maadua donu hogi niio denga Gentile,

³⁰ go hiidinga e dahi donu huu Maadua; gai ia e hagaheohi gilaadeu e tuu dagaholiage ma gilaadeu e dee tuu dagaholiage i de gai.

³¹ Gai e maua ai naa e gidaadeu i de tili hainga a Moses i hiidinga gidaadeu gu hagaheohi i odaadeu kai? E dee maua donu! Aagai gidaadeu gi hagasula ina de hainga.