Romans 13 - De Beebaa Dabu

Hagallongo ange gi dagi o de henua

¹ Dangada alodahi gi hagallongo ange gi gilaadeu gu gaavange ssauaa e dagi ai. Go hiidinga e deai donu se sauaa o dahi dangada e dagi ai, noo e dee se mee mai i daho de Maadua. Gai sauaa alodahi e hanu go de Maadua ne hagaduulia.

² Deenei ai, be goai e hai baasi ange gi ssauaa nei, e hai baasi ange donu gi de hagatau a de Maadua, gai dangada e haia mee nei e hagaduasala donu.

³ Go hiidinga denga dagi e dee se hai e hagamaatagu ai gilaadeu e haia tanuaa, aagai go gilaadeu e haia de baubau. Noo koe e lodo gi dee madagu goe i tangada iai ssauaa e dagi ai, gai koe haia tanuaa, gai ia ga tuhi ai naa goe.

⁴ Go hiidinga ia go tangada hai hegau o de Maadua ne hai gi danuaa adu ai gi de goe. Aagai noo koe e hai de mee dee heohi, gai koe gi madagu, go hiidinga ia e dee se ngadi dau donu dana gadilaasa; ia se dangada hai hegau niio de Maadua e hagasula ina dono lili ange gi dangada e haia mee dee heohi.

⁵ Deelaa ai, hagallongo ange gi gilaadeu gu hagasauaa gi dagina, e dee go hiidinga donu huu o de hagaduasala, aagai go hiidinga hogi o tagi o de lodo.

⁶ Deenei hogi de hiidinga oodou e hagao ai laa taagisese, go hiidinga de gau iai ssauaa ni dangada hai hegau niio de Maadua, i delaadeu hagahai hegau ssauaa nei.

⁷ Hagao ina mee alodahi oodou e muli ange ai gi dangada: e dee hilihili be go taagisese, be go taagisese o denga goloa ma alahenua, aabe go de hagadubu.

De hagasula de hainga i de aloha

⁸ Goodou gi dee muli ange gi dahi dangada i dahi mee, aagai gi hagadau aaloha, go hiidinga be goai e aloha ange gi dangada e hagasula donu de hainga alodahi a de Maadua.

⁹ Gai denga hainga nei, “Aude dagodo haisala, aude daia tangada gi magau, aude gaiaa, aude nnoo,” aama hainga ange laa e hagapuni alodahi i muna e hai ange laa, “Koe gi aloha i tangada e baa adu gi de goe gi bei doo aloha donu i de goe.”

¹⁰ De aloha e dee hai ange de mee dee heohi gi tangada e baa ange gi de ia; deenei ai, de aloha e hagasula de hainga alodahi.

¹¹ Gai e dee deenei donu huu, gai goodou gu iloo donu dagodo o de masavaa go iainei; gu dae mai donu de masavaa oodou e aalahage ai. Go hiidinga iainei gu kii ange donu de baa mai taadeu hagaola, ma de masavaa odaadeu ne daamada ai laa de hagadonu.

¹² Gu ui de boo, gai gu dae mai de laangi. Deenei ai, gidaadeu ga tili hegau o de gohu gai ga hagauda goloa hebagi o de maalama.

¹³ Gidaadeu ga hai hegau gi danuaa, bei dagodo o dangada e hai hegau i de masavaa e ao ai de mee, e dee go de hai daonga ga hagalonga ai ma de unu ga ssenga, e dee go de hai be se manu ma denga dahulinga dagodo haisala, aabe go de hagadaumee aama de lodo gaiaa.

¹⁴ Aagai goodou gi kahu i Tagi Maolunga go Iesu Klisdo, gai gi dee hagassula ina lodo haisala o de angaanga.