Romans 15 - De Beebaa Dabu

Klisdo taadeu hagaago danuaa

¹ Gidaadeu e mmahi laa i de gai gi golomagi ina odaadeu lodo i gilaadeu e baageaa, gai gi dee hagamalangilangi ina donu huu gidaadeu.

² Dahi ma dahi gi hagamalangilangi ina tangada ange laa gi danuaa ange ai gi tangada ange laa, gai gi hagadagadaga age ai dono gai.

³ Go hiidinga Klisdo tee hagamalangilangi donu huu ia, gai gu sisi e hai ange, “Gilaadeu e hagadogaa ina goe, e hagadogaa donu hogi au.”

⁴ Gai mee alodahi ne sisi laa madagidagi ne sisi e agoago ai gidaadeu, gi tuu ai gidaadeu gi makaga, ma de lo taane i taadeu iloo de Beebaa Dabu, gai gi dahi ai adaadeu tali.

⁵ Gai de Maadua o de golomagi lodo ma de lodo mmahi gi gaavadu gi goodou de lodo daudahi, bei dagodo lodo o Klisdo Iesu,

⁶ gai gi buni ai oodou lodo i doodou tuhi de Maadua, ma Tamana o taadeu Dagi Maolunga go Iesu Klisdo.

⁷ Deenei ai, goodou hagadau abodonu, bei de hai a Klisdo ne abodonu adu ai gi goodou, gi maua ai e goodou i de hagamahamaha de Maadua.

⁸ Gai au e tala adu gi goodou bolo Klisdo ne hai ga se dangada hai hegau niio de gau Ssuu, e hagaago mai ai bolo de Maadua e hai hegau i de mee abodonu, gai e hagadonu ai denga hagatoo donu ange gi denga dubuna madagidagi,

⁹ gai denga Gentile ga hagamahamaha ai de Maadua i hiidinga dono abodonu, bei de hai gu sisi ai laa, “Deenei ai, au e tuhi goe i magavaa o denga Gentile, au e daahili ma de tuhi doo ingoo.”

¹⁰ Gai gu hai ange hogi, “Denga Gentile, goodou malangilangi madali ono dangada.”

¹¹ Gu hai ange hogi, “Denga Gentile alodahi, goodou duuhia Tagi Maolunga, gai dangada alodahi gi duuhia ia.”

¹² Gai Isaiah gu hagadaba hogi, “De mogobuna o Jesse e humai naa, ia e hanage naa ga dagi denga Gentile; gai go ia de tali hagalodolodo a denga Gentile.”

¹³ Gai de Maadua o de tali hagalodolodo gi haia gi honu doodou malangilangi ma doodou nnoho paba i doodou hagadonusia, gai gi hagadagadaga age ai doodou tali hagalodolodo i ssauaa o de Hagasaalunga Dabu.

Paul tangada agoago o denga Gentile

¹⁴ Denga daina, au e iloo abodonu bolo goodou e abodonu mmao, goodou e hoohonu i de iloo mee, ma de maua i de hagadau agoago goodou.

¹⁵ Gai au e lo taane donu i de sisi adu dagodo o hanu mee e hagamaanadu adu ai goodou, go hiidinga o tuuhanga gu gaamai nei gi de au i de abodonu o de Maadua,

¹⁶ go dogu hai ga se dangada hai hegau niio Klisdo Iesu ange gi denga Gentile. Ia gu gaamai gi de au tuuhanga hegau o tangada haimeedabu, gai au ga tala de longo danuaa a de Maadua, gi maua ai i de hai denga Gentile gi se ssigidaumaha e hagamalangilangi ina de Maadua, gu hagadabu i daho de Hagasaalunga Dabu.

¹⁷ Deenei ai, au e maua i de tuhi agu hegau ange gi de Maadua, i dogu noho i lodo o Klisdo Iesu.

¹⁸ Go hiidinga au e dee maua donu i de basa i hanu mee gee ange, go mee donu huu a Klisdo ne hagahai hegau i ogu daha, i agu muna ma agu hegau gi hagallongo ange ai denga Gentile gi de ia,

¹⁹ ma hagailonga mmahi ma mee hagalele mouli, i ssauaa o de Hagasaalunga o de Maadua. Gai au gu agoago de longo danuaa o Klisdo alodahi, mai i Jerusalem ga dae ai gi Illyricum,

²⁰ ma de agoago i de longo danuaa go dagu mee e hagaduu ngae ange laa aagena, au e dee agoago i mommee gu langona ai e dangada agoago o Klisdo, gi dee hagaduulia ai e au i honga tagelo a dahi dangada gee gu lava laa i de hagaduu.

²¹ Go hiidinga gu sisi e hai ange, “Gilaadeu tigi tala ange aagena ono dagodo e gidee naa ia, gai gilaadeu tigi langona e tonu ange naa.”

De hagatau a Paul e hano gi Rome

²² Deenei de hiidinga gu dee modu ai nei tee sula dogu hanadu gi oodou daha.

²³ Gai iainei gu lava agu hegau i denga mommee nei, gai go hiidinga hogi gu ni ngadau lagolago oogu ne lodo ai e hanadu gi oodou daha.

²⁴ Au e tali hagalodolodo bolo gidaadeu e hedae naa donu i dogu hanadu e hano gi Spain, gai goodou ga bale mai ai au i dogu hano gi kilaa, i dua dogu damaa noho ange i oodou daha.

²⁵ Iainei gai au gu dai hano gi Jerusalem e bale ange ai dangada o de Maadua i kilaa.

²⁶ De nohoanga dabu i Macedonia ma Achaia ne malangilangi i de daohi age dahi bale, ange gi de gau hagaau aloha i magavaa o dangada o de Maadua i Jerusalem.

²⁷ Gai gilaadeu ne malangilangi donu i de hai de hegau nei, ni muna abodonu denga Gentile e muli ange donu gi gilaadeu. Go hiidinga noo denga Gentile gu kave hogi denga manuuia i de baasi gi de hagasaalunga madali de gau Ssuu, gai e heohi donu delaadeu bale ange de gau Ssuu i mee bee nei.

²⁸ Gai ga lava naa huu dagu hegau nei, ma de kave gi dae sseene gu daohi age laa, gai au ga hanadu ai loo ga daa adu gi oodou daha, i mua dogu hano gi Spain.

²⁹ Au e iloo bolo de masavaa naa huu oogu e dae adu ai gi oodou daha, gai au e hanadu naa i de manuuia laumalie mai i daho Klisdo.

³⁰ Denga daina, au e dangidangi adu gi goodou, i de ingoo o Tagi Maolunga go Iesu Klisdo ma de aloha o de Hagasaalunga ⌊Dabu⌋, goodou balea mai au i talodalo ange gi de Maadua i ogu hiidinga,

³¹ gi ola mai ai au i gilaadeu e dee hagadonusia i Judea, gai de bale aagu e kave gi Jerusalem, gi se mee e hagamalangilangi ina dangada o de Maadua i kilaa,

³² gai gi maua ai e au i de hanadu gi oodou daha i de malangilangi, i de hagatau a Maadua, gai au ga damaa hagamabu ange ai i oodou daha.

³³ De Maadua o de baba gi noho i oodou daha alodahi. Amen.