Romans 10 - De Beebaa Dabu

¹ Denga daina, dogu lodo donu ma dagu dalodalo ange gi de Maadua, i hiidinga o dangada o Israel, deenei: gilaadeu gi hagamouli.

² Go hiidinga au e tala donu bolo gilaadeu e kona mmao de kana ange i hegau a de Maadua, aagai gilaadeu tigi tonu ange donu.

³ Go hiidinga gilaadeu tigi tonu ange gi de hai a de Maadua e hagaheohi ai dangada, gai e ssala donu huu delaadeu hai e hagaheohi ai, gilaadeu e dee llodo e dugu ange gilaadeu gi de hagaheohi a de Maadua.

⁴ Go hiidinga Klisdo go de ngado mai o de hainga, gi maua ai e dangada alodahi e hagadonusia gi heohi i daho de Maadua.

De hagamouli se mee ange gi dangada alodahi

⁵ Moses ne sisi dagodo de hagaheohi o tangada i dono daudali i de hainga: “Tangada e hai hegau i de hainga e mouli ai donu.”

⁶ Aagai de hagaheohi mai i de gai e hai ange, “Aude hagadaba i oo lodo, goai e hanage gi de langi?” (e hanage e gave iho ai Klisdo)

⁷ aabe, “Goai e hano iho gi de mommee o de gau maakau?” (e hagaahe age ai Klisdo i de mommee o de gau maakau).

⁸ Aagai aahee muna gu tala laa? “De muna e baa adu donu gi goodou, gai gu dagodo donu i lodo oodou ngudu aama oodou lodo,” go muna e tala ai dagodo o de gai amaadeu e agoago ai laa.

⁹ Go hiidinga noo koe e tala i doo ngudu bolo Iesu go Tagi Maolunga ma de hagadonusia i oo lodo bolo de Maadua gu hagamouli age ia i de magau, gai koe e hagamouli.

¹⁰ I hiidinga tangada e hagadonusia i ono lodo e hai hogi ga heohi, gai tangada e daalaa hagadonu mee nei i dono ngudu e hagamouli.

¹¹ Gai e hagadaba de Beebaa Dabu, “Tangada e hagadonusia ia e dee hagadogaa ina naa donu.”

¹² Gai e dee dagodo geegee donu tangada Ssuu ma tangada Gentile; e dahi donu huu olaadeu Dagi Maolunga, ia e hagamanuuia gilaadeu alodahi e hagahia ange ia.

¹³ Gai e hagadaba de Beebaa Dabu, “Be goai e hagahia de ingoo o Tagi Maolunga e hagamouli donu.”

¹⁴ Dee hee de hai a dangada e hagahi ange ai de ia alaadeu tigi hagadonusia laa? Gai dee hee de hai a dangada e hagadonusia ai de ia, alaadeu tigi langona ono dagodo? Gai dee hee de hai a dangada e langona ai noo tigi ai se dangada ne agoagona ange gilaadeu?

¹⁵ Gai dee hee de hai a dangada e agoago ai, noo teai ne hagasauaa ina gilaadeu gi hulo? Gai gu sisi e hai ange, “Ga dae laa de mahamaha vae o dangada e agoago ina de longo danuaa!”

¹⁶ Aagai e dee go de gau Israel alodahi ne daohia muna o de longo danuaa; go hiidinga Isaiah ne hagadaba, “Tagi Maolunga, goai ne hagadonusia amaadeu agoago?”

¹⁷ Deenei ai, de gai e daamada mai i taadeu langona de muna, go de agoago o de longo danuaa o Klisdo.

¹⁸ Aagai au e ssili adu: E aha, gilaadeu tigi langona laa donu? Uaa, gilaadeu gu langona donu, go hiidinga gu sisi e hai ange, “Olaadeu leo gu hulo ma gu tae gi henua i lalo alodahi, gai alaadeu muna gu tae gi luu bido o henua i lalo.”

¹⁹ Aagai au e ssili adu: E aha, de gau Israel tee tonu ange laa donu? Taamada gai Moses ne hagadaba, “Au e hai naa goodou gi llodo gaiaa i gilaadeu tigi hai gi se huaahenua; ma de llili i dahi huaahenua llodo ssenga.”

²⁰ Gai Isaiah ne lo taane donu i de hagadaba, “Gilaadeu e dee saalaa ngau gu gidee au; au gu hagaago ange au gi gilaadeu e dee siilia ogu dagodo.”

²¹ Aagai ia ne hagadaba i dagodo o Israel, “Mai i taiao ga boo ai gai au ne haalo ange luoogu lima gi dahi huaadangada dee hagallongo i muna ma de llodo e hai baasi.”